ސްޕެއިނުގެ ބާސެލޯނާއިން ބްރެޒިލްގެ ވިންގާ ވިލިއަން ގެންދިއުމަށް މަސައްކަތްކުރިނަމަވެސް އޭނާ ބޭނުންވީ ޗެލްސީގައި މަޑުކުރުމަށްކަމަށް ވިލިއަން ބުނެފިއެވެ.
"އަހަރެން ކުރީންވެސް ބުނެފައިވާނެ ބޭނުމީ މިކްލަބުގައި މަޑުކުރާން ކަމަށް" ކޮމިއުނިޓީ ޝީލްޑްގައި މެންޗެސްޓަރ ސިޓީ އަތުން ޗެލްސީ 2-0 އިން ބަލިވި މެޗަށްފަހު އީއެސްޕީއެން ބްރެޒިލް އަށް ދިން އިންޓަވިއުގައި ވިލިއަން ބުނެފައިވެއެވެ.
"އަހަރެންނަށް އެނގޭގޮތުގައި ރަސްމީ ސިފައެއްގައި އަހަރެން ގެންދިއުމަށް މަސައްކަތްކުރީ ބާސެލޯނާއިން އެކަނި". ވިލިއަން ބުންޏެވެ.
މީޑިއާ ރިޕޯޓްތައް ބުނާގޮތުގައި މެންޗެސްޓަރ ޔުނައިޓެޑާއި ރެއާލް މެޑްރިޑުން ވަނީ ވިލިއަން ގެންދިއުމަށް ޝައުގުވެރިކަންފާޅުކޮށްފައެވެ. މީގެއިތުރުން، ޗެލްސީގެ ތިބޯ ކޯޓުއާ އާއި އެޑެން ހަޒާޑް ހޯދުމަށްވެސް ރެއާލުން މަސައްކަތްކޮށްފައިވާކަމަށްވެއެވެ.
އުމުރުން 29 އަހަރުގެ ވިލިއަން އިތުރަށް ބުނެފައިވަނީ އެކްލަބުން އޭނާ ވިއްކާލަން ބޭނުންނުވާހައި ހިނދަކު އެޓީމާއިއެކު ކުރިއަށްދާން ބޭނުންވާކަމަށެވެ.
"ކްލަބުން އަހަރެން ވިއްކާލަން ބޭނުންނުވާހައި ހިނދަކު އަހަރެންގެ ވިސްނުންހުރީ މިކްލަބާއިއެކު އިތުރަށް ކުރިއަށްދިއުމަށް." ވިލިއަން ބުންޏެވެ.
މިހާތަނަށް ޗެލްސީގައި ފަސްއަހަރު ހޭދަކޮށްފައިވާ ވިލިއަން، ވޯލްޑް ކަޕަށްފަހު އެޓީމުގެ ފަރިތަކުރުންތަކަށް ނުކުންނަން އޮތީ މިދިޔަ ޖުލައިމަހުގެ 27 ވަނަ ދުވަހަށެވެ. އެހެންނަމަވެސް، ވިސާގެ މައްސަލައެއް ދިމާވުމުން އޭނާ ޗެލްސީގެ ފަރިތަކުރުންތަކާ ގުޅިފައި ވަނީ އޯގަސްޓްމަހުގެ 3 ވީ ހުކުރު ދުވަހުގެ ވަގުތެއްގައެވެ.
ޗެލްސީގެ އައު ކޯޗު މައުރީޒިއޯ ސާރީ އެޓީމާއި ހަވާލުވެ މިފަހަރުގެ ޓްރާންސްފާ ބާޒާރުގައި މިހާތަނަށް ގެނެސްފައިވަނީ ނަޕޯލީއަށް ކުޅެމުން އައި އިޓަލީގެ މިޑްފީލްޑަރު ޖޯޖީނިއޯގެ އިތުރުން ވެސްޓްހޭމް ޔުނައިޓެޑްގެ ކުރީގެ ގޯލްކީޕަރު ރޮބަޓް ގްރީން އެވެ.