އައްޑޫ ސިޓީ ހިތަދޫގެ އިތުރު 11 މަގެއްގައި ތާރު އަޅައިގެން ހަދަން ނިންމާފައިވާ ކަމަށް އައްޑޫގައި ހުންނަ ހައުސިން މިނިސްޓްރީގެ އައްޑޫ ޑިޕާޓްމަންޓުން ބުނެފިއެވެ.
ހައުސިން އައްޑޫ ޑިޕާޓްމަންޓުގެ އޮފިޝަލަކު ވިދާޅުވި ގޮތުގައި މިއަދުން ފެށިގެން މަގުތައް ލެވެލް ކުރުމުގެ މަސައްކަތް ފަށާފައިވާ ކަމަށެވެ. އޮފިޝަލް ވިދާޅުވި ގޮތުގައި މިހާރު ކުރައަށް ދަނީ މަގުތައް ލެވެލް ކުރުމާއި ޖަންކްޝަން ބަހައްޓާނެ ސަރަހައްދުތައް ކޮނުމުގެ މަސައްކަތް ކަމަށެވެ.
ރިޔާސީ އިންތިހާބަށް 45 ދުވަހަށް ވެފައި ވަނިކޮށް އައްޑޫގެ މަގުތައް ހަދަން ފެށިއިރު، މަގުތަކުގެ ފެންވަރު ދަށްވެގެން އާއްމުން ކަންބޮޑުވުން ފާޅުކުރަމުންދާތާ ގިނަ ދުވަސްތަކެއް ވަނީ ވެފައެވެ.
މިދިޔަ އަހަރުގެ ތެރޭގައި އައްޑޫގެ 19 މަގެއްގައި ތާރު އަޅައިގެން ހަދަން ހަމަޖެހިފައިވާ ކަމަށް ހައުސިން މިނިސްޓްރީން ވަނީ ބުނެފައެވެ.
ހިތަދޫގެ 11 މަގު ހިމެނެނީ، އައްޑޫން ތާރުއަޅާނެ ކަމަށް ބުނި 19 މަގުގެ ތެރޭގައި ކަމަށް ހައުސިން އިން ބުނެ އެވެ.
އެ ފަހަރު ހައުސިން އިން ބުނީ އައްޑޫގެ މަގުތައް ހަދަން ހަވާލުކުރާނީ ކޮންޓްރެކްޓް އުސޫލުން ކަމަށެވެ. ނަމަވެސް މިހާރު އައްޑޫގެ މަގުތައް ހަދަމުން ގެންދަނީ ހައުސިންގެ މުވައްޒަފުންނެވެ.