ރައީސް އަބްދުﷲ ޔާމީންގެ ސަރުކާރުން ރައްޔިތުންގެ މަޖިލީހުގެ "ސުޕަ" މެޖޯރިޓީއާ އެކު ވެރިކަމަށް ވަޑައިގެން ހިންގަވާފައި ވަނީ "ސުޕަ" ވައްކަމާއި "ސުޕަ" ކޮރަޕްޝަން ކަމަށް އައްޑޫ މީދޫ ދާއިރާގެ މެންބަރު ރޮޒެއިނާ އާދަމް (ރޮޒޭ) ވިދާޅުވެއްޖެ އެވެ.
އޭނާ މިހެން ވިދާޅުވީ ގުޅިފައިވާ ސިޔާސީ ޕާޓީތަކުން، ރޭ މަކުނުދޫގައި ބޭއްވި ޖަލްސާގައި ވާހަކަ ދައްކަވަމުންނެވެ.
ބެލެވޭ ގޮތުގައި ރޮޒޭ "ސުޕަރ" ކޮރަޕްޝަނާއި ވައްކަމުގެ ގޮތުގައި އިޝާރާތް ކުރެއްވީ މޯލްޑިވްސް މާރކެޓިންގ އެންޑް ޕީއާރް ކޯޕަރޭޝަން (އެމް.އެމް.ޕީ.އާރް.ސީ)ގެ ޚިޔާނާތުގެ މައްސަލައަށެވެ. ސިޔާސީ ފަރާތްތަކުން ބުނާ ގޮތުގައި އެއީ ރާއްޖޭގައި މިހާތަނަށް ހިންގި އެންމެ ބޮޑު ޚިޔާނާތެވެ.
ސަރުކާރަށް ވަރަށް ބޮޑަށް ފާޑުވިދާޅުވެ ވާހަކަ ދައްކަވަމުން ރޮޒޭ ވިދާޅުވީ، އިދިކޮޅު ކޯލިޝަނުގެ ކެންޑިޑޭޓޭ ކިޔައިގެން ކޮރަޕްޝަނުގެ ވާހަކައެއް ނުދެއްކޭނެ ކަމަށެވެ.
އޭނާ ވިދާޅުވީ އިބޫއަކީ ކޮރަޕްޝަނާއި ވައްކަމުގެ އަމަލުތަކެއް ހިންގަވާނެ ބޭފުޅެއް ނޫންކަމަށެވެ.
އަދި އިބޫގެ ސަރުކާރެއްގައި ޕްރޮޖެކްޓްތައް ސަރުކާރުން ހަވާލުކުރާނީ ހަމަ އަގުގައިކަމަށާއި، ހުޅުވާލެވިފައިވާ ބިޑިންގ ޕްރޮސެސްއެއްގެ ތެރެއިންކަމަށް ވިދާޅުވުމުން އެވާހަކަ ޤަބޫލުކުރައްވާ ކަމަށެވެ.