ފުޓްބޯޅައަށް އެކި ގޮތްގޮތުން ހިދުމަތްކުރާ ފަރާތްތަކަށް ޔޫއެފާއިން ދޭ ޔުއެފާ ޕްރެޒިޑެންޓް އެވޯޑް އިންގްލެންޑުގެ ކުރީގެ ކެޕްޓަން ޑޭވިޑް ބެކަމަށް މި އަހަރު ދޭން ނިންމައިފި އެވެ.
ބެކަމް ވަނީ އޭނާގެ 20 އަހަރުގެ ފުޓްބޯޅަ ކެރިއަރުގައި އިނގިރޭސި ކްލަބު މެންޗެސްޓަރ ޔުނައިޓެޑުގެ އިތުރުން ރެއާލް މެޑްރިޑާއި އޭސީ މިލާނާއި ޕީއެސްޖީ އަދި އެމެރިކާގެ ލޮސް އެންޖެލެސް ގެލެކްސީ އަށް ވެސް ކުޅެފައެވެ.
ޔުއެފާގެ ރައީސް އެލެކްސެންޑާ ކެފެރިން ވިދާޅުވީ ބެކަމް އަކީ އޭނާގެ ޖީލުގެ އެހެން ކުޅުންތެރިންނަށް ފުޓްބޯޅައިގެ މިސާލެއްކަމަށާއި ފުޓްބޯޅައިގެ އިތުރުން އިންސާނިއްޔަތަށް އޭނާ ކޮށްދީފައިވާ ހިދުމަތްތަކުގެ އަގުވަޒަންކުރަންޖެހޭކަމަށެވެ.
މީގެކުރިން، ޔޫއެފާގެ އެވޯޑް ހޯދީ ފަރާތްތަކުގެ ތެރޭގައި އިނގިރޭސި ކޯޗު ބޮބީ ރޮބްސަން އާއި މެންޗެސްޓަރ ޔުނައިޓެޑްގެ ކުރީގެ ތަރި ބޮބީ ޗާލްޓަން އާއި ހޮލެންޑްގެ ޔޯހަން ކްރައިފް އަދި ޖަރުމަނުގެ ފްރޭންޒް ބެކެންބާގެ އިތުރުން އިޓަލީގެ ޕައުލޯ މަލްޑިނީ ހިމެނެއެވެ.
އުމުރުން 43 އަހަރުގެ ބެކަމް ވަނީ އިނގިރޭސި ޤައުމީ ޓީމަށް 115 މެޗު ހަމަކޮށް ގިނަ މެޗުތަކެއްގައި އެޓީމުގެ ކެޕްޓަންކަން ވެސް ކޮށްފައެވެ. މީގެއިތުރުން، އޭނާ ވަނީ ކްލަބު ކެރިއަރުގައި 19 ތަށި ކާމިޔާބުކޮށް ލީގު ތަށިވެސް 10 ފަހަރު ހޯދާފައެވެ.
"މީގެކުރީން، މި އެވޯޑް ހޯދާފައިވާ ފުޓްބޯޅައިގެ ފާހަގަކޮށްލެވޭ ޝަހުސިއްޔަތުންގެ ތެރޭގައި ހިމެނުމުން މިއީ އަހަރެންނަށް ލިބޭ ވަރަށް ބޮޑު ޝަރަފެއް." ޔުނިސެފްގެ އެމްބެސަޑަރެއްގެ އިތުރުން އެމެރިކާގެ މިއާމީ އަށް ނިސްބަތްވާ މޭޖާ ލީގު ސޮކާ ޓީމެއްގެ އިސްވެރިއެއްގެ ގޮތުން ހަރަކާތްތެރިވަމުން އަންނަ ބެކަމް ބުންޏެވެ.
ބެކަމް އަށް މިއެވޯޑް ހަވާލުކުރަން ހަމަޖެހިފައިވަނީ އޯގަސްޓްމަހުގެ 30 ވަނަ ދުވަހު ފްރާންސްގެ މޮނާކޯގައި ބޭއްވުމަށް ހަމަޖެހިފައިވާ ޔޫއެފާ ޗެމްޕިއަންސް ލީގުގެ ގުރުއަތުލުމުގެ ރަސްމިއްޔާތުގައެވެ.