ސްޕެއިނުގެ ސެވިއްޔާ އަށް ކުޅެމުންދިޔަ ފްރާންސްގެ ޑިފެންސިވް މިޑްފީލްޑަރު ސްޓީވެން އެންޒޮންޒީ އިޓަލީގެ އޭއެސް ރޯމާ އަށް ބަދަލުވެއްޖެއެވެ.
އުމުރުން 29 އަހަރުގެ އެންޒޮންޒީ ވަނީ ރޯމާއާއިއެކު ހަތަރު އަހަރު ދުވަހުގެ އެއްބަސްވުމެއްގައި ސޮއިކޮށްފައެވެ.
މީޑިއާ ރިޕޯޓްތަކުން ބުނާގޮތުގައި، އެންޒޮންޒީ ރޯމާ އަށް ވިއްކާލަން ސެވިއްޔާ އިން އެއްބަސްވީ 23.7 މިލިއަން ޕައުންޑްގެ ޓްރާންްސްފާ ފީއަކަށެވެ. ބެލެވޭގޮތުގައި، ބޯނަހާއިއެކު އޭނާގެ ޓްރާންސްފާ ފީ 27.3 މިލިއަން ޕައުންޑަށް އަރާނެކަމަށްވެއެވެ.
ފްރާންސާއި އެކު ނިމިދިޔަ ވޯލްޑްކަޕް ކާމިޔާބުކުރި އެންޒޮންޒީ ވަނީ މީގެކުރީން، އިނގިރޭސި ކްލަބު ބްލެކްބާން ރޯވާސް އާއި ސްޓޯކް ސިޓީއަށްވެސް ކުޅެފައެވެ.
އޭނާ ވަނީ ސެވިއްޔާގައި ހޭދަކުރީ ތިން އަހަރުގައި އެޓީމާއިއެކު ޔޫއެފާ ޔޫރޮޕާ ލީގު ތަށި އެއްފަހަރު ކާމިޔާބުކޮށްފައެވެ.
މިފަހަރުގެ ޓްރާންސްފާ ބާޒާރުގެ އިތުރު ޚަބަރުތަކަށް ބަލާއިރު، ލޯނު އެއްބަސްވުމެއްގެދަށުން ޗެލްސީގެ މިޑްފީލްޑަރު ޓިމެއޯ ބަކަޔޯކޯ، އޭސީ މިލާނަށް ބަދަލުވިއިރު ނިކޮލާ ކަލިނިޗް ވަނީ މިލާން ދޫކޮށް އެތުލެޓިކޯ މެޑްރިޑަށް ބަދަލުވެފައެވެ. ޕޯޗުގަލްގެ ޒުވާން ފޯވާޑް އަންދްރޭ ސިލްވާ ވަނީ ލޯން އެއްބަސްވުމެއްގެދަށުން ސެވިއްޔާ އަށް ބަދަލުވެފައެވެ. މީގެއިތުރުން، މޮނާކޯއަށް ކުޅެމުން އައި ކެއިޓާ ބަލްޑޭ ވަނީ ލޯނު އެއްބަސްވުމެއްގެދަށުން އިޓަލީގެ އިންޓަ މިލާނަށް ބަދަލުވެފައެވެ.