މިނިވަން ނޫހުގެ ނޫސްވެރިޔާ އަހުމަދު ރިލްވާން އަށް ވީނުވީއެއް ނޭނގި ގެއްލިފައިވާ މައްސަލައިގައި ސަރުކާރުން މިހާތަނަށް އަމަލުކުރަމުން އައިސްފައިވާ ގޮތުން، ރައީސް އަބްދުﷲ ޔާމީން އަށް ދުވަހަކު ވެސް މައާފު ނުކުރާނެ ކަމަށް ރިޟްވާންގެ މަންމަ ބުނެފިއެވެ.
އިއްޔެ ބޭއްވި ޖަލްސާއެއްގައި ވާހަކަފުޅު ދައްކަވަމުން ރައީސް ޔާމީން ވަނީ، ރިޟްވާން ނިޔާވެފައިވާ ކަަމަށް ވިދާޅުވެފައެވެ. އެހެން ނަމަވެސް އިއްޔެ ބޭއްވި އެހެން ޖަލްސާއެއްގައި ރައީސް ވަނީ އެވާހަކަ ބަދަލުކުރައްވާފައެވެ.
"ރިޟްވާން މަރުވެފައިވާ ކަމަށް ބުނެ ރައީސް ދެއްކެވި ވާހަކަތަކާއި ގުޅިގެން 'ސަންގު ޓީވީ' އަށް ދިން އިންޓަވިއުއެއްގައި ރިޟްވާންގެ މަަންމަ ބުނީ، މިއޮތްހާ ދުވަހު ސަރުކާރުން ގެންދިޔައީ ރިޟްވާން އަށް ވީތަނެއް ނޭނގޭ ކަމަށެވެ. ނަމަވެސް ކުއްލިއަކަށް ރިޟްވާން މަރުވެފައިވާ ކަމަށް ރައީސް ޔާމީން ވިދާޅުވުމުން ލިބުނީ ޝޮކެއް ކަމަށާއި ވީ ގޮތެއްވެސް ބުނެދޭން ނޭނގޭ ކަމަށެވެ.
"މަރުވިތަނެއް ވެސް ނޭނގެޔޭ، ވީތަނެއް ވެސް ނޭނގެޔޭ ބުނަމުން ގޮސް މިއޮތްހާ ދުވަސްވީ، އެކަމު މިއަދު ޓަސްލާފައި މިއަދު ދިވެހިރާއްޖޭގެ ރައީސުލްޖުމްހޫރިއްޔާ، މި ވިދާޅުވީ ރިޟްވާން މަރުވެއްޖޭ. ކިރިޔާނު މަރުނުވީ ޝޮކެއް ޖެހިގެން އަޅުގަނޑަށް. ވީ ގޮތެއް ވެސް ނޭނގުނު އަޅުގަނޑަށް." ރިޟްވާންގެ މަންމަ ބުންޏެވެ.
ރިޟްވާންގެ މަންމަ ބުނިގޮތުގައި، ރައީސް އަބްދުﷲ ޔާމީންގެ އިތުރުން ރިޟްވާން އަށް ހެދިގޮތެއް އެ ހެދި ބަޔަކަށް އެއްވެސް ބައާފެއް ނުދޭނެ ކަމަށެވެ. އަދި އެވާހަކަތައް ދެއްކެވުމުން ގެންގޮސް ޖަލަށް ލިޔަސް މައްސަލައެއް ނެތްކަމަށް ރިޟްވާންގެ މަންމަ ބުންޏެވެ.
"ރައީސުލްޖުމްހޫރިއްޔާ އަކަށް އަޅުގަނޑު މައާފެއް ނުދޭނަން. އެއްގޮތަކަށް ވެސް ނުދޭނަން. ދުވަހަކު ވެސް ނުދޭނަން. މަހްޝަރު ދުވަހު ވެސް ނުދޭނަން. ޤިޔާމަތް މަހްޝަރުން ވެސް ނުދޭނަން ރައީސުލްޖުމްހޫރިއްޔާއަށް ވެސް އެކަކަށް ވެސް މައާފެއް ނުދޭނަން." ވަރަށް އަސަރާއި އެކު ރޮމުން ރިޟްވާންގެ މަންމަ ބުންޏެވެ.
ރިޟްވާން ގެއްލުނުތާ 4 އަހަރު ވެގެން ގޮސްފައިވާއިރު އެކަމާއި ރިޟްވާންގެ މަންމަ ރައީސް ޔާމީން އާއި ބައްދަލުކުރުމަށް އެތައް ފަހަރެއްގެ މަތިން ވަނީ އެދިފައެވެ. އެހެން ނަމަވެސް ރިޟްވާންގެ މަންމަ އާއި ބައްދަލުކުރުމަށް ރައީސް ޔާމީން ވަނީ ދެކޮޅު ހައްދަވާފައެވެ.