މިއަދުން ފެށިގެން ހަފްތާއެއްގެ މުއްދަތަށް ކްރިމިނަލް ކޯޓުން ތާވަލް ކޮށްފައި ހުރި ހުރިހާ ޝަރީޢާތުގެ އަޑުއެހުމެއް އެ ކޯޓުން ކެންސަލް ކޮށްފިއެވެ.
ކްރިމިނަލް ކޯޓުގެ ޝަރީޢަތްތައް ކެންސަލްކުރިކަން އެ ކޯޓުގެ އޮފިޝަލަކު ވަނީ 'އައްޑޫލައިވް' އަށް ކަށަވަރުކޮށްދީފައެވެ.
ކްރިމިނަލް ކޯޓުގެ ޝަރީޢަތްތައް ކެންސަލްކުރީ، ޖިނާއީ އިޖްރާއާތުގެ ގާނޫނުގެ ދަށުން ޖިނާޢީ ޝަރީއަތް ކުރުމާ ގުޅޭ ގޮތުން ސުޕްރީމް ކޯޓުން އެކުލަވާލާފައިވާ ގަވާއިދަށް ރަނގަޅަށް އަހުލުވެރިވުމަށް ކަމަށް އޮފިޝަލް ވިދާޅުވިއެވެ.
ޖުމްލަ 17 ބާބުގެ މައްޗަށް އެކުލެވޭ ގަވާއިދުގައި މައިގަނޑު ގޮތެއްގައި ހިމެނެނީ ޖިނާއީ މައްސަލަތައް ކޯޓުތަކަށް ހުށަހެޅުމާއި ބަލައިގަތުމާއި ޝަރީއަތް ހިންގަންޖެހޭ އުސޫލުތަކާއި އަދި ބަންދާ މެދު ގޮތެއް ނިންމުމުގައި އަމަލުކުރަންޖެހޭ އުސޫލުތަކެވެ.
މީގެ އިތުރުން ވެސް ކަފާލާތުގައި ބަންދުން ދޫކުރުމާއި ހެބިއަސް ކޯޕަސްގެ މައްސަލަތަކުގައި އަމަލު ކުރަންޖެހޭ އުސޫލުތަކާއި މީހުން ކޯޓަށް ހާޒިރު ކުރުމުގައި އަމަލު ކުރަންޖެހޭ އުސޫލުތައް ވެސް ހިމެނެ އެވެ.
ޖިނާޢީ ޝަރީއަތް ކުރުމާ ގުޅޭ ގޮތުން ސުޕްރީމް ކޯޓުން އެކުލަވާލާފައިވާ ގަވާއިދުގެ ދަށުން ކޯޓު އަމުރު ނެރޭނެ ފަނޑިޔާރުން ކަނޑައަޅާނީ ސުޕްރީމް ކޯޓުންނެވެ.