އިނގިރޭސި ޕްރިމިއާ ލީގުގެ ކްލަބު ޓޮޓެންހަމް އަށް ކުޅޭ ފްރާންސްގެ ކެޕްޓަން އަދި ގޯލްކީޕަރު ހޫގޯ ލޮރިސް ރާބޮއެގެން ކާރު ދުއްވައިގެން ފުލުހުންގެ ބެލުމުގެ ދަށަށް ގެންގޮސްފިއެވެ.
އުމުރުން 31 އަހަރުގެ ލޮރިސް، ފުލުހުންގެ ބެލުމުގެ ދަށަށް ގެންދިޔައީ ހުކުރު ދުވަހުގެ ދަންވަރުގެ ވަގުތެއްގައި ގްލާސްޓާ ސަރައްހައްދުގައި ޓްރެފިކް ބަލަހައްޓަމުން ދިޔަ ފުލުހުން އޭނާގެ ކާރު ހުއްޓުވައި ޗެކް ކުރުމުގެ ގޮތުން ބެލިބެލުމުން އޭނާ ރާބޮއެގެން އިން ކަމަށް ޝައްކު ކުރެވޭތީއެވެ.
ފްރާންސްގެ އޮލިމްޕިކް ލިޔޯން އިން 2012 ވަނަ އަހަރު ޓޮޓެންހަމް އަށް ބަދަލުވެ ލޮރިސް ވަނީ މިހާތަނަށް އެޓީމަށް 256 މެޗު ކުޅެދީފައެވެ.
މީގެއިތުރުން، ރަޝިޔާގައި ބޭއްވުނު އެންމެފަހުގެ ވޯލްޑްކަޕްގައި ލޮރިސްގެ ކެޕްޓަންކަމުގައި ފްރާންސް އިން ވަނީ ދެވަނަ ފަހަރަށް އެމުބާރާތް ކާމިޔާބުކޮށްފައެވެ.
ލަންޑަންގެ މެޓްރޮޕޮލިޓަން ޕޮލިސްގެ ފަރާތުން މައުލޫމާތުދިން ގޮތުގައި ކަފާލާތުގެ ދަށުން ލޮރިސް ދޫކޮށްލާފައިވަނީ އަންނަ ސެޕްޓެންބަރު މަހުގެ 11 ވަނަ ދުވަހު އޮންނަ އަޑުއެހުމަށް ވެސްޓްމިންސްޓާ މެޖިސްޓްރޭޓް ކޯޓަށް ހާޒިރުވުމަށް އެންގުމަށްފަހުގައެވެ.
ޓޮޓެންހަމް އިން ލީގުގައި މިހާތަނަށް ކުޅުނު ދެމެޗުގައި ނިއުކާސަލް އަތުން 2-1 އިން މޮޅުވިއިރު ފުލަމް އަތުން މޮޅުވީ 3-1 އިންނެވެ.
ޕްރިމިއާ ލީގުގައި ޓޮޓެންހަމް ދެން ކުޅޭ މެޗުގައި އަންނަ ހޯމަ ދުވަހުގެރޭ ރަށުންބޭރުގައި ނިކުންނާނީ މެންޗެސްޓަރ ޔުނައިޓެޑާ ދެކޮޅަށެވެ.