ޔުވެންޓަސް އަށް ކުޅެމުންއައި އިޓަލީގެ މިޑްފީލްޑަރު ކްލައުޑިއޯ މާކީޒިއޯ 25 އަހަރަށްފަހު އެ ކްލަބު ދޫކޮށްލައިފި އެވެ.
ޔުވެންޓަސްއާއެކު މާކީޒިއޯ ހަދާފައިވާ އެއްބަސްވުން ހަމަވާން އަދި ދެއަހަރު ދުވަސް އޮތް ނަމަވެސް، ކުޅުންތެރިޔާއާއި ކުލަބުން ވަނީ ކޮންޓްރެކްޓް އުވާލަން އެއްބަސްވެފައެވެ.
ޔުވެންޓަސްގެ އެކަޑަމީއާ މާކީޒިއޯ ގުޅުނީ 1993 ވަނަ އަހަރުގައެވެ. ޔުވެންޓަސްގެ ސީނިއާ ޓީމާއެކު އޭނާ ފުރަތަމަ ފެނިގެންދިޔައީ 2005 ވަނަ އަހަރުގައެވެ. އެ ކްލަބާއެކު އޭނާ ވަނީ 7 ފަހަރު އިޓާލިއަން ލީގު، ހަތަރު ފަހަރު އިޓާލިއަން ކަޕް، ތިން ފަހަރު އިޓާލިއަން ސުޕަ ކަޕް ހޯދުމުގެ އިތުރުން އެއްފަހަރު އިޓާލިއަން ސެރިއޭ ބީ ގެ ތަށި ކާމިޔާބުކޮށްފައެވެ.
އުމުރުން 32 އަހަރުގެ މާކީޒިއޯ ވަނީ ޔުވެންޓަސް އާއެކު ހޭދަކުރީ 12 ސީޒަނުގައި ކުޅުނު 389 މެޗުގައި ޖުމްލަ 37 ލަނޑު ކާމިޔާބުކޮށް އިތުރު 42 ގޯލް ޖެހުމަށް އެހީތެރިވެދީފައެވެ. ޔުވެންޓަސް އަށް ކުޅެމުން 2007 ވަނަ އަހަރު އޭނާ ވަނީ ލޯނު އެއްބަސްވުމެއްގެ ދަށުން އެއް ސީޒަނުގައި އެމްޕޯލީއަށް ވެސް ކުޅެފައެވެ. މީގެއިތުރުން، އޭނާ ވަނީ 2009 ވަނަ އަހަރުން ފެށިގެން މިހާތަނަށް އައިއިރު އިޓަލީގެ ޤައުމީޓީމަށް ކުޅުނު 55 މެޗުގައި 5 ގޯލް ކާމިޔާބުކޮށްދީފައެވެ.
ޓިއުރިން އަށް އުފަން މާކީޒިއޯ އަށް ވަނީ 2016 ވަނަ އަހަރުގައި ފައިގެ ކަކުލު ހުޅަށް ލިބުނު ސީރިއަސް އަނިޔާއެއްގެ ސަބަބުން ހަމަސް ދުވަހަށް ކުޅުމާއި ދުރަށް ދާން ޖެހިފައެވެ. އޭގެފަހުން، ނިމިދިޔަ ސީޒަނުގައިވެސް އަނިޔާގެ ބައެއް މައްސަލަތަކުގެ ސަބަބުން ބައެއް މެޗުތައް ގެއްލިފައިވެއެވެ. އެގޮތުން، މިދިޔަ ސީޒަނުގައި އޭނާ އަށް ކުޅެވޭވަރުވީ ޖުމްލަ 20 މެޗެވެ.
ޔުވެންޓަސް ދޫކޮށްލުމަށްފަހު މާކީޒިއޯ އެހެން ކްލަބަކާއި ގުޅޭނެ ކަމަށް ބެލެވޭއިރު ޔުވެންޓަސް އިން ބުނެފައިވަނީ އޭނާ ކޮންމެ ޓީމަކާއި ގުޅުނަސް ކްލަބުން މަރުހަބާ ކިޔާނެ ކަމަށާއި ވަރަށް ގާތުން އެކަންތައް ބަލާނެކަމަށާއި އެއީ އެކްލަބަށް ލިބޭނެ ވަރަށް ބޮޑު އުފަލެއް ކަމަށްވެސް ޔުވެންޓަސް އިން އެކްލަބުގެ ރަސްމީ ވެބްސައިޓުގައި ނެރެފައިވާ ބަޔާނުގައިވެއެވެ.