ދިވެހިރާއްޖޭގައި އިސްލާމްދީން ދެމި އޮންނާނީ ރައީސް އަބްދުﷲ ޔާމީން އިތުރު ދައުރަކަށް އިންތިޚާބުކޮށްގެން ކަމަށް އެމަނިކުފާނުގެ ރަނިންމޭޓް ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ޝަހީމް މިހެން ވިދާޅުވެފައި ވަނީ، މިރޭ ފުވައްމުލަކު ދޫޑިގަން އަވަށުގެ ޕީޕީއެމްގެ ސަޕޯޓަރުންތަކަކާ ބައްދަލު ކުރައްވައި ވާހަކަ ދައްކަވަމުންނެވެ.
ރައީސް ޔާމީން "އިސްލާމްދީން ހިމާޔަތް ކުރައްވާނެ" ކަމަށް ވިދާޅުވެ ޝަހީމް ވަނީ އެމަނިކުފާނަށް ވަރަށް ބޮޑަށް ތައުރީފް ކުރައްވާފައެވެ.
ޝަހީމް ވިދާޅުވި ގޮތުގައި، ރިޔާސީ އިންތިޚާބުގައި ރައީސް ޔާމީން ކާމިޔާބު ހޯއްދަވައިފި ނަމަ އެއީ އިސްލާމް ދީނަށް ކުރިމަތިވެފައިވާ ގޮންޖެހުންތަކުން ސަލާމަތް ކުރުމަށް ލިބޭ ފުރުސަތަކަށް ވެގެން ދާނެ ކަމަށެވެ.
އަދި ހަމަ އެހެންމެރައީސް ޔާމީނަށް އިންތިޚާބު ކާމިޔާބު ނުކުރެއްވިއްޖެ ނަމަ ގައުމު ވެއްޓިގެން ދާނީ ވަރަށް ވެސް ބޮޑު އަނދަވަޅަކަށް ކަމަށް ވެސް ޝަހީމް ވަނީ ވިދާޅުވެފައެވެ.