ޒިމްބާބުވޭގެ ރިޔާސީ އިންތިޚާބުގައި މަކަރު ހަދާފައިވާ ކަމަށް ބުނެ އެގައުމުގެ އިދިކޮޅު ކޯލިޝަނުގެ ފަރާތުން ކޯޓަށް މައްސަލައެއް ހުށަހަޅައިފިއެވެ.
ޒިމްބާބުވޭގެ އިލްކްޝަންސް ކޮމިޝަނުން އިއުލާންކޮށްފައިވާ ނަތީޖާތަކަށް ބަލާއިރު މިހާރުގެ ރައީސް އެމާސަން މަނަންގާގުވާ އަށް 50.8 ޕަސެންޓް ވޯޓް ލިބިލެއްވި އިރު، އިދިކޮޅު ލީޑަރު ނެލްސަން ކަމީސާއަށް ލިބިވަޑައިގެންފައިވަނީ 44.3 ޕަސެންޓް ވޯޓެވެ.
އިންތިޚާބުގެ ނަތީޖާގެ މައްސަލަ ސުޕްރީމް ކޯޓަށް ހުށަހެޅުމާއި ގުޅިގެން، އެމާސަން މަނަންގާގުވާ މަގާމުގެ ހުވާކުރެއްވުން މިހާރު ވަނީ ފަސްކޮށްފައެވެ.
އިދިކޮޅު ލީޑަރު ކަމީސާ ބުނާ ބައެއް ވޯޓު ފޮށިތަކުގެ ނަތީޖާއަށް އިލެކްޝަންސް ކޮމިޝަނުން ބަދަލު ގެނެސްފައިވާ ކަމަށެވެ. އަދި އެކަމުގެ ހެކި ކޯޓަށް ހުށަހެޅުއްވި ކަމަށް ކަމީސާ ވަނީ ބުނެފައެވެ. ކަމީސާއަށް ތާއީދު ކުރާ ފަރާތްތަކުން ބުނާ ގޮތުގައި އޭނާއަށް 56 އިންސައްތަ ވޯޓު ލިބިވަޑައިގަންނަވާނެއެވެ.
ޒިމްބާބުވޭގެ އިދިކޮޅު ކޯލިޝަނުގެ އޮފިޝަަލު ބުނެފައިވާ ގޮތުގައި އެ ފަރާތްތަކުގެ މަސައްކަތް ހުއްޓާލާނީ ޒިމްބާބުވޭ ސަލާމަތް ކުރުމަށް ފަހު ކަމަށެވެ.
މިއީ ޒިމްބާބުވޭގައި ދިގުމުއްދަތަކަށް ވެރިކަންކުރެއްވި ރޮބާޓް މުގާބޭގެ ވެރިކަން ވެއްޓުނުފަހު ބޭއްވި ފުރަތަމަ އިންތިހާބެވެ. މި އިންތިހާބުގައި މަކަރު ހެދިކަމުގެ ތުހުމަތު ކުރެވިފައިވާއިރު ކޯޓުން މައްސަލަ ނިމޭ ގޮތަކުން، އެ ގައުމުގައި ބޮޑު ހަމަނުޖެހުންތައް ހިނގުމުގެ ފުރުސަތު އޮންނާނެ ކަމަށް ތަޖުރިބާކާރުން ލަފާކުރައްވައެވެ.