ސެޕްޓެމްބަރ 23 ވަނަ ދުވަހު ރާއްޖޭގައި ބާއްވާ ރިޔާސީ އިންތިޚާބުގައި ވޯޓު އޮޅުވާލުމުގެ އަމަލެއް ހިންގައިފި ނަމަ ދިވެހިރާއްޖެ ޢިސްތިޢުމާރުކުރަން ޖެހިދާނެ ކަމަށް ވިދާޅުވެ އިންޑިޔާގެ ޤާނޫނު ހަދާ މަޖިލީހުގެ މެންބަރަކު ދެއްކެވި ވާހަކަތައް އަދާލަތު ޕާޓީން ކުށްވެރިކޮށްފިއެވެ.
ރިޔާސީ އިންތިޚާބުގެ ވޯޓު އޮޅުވާލައިފި ނަމަ ރާއްޖެ "ހިފަންޖެހޭ" ކަމަށް ވިދާޅުވެ ޓްވީޓް ކުރެއްވީ، އިންޑިޔާގެ ޤާނޫނު ހަދާ މަޖިލީހުގެ މެންބަރު ސުބްރަމާނިއަން ސުވާމީއެވެ.
އޭނާގެ ވާހަކަތަކަށް ރައްދުދީ އަދާލަތުން ނެރުނު ނޫސްބަޔާނުގައި ބުނެފައިވަނީ، ބޭރުގެ އެއްވެސް ޤައުމަކުން ދިވެހިރާއްޖެ ޢިސްތިޢުމާރުކުރަން ޖެހޭ އެއްވެސް ޙާލަތެއް އޮންނާނެކަމަށް އެ ޕާޓީން ގަބޫލު ނުކުރާ ކަމަށެވެ.
އަދާލަތުން ބުނެފައިވަނީ އަދި ދިވެހިރާއްޖެ އަކީ ފުރިހަމަ މިނިވަންކަން ލިބިގެންވާ މިނިވަން މުސްތަޤިއްލު ދައުލަތެއްކަ ކަމަށާއި އަދި ސުބްރަމާނިއަންގެ ގޮވާލުމަކީ އިންޑިޔާގެ ސަރުކާރާއި ރައްޔިތުން ރާއްޖެ އާއި މެދު ދެކޭ ގޮތާއި ޚިލާފު ގޮވާލުމެއްކަމަށެވެ.
އަދާލަތުގެ ބަޔާނުގައި ވަނީ ރާއްޖޭގެ މިނިވަންކަމާ އިސްތިޤުލާލަށް ލޮޅުން އަރާފާނެ އެއްވެސް ކަމެއް އިންޑިޔާއިން ނުކުރާނެކަން އިންޑިޔާގެ އެކި ސަރުކާރުތަކުން ވޭތުވެ ދިޔަތަނުގައި ސާބިތުކޮށްދީފައިވާކަން ފާހަގަކޮށްފައެވެ.
މީގެ އިތުރުން އަދާލަތުގެ ބަޔާނުގައި ވަނީ ރައީސް ޔާމީން ގެ ވެރިކަމުގައި ދިވެހިރާއްޖޭގެ ޚާރިޖީ ސިޔާސަތު އެއްވެސް އަމާޒެއްނެތި ބައްޓަންކުރަމުންދާ ގޮތުން އިންޑިޔާ އާއި ރާއްޖެ އާއި ދެމެދު އޮންނަ ގުޅުން ހީނަރުވަމުންދާތީ އެކަމާއި ކަންބޮޑުވުން ފާޅުކޮށްފައެވެ.
"ވަކިން ޚާއްސަކޮށް ކުރިޔަށް އޮތް ރިޔާސީ އިންތިޚާބުގެ މިނިވަންކަން ކަށަވަރުކޮށް ރައްޔިތުންގެ ވެރިކަމެއް ދިވެހިރާއްޖޭގައި ޤާއިމްކުރުމަށް ބައިނަލްއަޤުވާމީ މުޖުތަމަޢުން ކުރާ މަސައްކަތުގައި އިންޑިޔާއިން އަދާކުރާ އިސްދައުރު ބަލައިގަނެ ފާހަގަކުރަމެވެ." އަދާލަތުގެ ބަޔާނުގައި ބުނެފައިވެއެވެ.