ސްޕެނިޝް ލީގުގައި ހޮނިހިރު ދުވަހުގެ ރޭ ކުޅުނު މެޗުގައި އޮސްމާނޭ ޑެމްބެލޭ ކާމިޔާބުކުރި ލަނޑުން ރެއާލް ވަޔަޑޮލިޑް އަތުން އެންމެ ފަހުގެ ޗެމްޕިއަން ބާސެލޯނާ 1-0 އިން މޮޅުވިއިރު އެތުލެޓިކޯ މެޑްރިޑް ވަނީ ހަމަ މިނަތީޖާއިން ރަޔޯ ވަޔެކާނޯ ބަލިކޮށް ލީގުގެ ފުރަތަމަ މޮޅު ހޯދައިފައެވެ.
މިމެޗުން މޮޅުވެ ބާސާއިން ވަނީ ސަތޭކަ ޕަސެންޓްގެ ރެކޯޑާއިއެކު މިހާތަނަށް ކުޅުނު ދެމެޗުން މޮޅުވެ ހަ ޕޮއިންޓް ލިބިގެން ތާވަލްގެ އެއްވަނައަށް ޖެހިލާފައެވެ. ވަޔަޑޮލިޑް އޮތީ އެއް ޕޮއިންޓާއިއެކު ތާވަލްގެ 15 ވަނައިގައެވެ.
ވަޔަޑޮލިޑްގެ ދަނޑުގައި ކުޅުނު މިމެޗުގައި ދަނޑުގެ ހާލަތު ހުރިގޮތުން މެޗު ކުޅެމުންދިޔައިރު ބާސާއިން އާއްމުކޮށް ކުޅޭ ޕާސިން ގޭމް ކުޅުމަށް ދަތިތަކާއި ކުރިމަތިލާންޖެހިފައިވެއެވެ.
މިމެޗުގެ ފުރަތަމަ ހާފުގައި ބާސާގެ ލުއިސް ސުއަރޭޒް އާއި ފިލިއްޕޭ ކުޓީނިއޯ ފޮނުވާލި ހަމަލާތައް މިމެޗުގައި ވަޔަޑޮލިޑްގެ ގޯލް ބެލެހެއްޓި އެކްލަބުގެ އެކަޑެމީގެ ކުރީގެ ގޯލްކީޕަރެއްކަމަށްވާ ޖޯޑީ މަސިޕް ވަނީ ދިފާއުކޮށްފައެވެ. މިމެޗުގެ ފުރަތަމަ ހާފު ނިމުނީ ދެޓީމަށް ލަނޑެއްނުޖެހި އެއްވަރުވެގެންނެވެ.
ބާސާއިން ކާމިޔާބުކުރި ހަމައެކަނި ލަނޑު މެޗުގެ 57 ވަނަ މިނެޓުގައި ޖަހައިދިނީ ޑެމްބެލޭ އެވެ. މިއީ އެޓީމުގެ ސާޖީ ރޮބާޓޯ ބޮލުން ޖައްސާލި ޕާހަކުން ލިބުނު ބޯޅަ ޑެމްބެލޭ ގޯލްގެތެރެއަށް ފޮނުވާލައިގެން ކާމިޔާބުކުރި ރީތި ގޯލެކެވެ.
މިލަނޑަށްފަހު ވަޔަޑޮލިޑް އިން ކުޅުން ރަނގަޅުކޮށް ބާސާގެ ޑިފެންސަށް އުނދަގޫތައް ކުރިމަތިކޮށްފައިވެއެވެ. އެގޮތުން، މެޗުގެ 77 ވަނަ މިނެޓުގައި އެޓީމުގެ ވިންގާ ސާޖިއޯ ގޮންޓާން ގަލާޑޯ (ކޭކޯ) އަށް ވަނީ ރަނުގެ ފުރުޞަތެއް ލިބިފައެވެ. ނަމަވެސް، އޭނާ ބޮލުން ފޮނުވާލި ބޯޅަ ބާސާގެ ގޯލްކީޕަރު އަންދްރޭ ޓަ ސެޓެގަން ވަނީ މަތަކޮށްފައެވެ.
އޭގެ ހަތަރު މިނެޓުފަހުން، ވަޔަޑޮލިޑްގެ ކިކޯ އޮލިވާސް ބޮލުން ފޮނުވާލި ހަމަލާގެ ހުރަހަކަށްވީވެސް ބާސާގެ ކީޕަރު ޓަ ސްޓެގަން އެވެ.
މެޗު ނިމެން މިނެޓަކަށްވެފައިވަނިކޮށް ބާސާގެ މެލްކޮމް އަށް އެޓީމުގެ ލީޑް ފުޅާކުރުމަށް ލިބުނު ފުރުޞަތުގެ ބޭނުންހިފޭގޮތެއްނުވިއެވެ. އޭނާ ފޮނުވާލި ބޯޅަ ވަޔަޑޮލިޑްގެ ކީޕަރު މަސިޕް ވަނީ މަތަކޮށްފައެވެ.
އޭގެފަހުން، މެޗުގެ އިތުރުވަގުތުގައި ވަޔަޑޮލިޑްގެ ކޭކޯ ގޯލެއް ކާމިޔާބުކޮށް ނަތީޖާ ހަމަހަމަކޮށްދިންނަމަވެސް ވީއޭއާރްގެ އެހީ ހޯދުމަށްފަހު އެބޯޅަ ފޮނުވާލިއިރު ކޭކޯ ހުރީ އޮފްސައިޑް މަޤާމެއްގައިކަމަށް ވާތީވެ ރެފްރީ ވަނީ އެއީ ގޯލެއް ނޫންކަމަށް ނިންމާފައެވެ.
ލަލީގާގައި ހޮނިހިރު ދުވަހުގެ ރޭ ކުޅުނު މެޗުގައި އެތުލެޓިކޯ ވަނީ އަމިއްލަ ދަނޑުގައި 1-0 އިން ރަޔޯ ވަޔެކާނޯ އަތުން އުނދަގޫ މޮޅެއް ހޯދައިފައެވެ.
މިމެޗު ފެށިގެން ގިނަވަގުތު ބޯޅަ ގެންގުޅެ ގިނަ ހަމަލާތައް އުފެއްދީވެސް ވަޔެކާނޯއެވެ. އެހެންނަމަވެސް، ފުރަތަމަ ހާފުގައި ލިބުނު އެންމެ ރަނގަޅު ފުރުޞަތު އެތުލެޓިކޯގެ ތޯމަސް ލެމާ ފޮނުވާލުމުން ވަޔެކާނޯގެ ގޯލްކީޕަރު އަލްބާޓޯ ކަބްރޭރާ ވަނީ މަތަކޮށްފައެވެ. މިހާފު ނިމުނީ ދެޓީމަށް ލަނޑެއްނުޖެހި އެއްވަރުވެގެންނެވެ.
ދެވަނަ ހާފު ފެށިގެން އެތުލެޓިކޯ އިން ވަނީ ފުލުފުލުގައި ވަޔެކާނޯގެ ގޯލަށް ހަމަލާތަކެއް ފޮނުވާލައިފައެވެ. ނަމަވެސް، އެތުލެޓިކޯ އިން ލަނޑެއްޖެހުމަށް ކުރި މަސައްކަތް ކާމިޔާބުވީ މެޗުގެ 63 ވަނަ މިނެޓުގައި އެންޓޮއިން ގްރީޒްމަން ޖަހައިދިން ގޯލުންނެވެ. މިއީ އެޓީމުގެ ޑިފެންޑަރު ސްޓެފަން ސަވިޗް ތަނަވަސްކުރި ފުރުޞަތަކުން އޭނާ ކާމިޔާބުކުރި ގޯލެކެވެ.
އެތުލެޓިކޯގެ ލަނޑަށްފަހު ވަޔެކާނޯ އިން ވަނީ ލަނޑުޖަހާނެ ގިނަ ފުރުޞަތުތަކެއް ތަނަވަސްކޮށްފައިވެއެވެ. އެގޮތުން، އެތުލެޓިކޯގެ ގޯލަށް އަމާޒުކޮށް ވަޔެކާނޯ އިން ފޮނުވާލި ހުރިހާ ހަމަލާތަކުގެ ހުރަހަކަށްވީ ކީޕަރު ޔާން އޮބްލަކް އެވެ.
ސްޕެނިޝް ލީގުގައި މިހަފްތާގައި ކުޅުނު އެހެން މެޗުތަކުގެ ނަތީޖާއަށް ބަލާއިރު، ލެގަނޭސް އާއި ރެއާލް ސޮސިއެޑާޑް ބައްދަލުކުރިމެޗު 2-2 އިން އެއްވަރުވިއިރު އަލަވެސް އާއި ރެއާލް ބެޓިސް ކުޅުނު މެޗު ނިމުނީ ދެޓީމަށް ލަނޑެއްނުޖެހި އެއްވަރުވެގެންނެވެ. މީގެއިތުރުން، ގެޓަފޭ ވަނީ 2-0 އިން އެއިބާ އަތުން މޮޅުވެފައެވެ.