ރައީސް ޑރ. މުޙަންމަދު ވަޙީދު ހަސަން މަނިކު ސ. ހިތަދުއަށާއި، ހުޅުމީދު އަށް ކުރައްވާ ދަތުރުފުޅެއްގައި މިއަދު ހެނދުނު ފުރާވަޑައިގެންފި އެވެ.
ރައީސްގެ އަރިހުގައި، އެ މަނިކުފާނުގެ އަނބިކަނބަލުން އިލްހާމް ޙުސައިން، މި ދަތުރުފުޅުގައި ބައިވެރިވެ ވަޑައިގަންނަވަ އެވެ.
ރައީސްގެ މި ދަތުރުފުޅުގައި، ހިތަދޫ ވޯޓަ ސަޕްލައިގެ މަސައްކަތް ފަށްޓަވާ ދެއްވައި، ސ. އަތޮޅު މަދުރަސާގައި އޭ ލެވެލް އަށް ކިޔަވައިވައި ދިނުން ފަށްޓަވައި ދެއްވުމަށް ވަނީ ހަމަޖެހިފައިވާ ކަމަށަ ރައީސް އޮފީހުން ބުނެ އެވެ.
އެނގިފައިވާ ގޮތުގައި ރައީސް އާއި އެ މަނިކުފާނުގެ ޓީމް އައްޑު އަށް އަންނާނީ 9:45 ގަ އެވެ. އަދި ވޯޓަ ސަޕްލައިގެ މަސައްކަތް ފަށްޓަވައި ދެއްވާނީ ހިތަދޫގައި 10:30 ގައި ބާއްވާ ރަސްމިއްޔާތެއްގަ އެވެ.
ރައީސްގެ ދަތުރާ ބެހޭ ގޮތުން އައްޑޫ ސިޓީ ކައުންސިލް އިދާރާ އިން ބުނީ ރައީސް އައްޑު އަށް މިއަދު ވަޑައިގަންނަވާކަން ފިޔަވައި ދަތުރާ ބެހޭ އެއްވެސް މައުލޫމާތެއް ލިބިފައި ނުވާ ކަމަށެވެ.
މޭޔަރު އަބްދުﷲ ސޯދިގް (ސޯބެ) ވަނީ ރައީސް އައްޑު އަށް ވަޑައިގެން ވޯޓަ ސަޕްލައިގެ މަސައްކަތް ފަށްޓަވާނެ ކަމަށް ބުނެފައިވާތީ އެކަމަށް ވަރަށް ބޮޑަށް ފާޑު ވިދާޅުވެފަ އެވެ. އަދި ގޭގެ އަށް ފެން ފޯރުކޮށް ދިނުމުގެ ނަމުގައި ރައީސް ކުޅުއްވަން އުޅުއްވަނީ "ސިޔާސީ ފިލްމެއް" ކަމަށް މޭޔަރު ވިދާޅުވި އެވެ.
"އެއީ ރައްޔިތުންނަށް އޮޅުވާލަން ކުރާ ކަމެއް. ގޭގެ އަށް ފެން ގުޅައި ދެނީ ކަމަށް ބުނާ އިރު ރައްކާތެރި ބޯ ފެން ތައްޔާރު ކުރެވޭނެ އިންތިޒާމުތަކެއް އަދި ހުރީ ފުރިހަމަ ނުުރެވި،" އޭނާ ވިދާޅުވި އެވެ.
އެހެން ނަމަވެސް އެސްޔޫއެލް ހިންގެވުމާ ހަވާލުވެ ހުންނެވި އަބްދުﷲ ޒުހައިރު (އަބްހަރީ) މިއަދު ވިދާޅުވީ ޕްލާންޓް ހުރީ ފެން އުފައްދޭ ފެންވަރަށް ތައްޔާރުކޮށް ނިމިފައި ކަމަށާއި ގަޑިއަކު 11،000 ލީޓަރުގެ ފެން މިހާރު ވެސް އުފެއްދޭ ކަމަށެވެ.
އަދި މި ފެނަކީ އެމްޑަބްލިއުއެސްސީގެ މިންގަނޑަށް ތައްޔާރު ކުރެވޭނެ އަދި އެ ފަރާތުން ބަލާ ކޮލިޓީގައި ތައްޔާރު ކުރެވޭ ފެނަށް ވާނެ ކަމަށް ވިދާޅުވި އެވެ.
ޒުހައިރު އަދި ވިދާޅުވީ ފެނުގެ ކަނެކްޝަން ގުޅައި ދިނުމަށް މިވަގުތު އެއްވެސް ފީއެއް ނުނަގާ ކަމަށެވެ. އަދި ކަނެކްޝަން ގުޅައި ދިނުމަށް އެދޭ ފަރާތްތަކަށް ހިލޭ އެކަންކޮށްދީ، މީޓަރު ވެސް ބަހައްޓައި ދެމުން އަންނަ ކަމަށް އޭނާ ވިދާޅުވި އެވެ. ނަމަވެސް ފެން ގުޅައި ދިނުމަށް ފަހު 1،800ރ. ގެ ފީއެއް ނަގާނެ ކަމުގައި ޒުހެއިރު ވިދާޅުވި އެވެ.