އިޓާލިއަން ސެރިއޭގެ ކްލަބު ޔުވެންޓަސް އަށް ކުޅޭ ބޮސްނިއާ-ހާޒެގޮވީނާގެ މިޑްފީލްޑަރު މިރަލެމް ޕިޔަނިޗް އެކްލަބުގައި އިތުރު ފަސް އަހަރު މަޑުކުރުމަށް ކޮންޓްރެކްޓް އާކޮށްފިއެވެ.
އުމުރުން 28 އަހަރުގެ ޕިޔަނިޗް ކޮންޓްރެކްޓް އާކޮށްފައިމިވަނީ އޭނާ ޔުވެންޓަސް ދޫކޮށް އެހެން ކްލަބަކަށް ބަދަލުވާނެކަމުގެ ވާހަކަތައް މީޑިއާގައި ދެކެވިފައިވަނިކޮށެވެ. އެގޮތުން، މިފަހަރުގެ ޓްރާންސްފާ ބާޒާރުގައި ޕިޔަނިޗް ގެންދަން ސްޕެއިނުގެ ބާސެލޯނާގެ އިތުރުން އިނގިރޭސި ކްލަބު މެންޗެސްޓަރ ސިޓީ އިން ވެސް މަސައްކަތްކުރިކަމަށް މީޑިއާ ރިޕޯޓްތަކުގައިވެއެވެ.
އިޓަލީގެ ކްލަބު އޭއެސް ރޯމާއިން 2016 ވަނަ އަހަރު ޔުވެންޓަސް އަށް ބަދަލުވެ ޕިޔަނިޗް ވަނީ އެކްލަބުގައި ހޭދަކުރި ދެސީޒަނުގައި އިޓާލިއަން ސެރިއޭ އަދި އިޓާލިއަން ކަޕް ދެފަހަރު ކާމިޔާބުކޮށްދިނުމުގައި މުހިއްމު ދައުރެއް އަދާކޮށްފައެވެ. އެގޮތުން، އޭނާ ވަނީ ޔުވެންޓަސް އަށް ކުޅުނު 92 މެޗުގައި ޖުމްލަ 15 ގޯލް ކާމިޔާބުކޮށް އިތުރު 28 ލަނޑުޖެހުމަށް އެހީތެރިވެދީފައެވެ.
މީގެއިތުރުން، ޕިޔަނިޗް ވަނީ ބޮސްނިއާގެ ޤައުމީ ޓީމަށް މިހާތަނަށް ކުޅުނު 81 މެޗުގައި ޖުމްލަ 11 ގޯލްޖަހައިދީފައެވެ.