އަންނަ ބުރާސްފަތި ދުވަހުގެ ރޭ ޕީޕީއެމްގެ ރަނިން މޭޓް އިއުލާނު ކުރުމުގެ ޖަލްސާ އަށް ފަހު އަންނަ ހަފުތާ ބަންދުގައި ޕީޕީއެމްގެ ޖަލްސާތަކެއް އައްޑޫގައި ބާއްވަން ނިންމައިފި އެވެ.
ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމީނުގެ ކެމްޕޭނު މެނޭޖަރު އަދި ރައްޔިތުން މަޖިލީހުގެ ކިނބިދޫ ދާއިރާގެ މެމްބަރު މޫސާ ޒަމީރު ވިދާޅުވީ ހިތަދޫ އާއި ފޭދޫ އަދި ހުޅުމީދޫގައި ބޭއްވުމަށް ހަމަޖައްސާފައިވާ ކަމަށެވެ. އަދި އެ ޖަލްސާތަކުގައި ޕާޓީގެ ރައީސް މައުމޫން އަބްދުލް ގައްޔޫމާއި ޔާމީން އަދި އޭނާގެ ރަނިން މޭޓް ބައިވެރިވެވަޑައިގަންނަޥާނެ ކަމަށް ވެސް ޒަމީރް ވިދާޅުވި އެވެ.
އަޑުތައް އިވޭ ގޮތުން ޔާމީންގެ ރަނިން މޭޓަކީ ހޯމް މިނިސްޓަރުގެ މަގާމުގައި ހުންނެވި ގައުމީ ޕާޓީގެ ނައިބް ރައީސް ޑރ. މުހައްމަދު ޖަމީލް އަހުމަދު އެވެ.
ޕީޕީއެމްގެ ރެލީތައް އައްޑޫގައި އަންނަ ހަފުތާ ބަންދުގައި ބާއްވަން ނިންމާފައިވާ އިރު އެ ޕާޓީގެ އިސް މެމްބަރުންތަކެއް އައްޑޫގައި މިހާރު ވެސް އަންނަނީ މެމްބަރުން އިތުރު ކުރުމުގެ ހަރަކާތްތަކެއް ހިންގަމުންނެވެ. އެ ޓީމްގައި އިސްކޮށް ހުންނެވީ ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު އަލީ އާރިފް އެވެ.