އައްޑޫ ސިޓީގެ ގުޅިފައިވާ އަވަށްތަކުގައި އިދިކޮޅު ސިޔާސީ ޕާޓީތަކަށް ތާއީދު ކުރާ ފަރާތްތަކުން "ޖަޒީރާ ވެހިކަލް ބުރު" ނަމުގައި ބޮޑު ވެހިކަލެއް ބުރެއް ބާއްވައިފިއެވެ.
ފޭދޫ އާއި މަރަދޫ އާއި މަރަދޫފޭދޫ އަދި ހިތަދޫ އިން ގިނަ އަދަދެއްގެ މީހުން ބައިވެރިވި މި ވެހިކަލް ބުރު ފެށީ ހިތަދޫގައި ހުންނަ އެމްޑީޕީ އޮފީސް ކުރިމަތިންނެވެ.
ވެހިކަލް ބުރު ކުރިއަށް ދިޔައިރު، ރައީސް އަބްދުﷲ ޔާމީންގެ ވެރިކަން ބަދަލުކުރަން ގޮވާލައި އެމްޑީޕީގެ ބައެއް އެކްޓިވިސްޓުން ވަނީ ވާހަކަ ދައްކާފައެވެ.
އިދިކޮޅު ސިޔާސީ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިޙް އަށް ތާޢީދުކޮށް ލިޔެފައިވާ ބެނާތައް ފެނިގެން ދިޔަ މި ވެހިކަލް ބުރުގައި އެމްޑީޕީ، އަދާލަތު ޕާޓީ، ޖުމްހޫރީ ޕާޓީގެ އިތުރުން ރައީސް މައުމޫނަށް ތާއީދު ކުރާ ފަރާތްތަކުން ވެސް ބައިވެރިވިއެވެ.