އާޖެންޓީނާގެ ކޯޗުކަމުގެ މަޤާމުން ޖޯޖް ސަމްޕައޮލީ ވަކިކުރުމަށްފަހު އެޓީމު ކުޅޭ ފުރަތަމަ މެޗުތަކަށް ވަގުތީ ކޯޗު ލިއޮނަލް ސްކަލޯނީ ސްކޮޑް އިއުލާންކުރިއިރު ކެޕްޓަން ލިއޮނަލް މެސީ އާއި ފޯވާޑް ސާޖިއޯ އަގުއޭރޯ އާއި ގޮންޒާލޯ ހިގުއައިން ނުހިމެނެއެވެ.
އަންނަ ސެޕްޓެންބަރު މަހު ގުއަޓެމާލާ އާއި ކޮލަމްބިއާ އާ ދެކޮޅަށް އާޖެންޓީނާ ކުޅުމަށް ހަމަޖެހިފައިވާ އެކުވެރިކަމުގެ މެޗުތަކަށް ނެގި ސްކޮޑުން މުޅިން އަލަށް 20 ކުޅުންތެރިންނަށް ޖާގަ ދީފައިވާއިރު އޭގެތެރޭގައި އިޓާލިއަން ލީގުގައި ކުޅޭ ދެކުޅުންތެރިން ކަމަށްވާ ލައުޓޭރޯ މާޓިނޭޒްގެ އިތުރުން ޖިއޮވާނީ ސިމިއޯނީ ހިމެނެއެވެ.
އާޖެންޓީނާގެ ކެޕްޓަންކަން ކުރަމުން އަންނަ މެސީ އަށް މިފަހަރު ޖާގަދީފައިނުވަނީ އޭނާގެ އެދުމުގެ މަތީން ކަމަށް މީޑިއާ ރިޕޯޓްތަކުގައިވެއެވެ.
މިފަހަރު ނެގި ސްކޮޑުގައި އާޖެންޓީނާގެ ފޯވާޑްލައިންގައި އެންމެ އިސް ދައުރެއް އަދާކުރާނީ ޕައުލޯ ޑިބާލާ، އެންހެލް ކޮރިއާ، މާޓިނޭޒް، ސިމިއޯނީ އާއި ކްރިސްޓިއަން ޕާވޮން އެވެ.
މީގެއިތުރުން، ނިމިދިޔަ ވޯލްޑްކަޕްގައި ބައިވެރިވި އާޖެންޓީނާގެ ސްކޮޑުން ޖާގަ ނުލިބުނު ކުޅުންތެރިއެއްކަމަށްވާ އިޓަލީގެ އިންޓަ މިލާނަށް ކުޅޭ މައުރޯ އިކާޑީ އަށް މިފަހަރު ފުރުޞަތު ދީފައިވެއެވެ.
އެހެންނަމަވެސް، މިފަހަރު އާކޯޗު ލިއޮނަލް ސްކަލޯނީ އެކުލަވާލި ސްކޮޑުން ޖާގަ ގެއްލުނު ފާހަގަކޮށްލެވޭ ކުޅުންތެރިންގެ ތެރޭގައި ދާދިފަހުން ޔުވެންޓަސް އިން އޭސީ މިލާނަށް ބަދަލުވި ފޯވާޑް ގޮންޒާލޯ ހިގުއައިން އާއި މެންޗެސްޓަރ ސިޓީގެ ހުނަރުވެރި ފޯވާޑް ސާޖިއޯ އަގުއޭރޯގެ އިތުރުން ޕީއެސްޖީއަށް ކުޅޭ އެންހެލް ޑި މާރިއާ ހިމެނެއެވެ.
ނިމިދިޔަ ވޯލްޑްކަޕްގައި ވާދަކުރި އާޖެންޓީނާ ސްކޮޑުގައި ހިމެނުނު 9 ކުޅުންތެރިންނަށް މިފަހަރު އެކުލަވާލި ސްކޮޑުން ޖާގަ ދީފައިވާއިރު އާޖެންޓީނާ ކުޅޭ ފުރަތަމަ މެޗުގައި ސެޕްޓެންބަރު 7 ވަނަ ދުވަހު އެމެރިކާގެ ލޮސް އެންޖެލެސްގައި ގުއަޓެމާލާ އާއި ދެކޮޅަށް ނިކުންނައިރު އޭގެ ހަތަރު ދުވަސްފަހުން އެމެރިކާގެ ނިއު ޖާޒީގައި ނިކުންނާނީ ކޮލަމްބިއާ އާ ދެކޮޅަށެވެ.
އާޖެންޓީނާގެ ސްކޮޑް:
ގޯލްކީޕަރުން: ފްރޭންކޯ އަރްމާނީ (ރިވަޕްލޭޓް)، ޖެރޮނިމޯ ރުލީ (ރެއާލް ސޮސިއެޑާޑް)، ސާޖިއޯ ރޮމޭރޯ (މެންޗެސްޓަރ ޔުނައިޓެޑް).
ޑިފެންޑަރުން: ފަބްރީސިއޯ ބުސްޓޮސް (އިންޑެޕެންޑިއެންޓޭ)، ގެބްރިއެލް މަކާޑޯ (ސެވިއްޔާ)، ޖާމަން ޕެޒެއްލާ (ފިއޮރެންޓީނާ)، ރަމިރޯ ފުނެސް މޯރީ (ވިޔަރެއާލް)، އެލަން ފްރޭންކޯ (އިންޑެޕެންޑިއެންޓޭ)، ނިކޮލަސް ޓަލިއަފްކޯ (އަޔެކްސް)، ވޯލްޓާ ކާނެމަން (ގްރެމިއޯ)، ލިއޮނެލް ޑި ޕްލާސިޑޯ (ލަނުސް)، އެޑުއާޑޯ ސަލްވިއޯ (ބެންފީކާ)، މާކޮސް އަކޫނިއާ (ސްޕޯޓިން ލިޒްބަން).
މިޑްފީލްޑަރުން: ލެއަންޑްރޯ ޕަރެޑެސް (ޒެނިތު)، ސަންޓިއާގޯ އަސްކާސިބަރ (ސްޓުޓްގާޓް)، ރޮޑްރިގޯ ބަޓާލިއާ (ސްޕޯޓިން ލިޒްބަން)، ގޮންޒާލޯ މާޓީނޭޒް (ރިވަޕްލޭޓް)، ޖިއޮވާނީ ލޮ ސެލްސޯ (ޕީއެސްޖީ)، ފްރޭންކޯ ސާވީ (ބެންފީކާ)، މެކްސީ މޭޒާ (އިންޑެޕެންޑިއެންޓޭ)، މަޓިއަސް ވާގަސް (ވެލެސް ސާސްފީލްޑް)، ފްރޭންކޯ ވަޒްކޭޒް (ސެވިއްޔާ)، އެޒެކުއެލް ޕަލާސިއޯސް (ރިވަޕްލޭޓް).
ފޯވާޑުން: އެންހެލް ކޮރިއާ (އެތުލެޓިކޯ މެޑްރިޑް)، ލައުޓޭރޯ މާޓިނޭޒް (އިންޓަ މިލާން)، މައުރޯ އިކާޑީ (އިންޓަ މިލާން)، ޖިއޮވާނީ ސިމިއޯނީ (ފިއޮރެންޓީނާ)، ކްރިސްޓިއަން ޕާވޮން (ބޮކާ ޖޫނިއާސް)، ޕައުލޯ ޑިބާލާ (ޔުވެންޓަސް).