ޞިއްޙީ ޚިދްމަތް ފޯރުވައިދޭ ތަންތަނުގައި މަސައްކަތް ކުރައްވާ ޑޮކްޓަރުންގެ މުސާރަ މުރާޖަޢާ ކުރައްވައި، އާ އޮނިގަނޑެއް އެކުލަވައިލެއްވުމަށް ވަޒީރުންގެ މަޖިލީހުން ރައީސަށް ލަފާ އަރުއްވައިފި އެވެ.
ރައީސަށް މިގޮތަށް ލަފާ އެރުއްވީ، އިއްޔެ ބޭއްވެވި އެ މަޖިލީހުގެ ޖަލްސާގައި، ޑޮކްޓަރުންގެ މުސާރަ މުރާޖަޢާ ކުރެއްވުމާ ބެހޭ ގޮތުން މިނިސްޓްރީ އޮފް ހެލްތުން ހުށަހެޅުއްވި ކަރުދާހެއްގެ މައްޗަށް މެންބަރުން މަޝްވަރާ ކުރެއްވުމަށް ފަހު ގަ އެވެ.
ޑޮކްޓަރުންގެ މުސާރައިގެ އާ އޮނިގަނޑު އެކުލަވައި ލެއްވުމަށް ފަހު، 2014 ވަނަ އަހަރަށް ލަފާކުރާ ދައުލަތުގެ ބަޖެޓް އެކުލަވައިލައްވާ އިރު، މިކަމަށް ބޭނުންވާ ފައިސާ ބަޖެޓްގައި ހިމެނުއްވުމަށާއި އަދި 1 ޖަނަވަރީ 2014 އިން ފެށިގެން މި އޮނިގަނޑު ތަންފީޛު ކުރައްވާ ގޮތަށް ހަމަޖެއްސެވުމަށް ވެސް ވަޒީރުންގެ މަޖިލީހުގެ މިއަދުގެ ޖަލްސާއިން ރައީސަށް ލަފާ އެރުއްވި އެވެ.
ވަޒީރުންގެ މަޖިލީހުގެ ޖަލްސާގައި ޑޮކްޓަރުންގެ މުސާރައިގެ އޮނިގަނޑު މުރާޖަޢާ ކުރައްވަން ނިންމެވީ، އެތެރެވަރީގެ ޤައުމުތަކުން ރާއްޖެ އަށް ރަނގަޅު ފެންވަރުގެ ޑޮކްޓަރުން ހޯދުމުގައި ދިމާވާ ދަތިތަކާ ބެހޭ ގޮތުން މަޝްވަރާ ކުރެއްވުމަށް ފަހުގަ އެވެ.
ފެންވަރު ރަނގަޅު ޑޮކްޓަރުން ނެތުމުގެ ސަބަބުން ދިމާވާ ދަތިތަކަށް ޙައްލެއް ހޯއްދެވޭނީ، ޑޮކްޓަރުންގެ މުސާރަ އަށް ހެޔޮ ބަދަލެއް ގެންނަވައިގެން ކަމުގައި މެންބަރުން ވިދާޅުވި އެވެ.
ރާއްޖެ އަށް ޑޮކްޓަރުން ގެނައުމުގައި، ޞިއްޙީ ދާއިރާގައި ޑޮކްޓަރުންނަށް މިހާރު ދެއްވަމުން ގެންދަވާ މުސާރައިގައި، ފެންވަރު ރަނގަޅު ޑޮކްޓަރުން، އެތެރެވަރީގެ ޤައުމުތަކުން ލިބުމުގައި ދަތިތަކެއް ހުރިކަންވެސް މެންބަރުން ފާހަގަ ކުރެއްވިއެ ވެ.
އަދި ރާއްޖޭގެ ޞިއްޙީ ދާއިރާ އިތުރަށް ތަރައްޤީ ކުރުމަށްޓަކައި ކުރެއްވެން ހުރި ކަންތައްތަކާއި، އެޅުއްވެން ހުރި ފިޔަވަޅުތަކާ ބެހޭ ގޮތުން ވެސް ވަޒީރުންގެ މަޖިލީހުގެ މިއަދުގެ ޖަލްސާގައި މެންބަރުން މަޝްވަރާ ކުރެއްވި އެވެ.