އައްޑޫ ސިޓީގެ ގުޅިފައިވާ އަވަށްތަކުގައި މިއަދު ބާއްވާ ވެހިކަލް ބުރު ބޭއްވުމުގެ ފުރުސަތު ދޭނެ ކަމަށް ފުލުހުން ބުނެފިއެވެ.
އައްޑޫގައި ހުންނަވާ ފުލުހުންގެ އިސްވެރިޔަކު 'އައްޑޫލައިވް' އަށް މައުލޫމާތު ދެމުން ބުނި ގޮތުގައި މިއަދުގެ ވެހިކަލް ބުރު ސުލްޙަވެރިކަމާއި އެކު ކުރިއަށް ގެންދާ ނަމަ ވެހިކަލް ބުރު ބޭއްވުމުގެ ފުރުސަތު ފުލުހުން ދޭނެ ކަމަށެވެ.
އެހެން ނަމަވެސް ޕޮލިސް ސްޓޭޝަންތައް ހިމެނޭ ސަރަހައްދާއި ބައެއް އޮފީސްތައް ހިމެނޭ ސަރަހައްދުތަކުން ވެހިކަލް ބުރު ކުރިއަށް ނުގެންދެވޭނެ ކަމަށް ފުލުހުން ބުނެއެވެ.
ގުޅިފައިވާ ސިޔާސީ ޕާޓީތަކަށް ތާއީދުކުރާ ފަރާތްތަކުން ބާއްވާ "ޖަޒީރާ" ވެހިކަލް ބުރު ފެށުމަށް ހަމަޖެހިފައިވަނީ، ސ.ހިތަދޫ އެމްޑީޕީ ހަރުގެ ސަރަހައްދުންނެވެ.
މަރަދޫ އަދި ފޭދޫ އަވަށުން ވެހިކަލް ބުރުގައި ބައިވެރިވާ ފަރާތްތަކުން ވެހިކަލް ބުރުގައި ބައިވެރިވުމަށް ހިތަދޫއަށް ދާ ގޮތަށެވެ.
"ޖަޒީރާ" ވެހިކަލް ބުރުގަައި ބައިވެރިވާ ފަރާތްތަކުން ހެލްމެޓް އެޅުއްވުމަށާއި އެއްގަމު ދަތުރުފަތުރުގެ ގާނޫނަށް އަހުލުވެރި ވުމަށް ވެހިކަލް ބުރު އިންތިޒާމް ކުރާ ފަރާތުން އެދެއެވެ.