އިނގިރޭސި ޕްރިމިއާ ލީގުގައި ގައި އިއްޔެ ކުޅުނު ފުރަތަމަ މެޗުގައި ވެސްޓްހޭމް ޔުނައިޓެޑް އަތުން ލިވަޕޫލުން ބޮޑު މޮޅެއް ހޯދައިފިއެވެ.
އަމިއްލަ ދަނޑުގައި ވެސްޓްހޭމް ޔުނައިޓެޑް އަތުން ލިވަޕޫލް 4-0 އިން މޮޅުވިއިރު، ސެނެގާލްގެ ސަޑިއޯ މާނޭ ދެލަނޑު ކާމިޔާބުކުރިއިރު އަނެއް ދެލަނޑު ޖަހައިދިނީ މުހައްމަދު ސަލާހު އާއި ޑެނިއަލް ސްޓަރިޖް އެވެ.
ލިވަޕޫލްގެ އެންފީލްޑްގައި ކުޅުނު މި މެޗުގެ 19 ވަނަ މިނެޓުގައި އެޓީމަށް ލީޑް ނަގައިދިނީ މިސްރުގެ މުހައްމަދު ސަލާހު އެވެ. މިއީ އެޓީމަށް ކުޅޭ ސްކޮޓްލެންޑްގެ ފުލްބެކް އެންޑްރޫ ރޮބަޓްސަން ނަގައިދިން ހުރަހަކުން ލިބުނު ބޯޅައަކުން ސަލާހް ކާމިޔާބުކުރި ގޯލެކެވެ.
މެޗުގެ 27 ވަނަ މިނެޓުގައި ވެސްޓްހޭމްގެ ފަރާތުން ފެނުނު ފުރަތަމަ ނުރައްކާތެރި ހަމަލާ ފަބިއަން ބަލްބުއެނާ އަށް ލިބިގެންދިޔައިރު އޭނާ ބޮލުން ފޮނުވާލި ބޯޅަ ލިވަޕޫލްގެ ގޯލްކީޕަރު އެލިސަން ބެކާ ވަނީ މަތަކޮށްފައެވެ.
ފުރަތަމަ ހާފުގެ އިތުރު ވަގުތުގެ ދެވަނަ މިނެޓުގައި ލިވަޕޫލްގެ ޖޭމްސް މިލްނާ ދިން ބޯޅައަކުން ސަޑިއޯ މާނޭ ވަނީ އެޓީމުގެ ލީޑް ފުޅާކޮށްދީފައެވެ.
އޭގެފަހުން، ދެވަނަ ހާފު ފެށިގެން 8 ވަނަ މިނެޓުގައި މާނޭ ވަނީ އިތުރު ލަނޑެއްޖަހައި މެޗުގެ ނަތީޖާ 3-0 އަށް ބަދަލުކޮށްލާފައެވެ. މިއީ އެޓީމުގެ ރޮބާޓޯ ފިރްމީނޯ ދިން ބޯޅައަކުން އޭނާ ކާމިޔާބުކުރި ގޯލެކެވެ.
ދެވަނަ ހާފުގައި ކުޅެން ނިކުތް އިނގިރޭސި ފޯވާޑް ޑެނިއަލް ސްޓަރިޖް ވަނީ މެޗު ނިމެން ދެމިނެޓަށްވެފައިވަނިކޮށް ލިވަޕޫލްގެ ހަތަރުވަނަ ލަނޑުޖަހައިދީފައެވެ.
މިއީ ޕްރިމިއާ ލީގުގެ ތާރީޚުގައި ލިވަޕޫލުން ކާމިޔާބުކުރި 500 ވަނަ މެޗެވެ. މީގެއިތުރުން، މިއީ 1932 ވަނަ އަހަރުގެ ފަހުން ސީޒަނުގެ ފުރަތަމަ މެޗުގައި އެޓީމުން އަމިއްލަ ދަނޑުގައި ކުޅެ އެންމެ ތަފާތު ބޮޑު ނަތީޖާއަކުން މޮޅުވި މެޗެވެ.
ޕްރިމިއާ ލީގުގައި އިއްޔެ ކުޅުނު އަނެއް މެޗުގައި ބާންލޭ އާއި ސައުތުހެމްޕްޓަން ބައްދަލުކުރިމެޗު ނިމުނީ ދެޓީމަށް ލަނޑެއްނުޖެހި އެއްވަރުވެގެންނެވެ.