އޭޕްރިލް މަހުގެ 15 ވަނަ ދުވަހު އޮތް ރައްޔިތުންގެ މަޖިލީހުގެ ޖަލްސާ އިން ފާސް ކުރެއްވި "ދައުލަތުގެ ޚަރަދަށް ޒިންމާވުމުގެ ބިލް" ރައީސް ޑރ. މުޙަންމަދު ވަޙީދު ހަސަން މަނިކު ތަޞްދީޤު ކުރައްވައިފި އެވެ.
ތަޞްދީޤު ކުރެއްވުމާ ގުޅިގެން މި ޤާނޫނު، ދިވެހި ސަރުކާރުގެ ގެޒެޓްގައި ޝާއިޢު ކުރައްވައިފި އެވެ.
މި ޤާނޫނަކީ މިއީ ދައުލަތުގެ ފިސްކަލް ޕޮލިސީ ޒިންމާދާރު ގޮތެއްގައި އަދި ދެމެހެއްޓެނިވި އުޞޫލަކުން ހިފެހެއްޓުމާއި، ފިސްކަލް ކަންކަން ހިންގަނީ ޖަވާބުދާރީވަނިވި، ދެފުށް ފެންނަ ގޮތެއްގައިކަން ކަށަވަރު ކުރުމުގެ ޤާނޫނެވެ.
މި ޤާނޫނުގެ 39 ވަނަ މާއްދާގެ (ށ) ގައި، މި ޤާނޫނުގެ ވަކި މާއްދާއަކަށް ނުވަތަ މާއްދާތަކަކަށް ޢަމަލުކުރެވެން އޮތީ، ވަކި އުޞޫލުތަކެއް ނުވަތަ ނިޒާމްތަކެއް ތަޢާރުފްކޮށްގެން ކަމަށް ރައީސުލްޖުމްހޫރިއްޔާ އަށް ފެނިއްޖެ ހިނދެއްގައި، އެ މާއްދާއަށް ނުވަތަ މާއްދާތަކަކަށް ޢަމަލު ކުރުން، މިޤާނޫނަށް ޢަމަލުކުރަން ފަށާ ދުވަހުން ފެށިގެން 12 މަސްދުވަހުގެ މުއްދަތަށް ފަސް ކުރަން ކަނޑައެޅުމުގެ ބާރު، ރައީސުލްޖުމްހޫރިއްޔާ އަށް ވަނީ ލިބިދީ ފަ އެވެ.
އެހެންކަމުން މި ޤާނޫނުގެ 10، 11، 12، 13، 14، 15، 16، 17، 18، 19، 20، 21، 22، 23، 24، 25، 26، 27، 28، 32، 33، 34 މި މާއްދާތަކަކީ ވަކި އުޞޫލުތަކެއް ނުވަތަ ނިޒާމްތަކެއް ތަޢާރުފްކޮށްގެން ހިންގެން ހުރި މާއްދާތަކެއް ކަމަށްވާތީ، އެ މާއްދާތަކަށް ޢަމަލު ކުރުން، މި ޤާނޫނަށް ޢަމަލުކުރަން ފަށާ ތާރީޚުން ފެށިގެން 12 މަސްދުވަހުގެ މުއްދަތަށް ފަސްކުރުމަށާއި، އެ މާއްދާތަކަށް ޢަމަލުކުރަން ފަށާނެ ތާރީޚަކީ، 6 މެއި 2014 ކަމަށް، ރައީސުލްޖުމްހޫރިއްޔާ ކަނޑައަޅުއްވައި، މި ޤާނޫނުގެ 39 ވަނަ މާއްދާގެ (ނ) ގައި ބަޔާންކޮށްފައިވާ ޤަރާރު، ރައީސުލްޖުމްހޫރިއްޔާ މިއަދު ވަނީ ނެރުއްވާފަ އެވެ.