އިޓަލީ އަދި ޔުވެންޓަސްގެ ކުރީގެ ފޯވާޑް ކްރިސްޓިއަން ވިއޭރީ ބުނެފައިވަނީ ދާދިފަހުން ޔުވެންޓަސް އަށް ބަދަލުވި ކްރިސްޓިއާނޯ ރޮނާލްޑޯ އަދި މުސްކުޅިނުވާކަމަށާއި އެއީ ދުނިޔޭގެ އެންމެ މޮޅު ކުޅުންތެރިޔާކަމަށެވެ. މީގެއިތުރުން، ރޮނާލްޑޯ އަށް ނިސްބަތްކޮށް ވިއޭރީ ބުނެފައިވަނީ އެއީ ގޯލް ޖަހާ މެޝިނެއްކަމަށެވެ.
ރޮނާލްޑޯ އަށް ގިނަބައެއްގެ ފާޑުކިއުންތައް އަމާޒުވާންވީ ސަބަބެއް ނުވިސްނޭ ކަމަށްވެސް ވިއޭރީ ބުނެފައިވެއެވެ.
"ރޮނާލްޑޯ، އިޓަލީއަށް އައިއިރު އުމުރަކީ 33 އަހަރަށްވާއިރު ގިނަ ބަޔަކުދެކޭގޮތުގައި އޭނާ މިހާރު މާ އުމުރުން ދުވަސްވެފައިކަމަށްވަނީ، އެގޮތުން، ވޭތުވެދިޔަ ސީޒަންތަކުގައި އޭނާ ކާމިޔާބުކުރި އަދަދަށް ދެން ލަނޑުނުޖެހޭނެ ކަމަށް ބުނޭ. އެކަމަކު، އަހަރެން ޤަބޫލުކުރާގޮތުގައި ޔުވެންޓަސް އިން މިވަނީ ދުނިޔޭގެ އެންމެ މޮޅު ކުޅުންތެރިޔާ ގެނެސްފައި." ޑާޒޯން އަށް ދިން އިންޓަވިއުގައި ވިއޭރީ ބުންޏެވެ.
އުމުރުން 45 އަހަރުގެ ވިއޭރީ ވަނީ އޭނާގެ ކްލަބު ކެރިއަރުގައި ޔުވެންޓަސް އާއި އޭސީ މިލާން އަދި އިންޓަގެ އިތުރުން ސްޕެއިނުގެ އެތުލެޓިކޯ މެޑްރިޑަށްވެސް ކުޅެފައެވެ.
ބްރެޒިލްގެ ރޮނާލްޑޯ އާއިއެކު އިންޓަ އަށް ކުޅުނު ވިއޭރީ ބުނީ ކްރިސްޓިއާނޯ އާއި ބްރެޒިލްގެ ރޮނާލްޑޯގެ ކުޅުމުގައި އެއްގޮތްކަމެއް ހުންނަ ކަމަށާއި ދެކުޅުންތެރިންނަކީވެސް މެޗުގެ ކޮންމެ ވަގުތަކުވެސް ނަތީޖާ ބަދަލުކުރެވޭ ފަދަ ކުޅުންތެރިންކަމަށެވެ.
"އެލް ފިނޮމީނޯ (ރޮނާލްޑޯ ނާޒާރިއޯ) ވަނީ އިންޓަ މިލާނަށް ކުޅުނު ދުވަސްވަރު އޭނާ އަކީ ކިހާ ނުރައްކާތެރި އަދި ހުނަރުވެރި ކުޅުންތެރިއެއްކަން ސާބިތުކޮށްދީފައި. އެގޮތުން އޭނާ ވަނީ ކޮންމެ އާދީއްތަ ދުވަހެއްގައި ލަނޑުޖަހާފައި." ވިއޭރީ ބުންޏެވެ.
"ކްރިސްޓީއާނޯ (ރޮނާލްޑޯ) އަކީ ވެސް ހަމަ އެކަހަލަ ކުޅުންތެރިއެއް. އޭނާ ވަނީ ސީޒަނަކަށް 50 ގޯލްގެ މަގުން، މިހާތަނަށް 600 އަށް ވުރެ ގިނަ ލަނޑުޖަހާފައި. އޭނާ ވަނީ ކަނާތުފައިން އަދި ވާތުފައިންވެސް އުނދަގުލެއް ނެތި ގިނަ ގޯލްތަކެއް ޖަހާފައި. އެއީ ގޯލް ޖަހާ މެޝިނެއް." ވިއޭރީ ބުންޏެވެ.