ކްރޮއޭޝިއާގެ މިޑްފީލްޑަރު ލޫކަ މޮޑްރިޗަށް ނުފޫޒު ފޯރުވައިގެން އޭނާ އިންޓަ މިލާނަށް ގެންދަން މަސައްކަތްކުރާ ކަމަށް ބުނެ ރެއާލް މެޑްރިޑުން އެ މައްސަލަ ފީފާ އަށް ހުށަހަޅައިފިއެވެ.
އެންމެ ފަހުގެ ވޯލްޑްކަޕްގެ ފައިނަލަށް ކްރޮއޭޝިއާ ގެންގޮސްދިނުމުގައި މުހިއްމު ދައުރެއް އަދާކޮށް އެމުބާރާތުގެ އެންމެ މޮޅު ކުޅުންތެރިޔާގެ މަޤާމް ހޯދި ލޫކާ މޮޑްރިޗް ގެންދިއުމަށް އިޓަލީގެ އިންޓަ އިން މަސައްކަތްކުރާ ކަމަށް މީޑިއާގައި ވާހަކަދެކެވެމުންދާތާ ދުވަސްކޮޅެއް ވެއްޖެއެވެ.
އެހެންނަމަވެސް، ރެއާލުން ފާޅުގައި ވަނީ އޭނާ ވިއްކާލަން ބޭނުންނުވާކަން ހާމަކޮށްފައެވެ. އެގޮތުން، މިދިޔަ މަހު އެކްލަބުގެ ރައީސް ފްލޮރެންޓީނޯ ޕެރޭޒް ދިން އިންޓަވިއުއެއްގައި ބުނެފައިވަނީ މޮޑްރިޗް ގެންދެވޭނެ ހަމައެކަނި ގޮތަކީ އޭނާގެ ރިލީޒް ކްލޯޒް ކަމަށްވާ 750 މިލިއަން ޔޫރޯ (671 މިލިއަން ޕައުންޑް) ދައްކައިގެންކަމަށެވެ.
މިފަހަރުގެ ޓްރާންސްފާ ބާޒާރުގައި، ރެއާލުން ވަނީ އެޓީމުގެ އެންމެ މުހިއްމު ކުޅުންތެރިޔާ ކަމަށްވާ ޕޯޗުގަލްގެ ކްރިސްޓިއާނޯ ރޮނާލްޑޯ 99.2 މިލިއަން ޕައުންޑްގެ ފީ އަކަށް އިޓަލީގެ ޔުވެންޓަސްއަށް ވިއްކާލައިފައެވެ.
އިޓަލީގެ ކްލަބްތަކަށް މިއަދު ޓްރާންސްފާ ބާޒާރު ބަންދުވާއިރު މޮޑްރިޗް ހޯދުމަށް އެންމެފަހު ވަގުތާއި ޖެހެންދެން އިންޓަ އިން މަސައްކަތްކުރާނެ ކަމަށް ބައެއް މީޑިއާ ރިޕޯޓްތައް ބުނެއެވެ.
އުމުރުން 32 އަހަރުގެ މޮޑްރިޗް ރެއާލް އަށް ބަދަލުވީ 2012 ވަނަ އަހަރު އިނގިރޭސި ކްލަބު ޓޮޓެންހަމް ހޮޓްސްޕާ އިންނެވެ. އޭގެފަހުން، ރެއާލްގައި މިހާތަނަށް ހޭދަކުރީ ހަ ސީޒަނުގައި މޮޑްރިޗް ވަނީ ލަލީގާ އެއްފަހަރު ކާމިޔާބުކޮށް ޔޫއެފާ ޗެމްޕިއަންސް ލީގުގެ ތަށި ހަތަރު ފަހަރު ހޯދާފައެވެ.
ދުވަސްތަކަކަށްފަހު އިންޓަ އިން ޔޫއެފާ ޗެމްޕިއަންސް ލީގަށް ކޮލިފައިވުމުން އެޓީމުން ދަނީ ރަނގަޅު ކުޅުންތެރިން ހޯދުމަށް މަސައްކަތްކުރަމުންނެވެ. އެގޮތުން، މިފަހަރުގެ ޓްރާންސްފާ ބާޒާރުގައި އެކުލަބަށް ގެނައި އެންމެ އަގު ބޮޑު ކުޅުންތެރިއަކީ ރޯމާ އިން ގެނައި ބެލްޖިއަމްގެ މިޑްފީލްޑަރު ރަޖާ ނައިންގޮލާން އެވެ.