އައްޑޫ ސިޓީ އަށް ތަރައްޤީ ގެނެވެން އޮތް ހަމައެކަނި ގޮތަކީ، ރިޔާސީ އިންތިޚާބުގައި ރައީސް އަބްދުﷲ ޔާމީން ބަލިކޮށްގެން ކަމަށް އައްޑޫ ސިޓީގެ ޑެޕިއުޓީ މޭޔަރު މުހައްމަދު ޔަސްރިފް ވިދާޅުވެއްޖެއެވެ.
ޔަސްރިފް މިހެން ވިދާޅުވީ، މިރޭ އިދިކޮޅު ފަރާތްތަކުން ހިތަދޫގައި ބާއްވަމުން އަންނަ ކަންމަތީ ބައްދަލުވުމުގައި ވާހަކަ ދައްކަވަމުންނެވެ.
ޔަސްރިފް ވިދާޅުވި ގޮތުގައި އައްޑޫގެ ރައްޔިތުން އެދޭފަދަ ތަރައްޤީ ގެންނާން ގޮތް އެނގިވަޑައިގަންނަވާ ކަމަށާއި އެކަން ކުރެވޭނީ ލާމަރުކަޒީ ނިޒާމެއްގެ ތެރެއިނެވެ.
އެހެން ނަމަވެސް ރައީސް ޔާމީންގެ ސަރުކާރުން ލާމަރުކަޒީ ނިޒާމު "ނަގާލާފައިވާ" ކަމަށާއި އޭގެ ސަބަބުން އައްޑޫގެ ތަރައްޤީއަށް ހުރަސްތަކެއް އެޅިފައިވާކަންޔަސްރިފް ފާހަގަކުރެއްވިއެވެ.
އިދިކޮޅު ކޯލިޝަނުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) ވަނީ، ލާމަރުކަޒީ ނިޒާމު އަނބުރާ ގެނެސްދެއްވާނެ ކަމަށް ވައުދުވެވަޑައިގެންފައެވެ. އެކަމަށް އިޝާރާތް ކުރައްވައި ޔަސްރިފް ވަނީ އައްޑޫގެ ހުރިހާ ރައްޔިތުން ރިޔާސީ އިންތިޚާބުގައި އިބޫއަށް ވޯޓު ދިނުމަށް އެދިވަޑައިގެންފައެވެ.