އައްޑޫ ސިޓީގައި ޤާއިމްކޮށްފައިވާ ހައުސިން މިނިސްޓްރީގެ ޑިޕާޓްމަންޓުގައި ތިބ ވެރިންގެ ފަރާތުން ފެންނަނީ ބިމެއް ނުލިބިގެން ނުވަތަ ކޮންމެވެސް މީހަކަށް ބިމެއް ނުދެވިގެން އުޅޭ މަންޒަރު ކަމަށް، ޖުމްހޫރީ ޕާޓީގެ އައްޑޫ ގޮފީގެ ރައީސް ހުސައިން ސޯލިހް ވިދާޅުވެއްޖެއެވެ.
ހުސައިން ސޯލިހް މިހެން ވިދާޅުވީ، މިރޭ ހިތަދޫގައި އިދިކޮޅު ފަރާތްތަކުން ބާޢްވަމުން ގެންދާ ކަންމަތީ ބައްދަލުުވުމުގައި ވާހަކަ ދައްކަވަމުންނެވެ.
ހުސައިން މިގޮތަށް ވިދާޅުވި އިރު އައްޑޫގެ ގިނަ ބަޔަކު ދަނީ، ހިތަދޫން މިހާރު ބިން ދޫކުރުމުގެ ކަންތަކުގައި ހައުސިންގެ ވެރިން "އަޑިނޭނގޭ" ކަންތަކެއް ހިންގަމުންދާ ކަމަށް ތުހުމަތު ކުރަމުންނެވެ.
އެފަދަ ތުހުމަތުތައް ކުރަން ފަށާފައިވަނީ، ބައެއް ފަރާތްތަކަށް ދޫކޮށްފައިވާ ބިންތައް އެހެން ސަރަހައްދުތަކަށް ބަދަލުކުރުން ފަދަ ކަންތައް ހައުސިން އައްޑޫ ޑިޕާޓްމަންޓުން ކުރަމުން ގެންދާތީއެވެ.
ގިނަ އަދަދެއްގެ ރައްޔިތުން ބައިވެރިވި ކަންމަތީ ބައްދަލުވުމުގައި ހުސައިން ސޯލިހް ވަނީ ހިތަދޫގެ ނަރުދަމާގެ މަސައްކަތް ވެސް ފެންވަރު ދަށްކޮށް ކުރިއަށް ގެންދާތީ އެކަމަށް ވަރަށް ބޮޑަށް ފާޑުވިދާޅުވެފައެވެ.
ހުސައިން ވިދާޅުވީ ފަރުވާކުޑަކޮށް ނަރުދަމާ އެޅުމުގެ މަސައްކަތް ސަރުކާރުން ކުރުމުގެ ސަބަބުން އައްޑޫ ރައްޔިތުންނަށް ފަހުން ބޮޑެތި ތުރާތަކާއި ކުރިމަތިލާން ޖެހިދާނެ ކަމަށެވެ.