ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ)ގެ ވެރިކަމެއްގެ ފުރަތަމަ ދުވަހު، ސިޔާސީ ލީޑަރުން މިނިވަން ކުރައްވާނެ ކަމަށް ވިދާޅުވެއްޖެއެވެ.
އިބޫ މިހެން ވިދާޅުވިއިރު، ރައީސް ނަޝީދު، ޖޭޕީގެ ލީޑަރު ޤާސިމް އިބްރާހިމް، އަދާލަތު ޕާޓީގެ ރައީސް ޝެއިޚް އިމްރާން އަދި ރައީސް މައުމޫންގެ މައްޗަށް ވެސް ވަނީ ޖަލު ހުކުމްތައް އިއްވާފައެވެ.
އެބޭފުޅުންގެ މައްޗަށް ކޮށްފައިވާ ޝަރީޢަތްތައް ކުރިއަށް ގެންދިޔައީ، ރާއްޖޭގެ ޤާނޫނުތަކާއި އަދި ބައިނަލްއަޤްވާމީ މިންގަނޑުތަކާއި ޚިލާފަށް ކަމަށް ރާއްޖޭގެ އިތުރުން ބައިނަލްއަޤްވާމީ ޖަމިއްޔާތަކުން ވެސް ވަނީ ބުނެފައެވެ.
އިބޫ ވިދާޅުވީ، ވެރިކަމުގެ ފުރަތަމަ ދުވަހު ޖަލު ހުކުމް ތަންފީޒު ކުރަމުންދާ ސިޔާސީ ހަތަރު ލީޑަރުންނާއި ސިޔާސީ ކުށްވެރިންނާއި ނުހައްގުން އަނިޔާ ދެމުންދާ ހުރިހާ އެންމެން މިނިވަން ކުރައްވާނެ ކަމަށެވެ.
މީގެ އިތުރުން އިބޫ ވިދާޅުވި ގޮތުގައި އެބޭފުޅާ ކެމްޕެއިން އަށް ދޮރުން ދޮރަށް ވަޑައިގެންނެވުމުން ރައްޔިތުން ދައްކަމުން ދަނީ އިންސާފު ނެތުމާއި އަނިޔާވެރިކަން ހައްދު ފަހަނަ އަޅާފައިވާ ވާހަކަ ކަމަށެވެ. އެހެންވެ އިދިކޮޅު ކޯލިޝަނުގެ ވެރިކަމެއްގައި އެކަން ހައްލުކުރުމަށް ޚާއްސަ އިސްކަމެއް ދެއްވާނެ ކަމަށް އިބޫ ވިދާޅުވިއެވެ.