ސްޕެނިޝް ލީގުގައި ރޭ ކުޅުނު މެޗުގައި ފްރާންސްގެ ކަރީމް ބެންޒެމާ ކާމިޔާބުކުރި ދެލަނޑާއިއެކު ރަށުން ބޭރުގައި ކުޅެ ޖިރޯނާ އަތުން ރެއާލް މެޑްރިޑް މޮޅުވެ ޕޮއިންޓް ތާވަލްގެ އެއްވަނަ އަށް ޖެހިލިއިރު ވެލެންސިއާ ވަނީ އެސްޕަންޔޯލް އަތުން ބަލިވެފައެވެ.
ލީގުގައި މިހާތަނަށް ކުޅުނު ދެމެޗުން ރެއާލް އާއި ބާސެލޯނާ އަށް ހަ ޕޮއިންޓް ލިބިފައިވާއިރު ރެއާލް އަށް ކުރި ލިބެނީ ފައިދާ ގޯލްގެ ތަފާތުންނެވެ.
ޕޯޗުގަލްގެ ކްރިސްޓިއާނޯ ރޮނާލްޑޯ ނެތި ލީގުގައި ރެއާލް ކުޅުނު ދެވަނަ މެޗުގެ ފުރަތަމަ އެގާރައިގައި އެޓީމުގެ ލޫކާ މޮޑްރިޗާއި ރަފައެލް ވަރާންގެ އިތުރުން ދާދިފަހުން ޗެލްސީ އިން އެޓީމަށް ބަދަލުވި ގޯލްކީޕަރު ތިބައުޓް ކޯޓުއާ ވެސް ހިމަނާފައެއްނުވެއެވެ. މިތިން ކުޅުންތެރިންވެސް ތިބީ ބެންޗުގައެވެ.
ޖިރޯނާގެ ދަނޑުގައި ރޭ ކުޅުނު މެޗުގައި ކުރިން ލީޑްނެގީ ވެސް އެޓީމުންނެވެ. މެޗުގެ 16 ވަނަ މިނެޓުގައި މިލަނޑުޖަހައިދިނީ ބޯރްހާ ގާސިއާ އެވެ.
ފުރަތަމަ ހާފު ނިމެން ހަތް މިނެޓަށްވެފައިވަނިކޮށް ރެއާލަށް ނަތީޖާ ހަމަހަމަކޮށްދިނީ ލިބުނު ޕެނަލްޓީއަކުން ކެޕްޓަން ސާޖިއޯ ރާމޯސް އެވެ. މިއީ އެޓީމުގެ މާކޯ އަސެންސިއޯ އަށް ޖިރޯނާގެ ޑިފެންޑަރު މާކް މުނިއޭސާ ކުރި ފައުލަކަށް ރެފްރީ ދިން ޕެނަލްޓީއެކެވެ.
މިމެޗުގެ ފުރަތަމަ ހާފު ނިމުނީ 1-1 އިން ދެޓީމު އެއްވަރުވެގެންނެވެ.
ދެވަނަ ހާފު ފެށިގެން ހަތްވަނަ މިނެޓުގައި ރެއާލަށް މިމެޗުގައި ފުރަތަމަ ފަހަރަށް ލީޑް ނަގައިދިނީ ޕެނަލްޓީއަކުން ކަރީމް ބެންޒެމާ އެވެ. ރެއާލަށް މިޕެނަލްޓީ ހޯދައިދިނީވެސް އަސެންސިއޯ އެވެ.
އޭގެ ހަތް މިނެޓުފަހުން، އިސްކޯ ތަނަވަސްކޮށްދިން ފުރުޞަތަކުން ވޭލްސްގެ ވިންގާ ގަރެތު ބޭލް ވަނީ ރެއާލަށް ދެލަނޑުގެ ލީޑެއް ނަގައިދީފަ އެވެ.
އޭގެފަހުން، މެޗުގެ 80 ވަނަ މިނެޓުގައި ބެންޒެމާ ވަނީ މިމެޗުގައި އޭނާ ޖެހި ދެވަނަ ލަނޑާއިއެކު ނަތީޖާ 4-1 އަށް ބަދަލުކޮށްލާފައެވެ. މިއީ ބޭލް ތަނަވަސްކުރި ފުރުޞަތަކުން އޭނާ ކާމިޔާބުކުރި ގޯލެކެވެ.
ލަލީގާގައި ރޭ ކުޅުނު އެހެން މެޗުތަކުގެ ނަތީޖާއަށް ބަލާއިރު، އެސްޕަންޔޯލް އަތުން 2-0 އިން ވެލެންސިއާ ބަލިވިއިރު ސެވިއްޔާ އާއި ވިޔަރެއާލް ބައްދަލުކުރި މެޗު ނިމުނީ ދެޓީމަށް ލަނޑެއްނުޖެހި އެއްވަރުވެގެންނެވެ.