އިނގިރޭސި ކްލަބު ޗެލްސީއަށް ކުޅޭ ބެލްޖިއަމްގެ ހުނަރުވެރި ކުޅުންތެރިޔާ އެޑެން ހަޒާޑު އެޓީމުގައި މަޑުކުރާނެކަމަށް ކޯޗު މައުރީޒިއޯ ސާރީ ބުނެފިއެވެ.
ޗެލްސީ ދޫކޮށް ރެއާލް މެޑްރިޑަށް ހަޒާޑު ބަދަލުވާނެކަމަށް މީޑިއާގައި ވާހަކަ ދެކެވެން ފެށީ ނިމިދިޔަ ވޯލްޑްކަޕްގެ ތިންވަނަ ހޮވާ މެޗުގައި އިންގްލެންޑާއި ބެލްޖިއަމް ބައްދަލުކުރި މެޗަށްފަހު ދިން އިންޓަވިއުގައި ޗެލްސީގައި ވަރަށް ރަނގަޅު ހަ އަހަރު ހޭދަކުރުމަށްފަހު މިއީ އާ ކަމެއް ތަޖުރިބާކޮށްލަން ރަނގަޅު ދަނޑިވަޅެއް ކަމަށް ހަޒާޑު ބުނުމާއި ގުޅިގެންނެވެ.
އޭގެފަހުން، މީޑިއާގެ ގިނަ ޚަބަރުތަކުގައި ވަނީ ކްރިސްޓިއާނޯ ރޮނާލްޑޯ ނެތްތަން ފޫ ބައްދަން ޗެލްސީގެ އެޑެން ހަޒާޑް ރެއާލް މެޑްރިޑަށް ގެންދާނެކަމަށެވެ. ނަމަވެސް، މިއަދާއި ހަމައަށް އައިއިރުވެސް ރެއާލުން ރަސްމީ ސިފައެއްގައި ހަޒާޑު ހޯދުމަށް ޗެލްސީ އަށް ހުށަހަޅާފައެއްނުވެއެވެ.
ސްޕެއިނުގެ ޓްރާންސްފާ ބާޒާރު މިމަހުގެ 31 ވަނަ ދުވަހު ބަންދުވުމުގެ ކުރީން އުމުރުން 27 އަހަރުގެ ހަޒާޑު ރެއާލަށް ބަދަލުވުމުގެ ފުރުޞަތު އެބައޮތްކަމަށް ބައެއް މީޑިއާ ރިޕޯޓްތަކުގައިވެއެވެ.
އެހެންނަމަވެސް، ޗެލްސީގެ ކޯޗު ސާރީ ބުނެފައިވަނީ ވޭތުވެދިޔަ ދެ ހަފްތާ ތެރޭގައި ހަޒާޑާއި އެކު ދެކެވުނު ވާހަކައިގެ މައްޗަށް ބިނާކޮށް އެއްޗެއް ބުނާ ނަމަ އޭނާ އެކްލަބުގައި މަޑުކުރާނެކަމުގެ ޔަޤީންކަން އެބައޮތްކަމަށެވެ.
"ވޭތުވެދިޔަ 10 ދުވަހުގެތެރޭގައި ހަޒާޑު އާއި ވަރަށް ގިނަ ފަހަރު ވާހަކަ ދެކެވިފައިވާނެ. އެކަމަކު މިހާތަނަށް އެންމެ ފަހަރަކުވެސް އޭނާ މިކްލަބު ދޫކޮށް ދާން ބޭނުންވާކަމަށް ބުނެފައެއް ނެތް. އަހަރެންނަށް ޔަޤީން ހަޒާޑު މިސީޒަނުގައި މިކްލަބުގައި މަޑުކުރާނެކަން." ސާރީ ބުންޏެވެ.
ޗެލްސީއާއިއެކު ހަޒާޑު ހަދާފައިވާ އެއްބަސްވުން ހަމަވާން އަދި ބާކީ ދެއަހަރު އެބައޮތެވެ. އޭނާ ވަނީ 2012 ވަނަ އަހަރު ފްރާންސްގެ ލިއްލޭ އިން ޗެލްސީ އަށް ބަދަލުވެ މިހާތަނަށް އެކްލަބަށް 301 މެޗު ކުޅެ 89 ގޯލް ކާމިޔާބުކޮށް އިތުރު 76 ލަނޑުޖެހުމަށް އެހީތެރިވެދީފައެވެ. މީގެއިތުރުން، އޭނާ ވަނީ ބެލްޖިއަމްގެ ޤައުމީޓީމަށް މިހާތަނަށް ކުޅުނު 92 މެޗުގައި ޖުމްލަ 25 ގޯލް ކާމިޔާބުކޮށްފައެވެ.