ތިނަދު އަށް ނިސްބަތްވެ ވަޑައިގަންނަވާ ދެ މަޖިލިސް މެންބަރުން ކަމުގައިވާ ސައުދުﷲ ހިލްމީ އާއި އަބްދުﷲ އަހްމަދު (އަބުޅޯ) އިދިކޮޅު ފަރާތްތަކާ ގުޅިވަޑައިގެންނެވީ ރިޝްވަތުގެ ފައިސާގައި ހިއްޕެވުމަށް ފަހު ކަމަށް ފޭދޫ ދާއިރާގެ މެންބަރު އިބްރާހިމްދީދީ (އައިބީ) ތުހުމަތު ކުރައްވައިފި އެވެ.
އޭނާ ވިދާޅުވި ގޮތުގައި، މިއަދު ސައުދު އާއި މެންބަރު އަބުޅޯ ޕީޕީއެމް އާއި ދުރަށް ދާން ޖެހުނީ ތިނަދޫއަށް ކަމެއް ނުވާތީއޭ ވިދާޅުވި ނަމަވެސް އެއީ ހަގީގަތެއް ނޫން ކަމަށެވެ. އައިބީ ވިދާޅުވި ގޮތުގައި އެފަދަ ވާހަކަތައް ދެއްކީމާ "މޮޔައިން ގާތަށް ރުޅިވެސް އަންނާނެ ކަމަށާއި ހިނިވެސް އަންނާނެ" ކަމަށެވެ.
އައިބީ ވިދާޅުވި ގޮތުގައި އަބުޅޯ އާއި ސައުދު އިދިކޮޅު ފަރާތްތަކާއި ގުޅިވަޑައިގެންނެވީ ތިނަދޫ އަށް ކަމެއް ނުކުރެވިގެން ކަމަށް ދައްކަވާ ވާހަކަ އަކީ ހަގީގަތެއް ނޫން ކަމަށެވެ. އަދި އެ 2 މެންބަރުން އިދިކޮޅު ފަރާތްތަކާއި ގުޅިވަޑައިގެންނެވީ ރިޝްވަތުގެ ފައިސާ ނަންގަވައިގެން ކަމަށެވެ.
"ހަމަ ހަގީގަތުގައި، ތެދު ތެދަށް ދަންނަވާނަމަ، އަޅުގަނޑަކީ ވެސް މިކަން ދެނަހުރި މީހެއް. ހަމަ ރިޝްވަތުގެ ލާރި ޕީޕީއެމްގެ މެންބަރުންނަށާއި އަދި މަޖިލިސް ތެރެއަށާ އެކިއެކި ދިމަ ދިމާލަށް .އިދިކޮޅު ފަރާތްތަކުން ހަމަ ރިޝްވަތުގެ ލާރި އެކިގޮތްގޮތުން ހުށަހަޅައިގެން އެ ލާރި ހިފައިގެން ދިޔަ ބޭފުޅުން އެއީ." މެންބަރު އަބުޅޯ އާއި ސައުދުﷲ އިދިކޮޅު ފަރާތްތަކާއި ގުޅުނީ ރިޝްވަތުގެ ފައިސާ ނަންގަވައިގެން ކަމަށް ތުހުމަތު ކުރައްވައި އިބްރާހިމްދީދީ ވިދާޅުވިއެވެ.
އިބްރާހިމްދީދީ ވިދާޅުވި ގޮތުގައި، އަބުޅޯ އާއި ސައުދުﷲ އިދިކޮޅު ފަރާތްތަކާއި ގުޅިވަޑައިގެންނެވީ ރިޝްވަތުގެ ފައިސާ ހިއްޕަވައިގެން ކަން ވަރަށް ސާފުކޮށް ވިދާޅުވާން ކެރިވަޑައިގަންނަވާ ކަމަށެވެ. އެކަން ޔަގީންކަމާއި އެކު އެނގިވަޑައިގަންނަވަނީ އިބްރާހިމްދީދީ ވިދާޅުވި ގޮތުގައި އެފަދަ ހުށަހެޅުންތައް ލިބިވަޑައިގެންފައި ހުރުމުންނެވެ.
އެހެން ނަމަވެސް އެފަދަ ހުށަހެޅުމަކަށް އެއްބަސްވެ ވަޑައިނުގަންނަވާ ކަމަށް އިބްރާހިމްދީދީ ވިދާޅުވިއެވެ.
"އަޅުގަނޑަށް ކެރޭ މިހެން ދަންނަވަން. ސަބަބަކީ އަޅުގަނޑަކީ ވެސް މިބޭފުޅުންގެ ތެރެއިން ބައެއް ބޭފުޅުން ގުޅާފައި މެންބަރު އައިބީ ތިމަންނަ މެންނާއި ގުޅެންވީ ނޫންހޭ މިވެނި ކަމެކޭ އެވެނިކަމެއް ކޮށްޤދޭނަމޭ. މީ ރިޝްވަތު ނޫންތޯ؟" އައިބީ ވިދާޅުވިއެވެ.
މެންބަރު ސައުދުﷲ އާއި އަބުޅޯގެ މައްޗަށް އިބްރާހިމްދީދީ މިފަދަ ތުހުމަތުތަކެއް ކުރެއްވި ނަމަވެސް އެ މައްސަލަ މިހާތަނަށް އެންޓި ކޮރަޕްޝަން ކޮމިޝަނަށް ހުށަހަޅާފައެއް ނުވެއެވެ. ކޮރަޕްޝަންގެ މައްސަލައެއްގެ މައުލޫމާތު ލިބިފައި އެ ކަން ރިޕޯޓް ނުކުރުމަކީ، ކޮރަޕްޝަން ހުއްޓުވުމާއި މަނާ ކުރުމުގެ ގާނޫނުގެ ނުވަވަނަ މާއްދާގެ (ހ) ގެ ދަށުން ކުށެކެވެ.
ކޮރަޕްޝަން ހުއްޓުވުމާއި މަނާ ކުރުމުގެ ގާނޫނުގައި ބުނެފައިވާ ގޮތުން ކޮރަޕްޝަންގެ އަމަލެއް ހިނގާކަން އެނގި އެފަދަ މައުލޫމާތެއް ހިއްސާ ނުކުރާ މީހަކަށް ދެ އަހަރުގެ ޖަލު ހުކުމެއް އަންނާނެ އެވެ.
ކޮރަޕްޝަން ހުއްޓުވުމާއި މަނާ ކުރުމުގެ ގާނޫނުގެ ނުވަވަނަ މާއްދާގެ (ހ)
"މިގާނޫނުގައި ބަޔާންކޮށްފައިވާ އެއްވެސް މީހަކު ރިޝްވަތު ހިފައިވިކަން ނުވަތަ ހިފަން އުޅެފިކަން ނުވަތަ އެއްވެސް މީހަކު ރިޝްވަތު ދީފިކަން ނުވަތަ ދޭން އުޅޭކަން އެނގިއްޖެ ނަމަ ނުވަތަ ރިޝްވުތު ހިފައިފިކަން ހިފަން އުޅޭކަން ނުވަތަ ދީފިކަން ދޭން އުޅޭ ކަމަށް ގަބޫލުކުރެވޭ ފަދަ ހާލަތެއް ދިމާވެއްޖެ ނަމަ ކަމާބެހޭ ތަފްސީލާއި އެ އަމަލެއް ހިންގަން އުޅުނު ބައެއްގެ މައުލޫމާތާ އެކު އޭސީސީއާ ހިއްސާ ކުރަންވާނެ އެވެ. އަދި އެކަށީގެންވާ ދިގު މުއްދަތެއްގައި އެކަން ނާންގައި ހުރުމަކީ ކުށެކެވެ."