ރާއްޖޭގައި ފުރަތަމަ ފަހަރަށް ހިތުގެ ބައިޕާސް އޮޕަރޭޝަނެއް އޭޑީކޭ ހޮސްޕިޓަލުގައި ކޮށްފި އެވެ.
މިއޮޕަރޭޝަން އިއްޔެ އިރުއޮއްސެނިކޮށް ކޮށްފައިވާ އިރު މިއޮޕަރޭޝަންގެ މައުލޫމާތު އޭޑީކޭ އިން އަދި ހާމަކޮށްފައެއް ނުވެ އެވެ. އޮޕަރޭޝަން ކުރެވުނީ އުމުރުން 54 އަހަރުގެ ފިރިހެނެކެވެ.
މިއޮޕަރޭޝަން ކުރީ މާފުށި ޖަލުގައި ހުކުމް ތަންފީޒު ކުރަމުން ގެންދިޔަ ގައިދީއެއްގެ އެންޖިއޯގްރާމެއް ހަދަން މިދިޔަ އަންގާރަ ދުވަހު އޭޑީކޭއަށް ގެންދިޔައިރު އޭނާގެ ހާލު ސީރިއަސް ކަމުން ފުރާނަ ސަލާމަތް ކުރެވޭނީ ހިތުގެ ބައިޕާސް އޮޕަރޭޝަނެއް ކޮށްގެން ކަމަށް ޑޮކްޓަރުން ލަފާ ދެއްވުމުން އިއްޔެގެ ވަގުތެއްގަ އެވެ.
ބައިޕާސް އޮޕަރޭޝަން ކޮށްފައިވާ ގައިދީގެ ހާލު އަންނަނީ ރަނގަޅުވަމުން ކަމަށް މޯލްޑިވްސް ކަރެކްޝަނަލް ސާވިސްގެ އިންފޮމޭޝަން އޮފިސަރު ދިވެހި އޮންލައިން ނޫސް ވީނިއުސް އަށް މައުލޫމާތު ދެއްވާފައިވާ ކަމަށް އެ ނޫހުން ރިޕޯޓް ކުރެއެވެ. މިވަގުތު އޭނާ ބާއްވާފައި އޮތީ އޭޑީކޭ ހޮސްޕިޓަލުގެ އައިސީޔޫގައެވެ.
ބައިޕާސް އޮޕަރޭޝަނަކީ ހިތް ހުއްޓުމުގެ ނުރައްކާ ބޮޑު ކަމަށް ޑޮކްޓަރުން ލަފާ ދޭ މީހުން ކުރަމުންދާ ވަރަށް ނާޒުކު އޮޕަރޭޝަނެކެވެ. މި އޮޕަރޭޝަން ކުރަނީ ހަށިގަނޑުގެ އެހެން ގުނަވަންތަކުން ނާރުތައް ނަގައި ހިތުގެ ނާރުތައް ބަދަލުކުރުމަށެވެ.
ސަރުކާރުގެ އެންމެ ބޮޑު ހޮސްޕިޓަލް އައިޖީއެމްއެޗްގައި ހިތުގެ ބަލިތަކަށް ހާއްސަ ރާއްޖޭގެ ފުރަތަމަ ކެތު ލެބް 2016 ވަނަ އަހަރުގެ ޖުލައި މަހުގެ އެއްވަނަ ދުވަހު ހުޅުވާފައިވާއިރު އޭޑީކޭގައި ޒަމާނީ ކެތު ލެބެއް ހުޅުވީ މިއަަހަރުގެ މާޗް 15 ވަނަ ދުވަހު އެވެ. މިއީ އެ ހޮސްޕިޓަލުން ހޯދި ވަރަށް ބޮޑު ކުރިއެރުމެކެވެ.