ބޮޑެތި ބަލިތަކަށް ފަރުވާ ހޯދުމަށް ސަލާންޖެހުމަށް ނިމުމެއް ގެންނަވާނެ ކަމަށް ހުއްޓުވާނެ ކަމަށް އިދިކޮޅު ރިޔާސީ ކެންޑިޑޭޓް އިބްރާހިމް މުހަައްމަދު ސޯލިހް ވިދާޅުވެއްޖެއެވެ.
އިބޫ މިހެން ވިދާޅުވީ، ރޭ ލ. ގަމުގައި ގުޅިފައިވާ ޕާޓީތަކުން ބޭއްވި ކެމްޕެއިންގެ ބޮޑު ޖަލްސާގައި ވާހަކަ ދައްކަވަމުންނެވެ.
ބޮޑެތި ބަލިތަކަށް ފަރުވާ ހޯދުމަށް ރައްޔިތުން ސަލާން ޖަހާ ޖެހުން ހުއްޓުވާނެ ކަމަށް އިބޫ ވިދާޅުވި އިރު، މިއީ މިއަދު ރާއްޖޭގެ ވަރަށް ގިނަ ބަޔަކު ކަންބޮޑުވުން ފާޅުކުރަމުންދާ މައްސަލައެކެވެ. ބޮޑެތި އޮޕަރޭޝަންތައް ކުރަންޖެހޭ މީހުންނަށް ތަފާތު ސަބަބުތަކާއި ހުރެ އާސަންދައިގެ ނިޒާމުގެ ތެރެއިން އެހީތެރިކަން ނުލިބި އެތައް ބަޔަކު ސަލާން ޖަހަން ޖެހެއެވެ.
"ބޮޑެތި ބަލިތަކަށް ފަރުވާ ހޯދުމަށް ފަންޑުފޮށި ބަަހައްޓައިގެން ސަލާންޖެހައިގެން ފައިސާ ހޯދުމުގެ ސަގާފަތް އަޅުގަނޑުމެން ނައްތާލާނަން،" އިބޫ ވިދާޅުވިއެެވެ.
މީގެ އިތުރުން އިބޫ ވަނީ ރާއްޖޭގެ ސިއްޙީ ނިޒާމަށް ހެޔޮ ބަދަލުތަކެއް ގެންނަވާނެ ކަމަށް ވެސް ވައުދުވެވަޑައިގެންފައެވެ.
އަމިއްލަ އަށް ބޭސްފަރުވާ ކުރުމުގެ ޤާބިލްކަން ލިބިފައި ނުވާ ފަރާތްތަކުން، ސޯޝަލް މީޑީޔާގައި އެހީ ހޯދުމަށް ކެމްޕެއިންތައް ހިންގާއިރު، އެ ކެމްޕެއިންތަކަށް ސަރުކާރުގެ ފަރާތުން މާބޮޑު އެހީތެރިކަމެއް ނުލިބެއެވެ.