ރާއްޖޭގެ އެންމެ ބޮޑު މުއްސަނދިކަމަކީ އަދި އެންމެ ބޮޑު ރައުސްމާލަކީ، އަޅުގަނޑުމެންގެ ދަރިން ކަމުގައި ރައީސް ޑރ. މުޙަންމަދު ވަޙީދު ހަސަން މަނިކު ވިދާޅުވެއްޖެ އެވެ.
ރައީސް މިހެން ވިދާޅުވީ، ހުޅުމީދޫގައި ހުންނަ ސ. އަތޮޅު މަދްރަސާގައި އޭ ލެވެލަށް ކިޔަވައި ދިނުން އިފްތިތާޙު ކުރެއްވުމަށް، ރޭ އެ މަދްރަސާގައި ބޭއްވުނު ޖަލްސާގައި ވާހަކަފުޅު ދައްކަވަމުންނެވެ.
އޭ ލެވެލަށް ކިޔަވައި ދިނުން އިފްތިތާޙުކޮށް ދެއްވުމަށް ފަހު، ރައީސް ދެއްކެވި ވާހަކަފުޅުގައި، ޤައުމުގެ ތަރައްޤީގައި އަޅުގަނޑުމެންގެ ދަރިން އަދާ ކުރަން ޖެހޭ ދައުރުގެ މައްޗަށް ބައްލަވައިލެއްވި އެވެ. ރައީސް ވިދާޅުވި ގޮތުގައި ޤައުމުގެ ތަރައްޤީގެ މައިގަނޑު މަސައްކަތް ކުރަން ޖެހޭނީ، އަދި އެ ތަރައްޤީ ހިންގާ ބަޔަކަށް ވާން ޖެހޭނީ ވެސް އަޅުގަނޑުމެންގެ ދަރިންނެވެ.
އެހެންވީމާ، އެ ދެވެން ހުރި އެންމެމަތީ ފެންވަރުގެ ތަޢުލީމެއް، ކޮންމެ ކުއްޖަކަށް ވެސް ދޭންޖެހޭ ކަމަށާއި، އެ ތަޢުލީމު ވެސް ދިނުމަށްޓަކައި ކުއްޖާގެ ޞިއްޙަތު ރަނގަޅު ކުރުމަށް ޚާއްޞަ ސަމާލު ކަމެއް ދޭން ޖެހޭ ކަމުގައި ވިދާޅުވި އެވެ.
ރައީސްގެ ވާހަކަފުޅުގައި، މަތީ ޘާނަވީ ތަޢުލީމު ތަޢާރުފް ކުރެއްވުމުގެ މަޤްޞަދަކީ، ކުދިންނަށް މަތީ ފެންވަރުގެ ތަޢުލީމެއް ދެއްވުމާއި، މުސްތަޤްބަލުގައި ކޮންމެ ކުއްޖަކީ ވެސް މަތީ ޘާނަވީ ނިމިފައި ހުރި ކުއްޖަކަށް ހެއްދެވުން ކަމުގައި ވިދާޅުވި އެވެ. އަދި އައްޑުއަކީ ތަޢުލީމަށް ލޯބި ކުރައްވާ ރައްޔިތަކު ދިރިއުޅުއްވާ ސިޓީއެއް ކަމަށް ވިދާޅުވެ، ވާހަކަފުޅު ދައްކަވަމުން، އައްޑޫގެ ސްކޫލްތަކުގެ ތަޢުލީމީ ފެންވަރު، ޤައުމީ ނިސްބަތުން ރަނގަޅުކަން ރައީސުލްޖުމްހޫރިއްޔާ ފާހަގަ ކުރެއްވި އެވެ. އަދި އައްޑު އަތޮޅު އަތޮޅު މަދްރަސާގައި އޭ ލެވެލަށް ކިޔަވައި ދިނުމުގެ ފުރްޞަތު ހުޅުވިގެންދިޔުމާ އެކު، އޭ ލެވެލް ތަޢުލީމު ހޯދަން މާލެދާ ކުދިންގެ ޢަދަދު މަދުވާނެ ކަމަށް އުންމީދު ކުރައްވާ ކަމުގައި ވެސް ރައީސް ވިދާޅުވި އެވެ.
މިދިޔަ އަހަރު އޯ ލެވެލް އިމްތިޙާނު ނިންމި ކުދިންގެ ތެރެއިން، މިއަހަރު އޭ ލެވެލަށް ކިޔެވުމުގެ ފުރްޞަތު ލިބުނު ކުދިންގެ ޢަދަދު، ނިސްބަތުން މަދުކަން ފާހަގަ ކުރައްވަމުން، އެ ޢަދަދު އިތުރުކުރުމަށް މަސައްކަތް ކުރަންޖެހޭ ކަމުގައި އެ މަނިކުފާނު ވިދާޅުވި އެވެ. އަދި ތަޢުލީމީ އެކި މަރްޙަލާތައް ނިންމައި ނުކުންނަ ޒުވާނުންނަށް އެކިއެކި މަސައްކަތް ފެށޭނެ ފުރްޞަތު ހޯދައި ދޭން އެބަ ޖެހޭ ކަމަށާއި، ރަށްރަށުން އޭ ލެވެލް ނިންމައިގެން ނުކުންނަ ކުދިންނަށް ވެސް، އެ ރަށްރަށުގައި އެކިއެކި މަސައްކަތް ކުރެވޭނެ މަގު ތަނަވަސްކޮށް ދޭން ޖެހޭ ކަމުގައި ރައީސް ވިދާޅުވި އެވެ.
ރައީސް ރޭ ދެއްކެވި ވާހަކަފުޅުގައި، ތަޢުލީމަކީ ތަރައްޤީގެ ބިންގާކަން ފާހަގަކު ރައްވަމުން، ތަރައްޤީވުމަށްޓަކައި ކުރަން ޖެހޭ އެންމެ މުހިންމު ކަމަކީ، އިންސާނީ ވަސީލަތް ކުރިއެރުވުން ކަމުގައި ވިދާޅުވި އެވެ. އަދި އިންސާނީ ވަސީލަތް ތަރައްޤީ ކުރުމަކީ، ކޮންމެ ކުއްޖަކަށް ލިބިފައިވާ ސިކުނޑީގެ ކުޅަދާނަކަމާއި، އެކުއްޖަކަށް ޤުދްރަތީ ގޮތުން ލިބިފައި ހުރި ކުޅަދާނަ ކަމެއް، އެންމެ ފުރިހަމަ އަށް ޙާޞިލު ކުރުމަށްޓަކައި ކުރަން ޖެހޭ މަސައްކަތްތައް ކުރުންކަން ބަޔާން ކުރެއްވި އެވެ.
އަދި އިންސާނީ ވަސީލަތް ބިނާ ކުރުމުގައި، ކުއްޖާގެ އެންމެ ޅަފަތުން ފެށިގެން ކުއްޖާގެ ހަށިގަނޑާއި ސިކުނޑި ތަރައްޤީ ކުރުމަށް ސަމާލުކަން ދީގެން މަސައްކަތް ކުރުމުގެ މުހިންމުކަމުގެ މައްޗަށް ވެސް ރައީސްގެ ވާހަކަފުޅުގައި ބައްލަވައި ލެއްވި އެވެ.