ސެޕްޓެމްބަރު ހަތް ވަނަ ދުވަހު ބޭއްވޭ ރިޔާސީ އިންތިޚާބު ކާމިޔާބު ކުރައްވާނީ 125،000 ވޯޓުން ކަމަށާއި އެ ބޮޑު ކާމިޔާބީގެ ޒިންމާ ވަރަށް ބޮޑު ކަމުގައި އެމްޑީޕީގެ ރިޔާސީ ކެންޑިޑެޓް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނަޝީދު މިހެން ވިދާޅުވީ ފ. މިލަންދޫގައި ބުދަ ދުވަހުގެރޭ ބޭއްވި "އެއްބުރުން ބޮޑު ތިލަދުންމަތި" އެމްޑީޕީގެ ކެމްޕޭން ޖަލްސާގައި ވާހަކަ ދައްކަވަމުންނެވެ.
"ސެޕްޓެމްބަރު 7 ވަނަ ދުވަހު ރޭގަނޑު ރޭޑިއޯ އައްސަވާ. ތިބޭފުޅުންނަށް އަޑުއިވޭނެ އިރާދަކުރެއްވިއްޔާ ދިވެހިރައްޔިތުންގެ ޑިމޮކްރަޓިކް ޕާޓީއަށް 125،000 ވޯޓު ލިބޭނެ ވާހަކަ. އަޅުގަނޑުމެން އެއްބުރުން މިއިންތިޚާބު ކާމިޔާބު ކުރާނަން،" ނަޝީދު ވިދާޅުވި އެވެ. "އަދި އިންތިޚާބުގައި މިލިބޭ ބޮޑު ކާމިޔާބީއަކީ ވަރަށް ބޮޑު ޒިންމާއެއްކަމާއި އެމަނިކުފާނުގެ ވާޖިބަކަށް ވާނީ ހުރިހާ ފިކުރެއްގެ މީހުންނާ އެކު ދިވެހި ރާއްޖޭގެ ތަރައްޤީ އަށް މަސައްކަތް ކުރުން."
މިލަންދޫ ޖަލްސާގައި ވާހަކަދައްކަވަމުން ނަޝީދު ވިދާޅުވީ އެމްޑީޕީއަކީ އަބަދުވެސް ދިވެހި ރާއްޖޭގައި ހެޔޮ ބަދަލަށް މަސައްކަތް ކުރަމުން އަންނަ ޕާޓީކަމުގަ އެވެ. އަދި ރައްޔިތުން އެމްޑީޕީގެ ފިކުރު ބަލައިގެންފި ކަމަށާއި ދިވެހި ރާއްޖެއިން މި ފިކުރު ގެއްލިގެން ނުދާނެ ކަމުގައި ނަޝީދު ވިދާޅުވިއެވެ.
"އަޅުގަނޑުމެންނަކީ މިރާއްޖެ ބަދަލުކުރަމަށް ނިކުތް ބައެއް. އަޅުގަނޑުމެން މިދަނީ ބާރަށް އެމަސައްކަތް ކުރަމުން. ކިތަންމެ ގޮތަކަށް ދިމާކުރެވިދާނެ. އަނިޔާވެސް ކުރެވިދާނެ. ތަޅާވެސް ހެދިދާނެ. އެހެންނަމަވެސް މިފުކުރެއް މިރާއްޖެއިން ދެނެއް ފޮހެވިގެން ނުދާނެ. މިރާއްޖެއަކުން މިފިކުރެއް ގެއްލި ނުދާނެ." ނަޝީދު ވިދާޅުވި އެވެ.
ނަޝީދު ވާހަކަފުޅުގައި ދިވެހިނަށް ވަރަށް ގިނަ މަންޒަރުތަކާ ހީލަތްތެރިކަމާއި، އަނިޔާވެރިކަމާއި، ޚުދުމުހުތާރުކަން ފެނި އެތައް ބައެއްގެ ޙައްޤުތައް ވަނީ ގެއްލިފައިކަމުގައި ވިދާޅުވިއެވެ. ދިވެހީން އެމީހުންގެ ޢާންމު ޙާލަތު ރަގަޅު ނުކުރެވި ހާސްކަންމަތީގައި ދިރިއުޅެމުން ދިޔަތަން ދެކިއްޖެ ކަމަށާއި ދިވެހީން މިހާރު އުންމީދު ކުރަނީ ބޯހިޔާވަހި ކަމާށާއި ބޭސް ފަރުވާ ކުރެވޭނެ އުސޫލުތަކަށާއި، ވަޒީފާގެ ފުރުޞަތުތައް އިތުރުވެ ޖީބަށް ވަންނަ ފައިސާ އިތުރުވުމަށް ކަމުގައި ނަޝީދު ވިދާޅުވިއެވެ.
ދިވެހި ރާއްޖެ އަށް މިއަދު ކުރިމަތިވެފައިވާ މައްސަލަތަކާ ގުޅޭގޮތުން ވާހަކަ ދައްކަވަމުން ނަޝީދު ވިދާޅުވީ ދިވެހި ރާއްޖެ އަށް މިއަދު ކުރިމަތިވެފައިވާ ތަކުލީފަކީ ދަރިންނަށް ބޭސް ފަރުވާ ލިބޭނެ ގޮތެއް ނެތި އެއްތަނުން އަނެއް ތަނަށް ދެވޭނެ ގޮތާއި ބޯހިޔާވަހިކަން ނެތި ޢާއިލާ ގޮވައިގެން ދިރިއުޅެވޭނެ ގޮތެއް ނެތުން ކަމުގަ އެވެ. އަދި މި މައްސަލަތައް ޙައްލު ކުރުމަށް
"ދިވެހި ރައްޔިތުންގެ ޕާޓީގެ ފަރާތުން ދިވެހި ރައްޔިތުންނަށް މިހުށައަޅަނީ ސިޔާސަތުތަކެއް. ދިވެހީންގެ ހާލަތު ރަނގަޅުވެގެން ދާނެ ސިޔާސަތުތަކެއް." ނަޝީދު ވިދާޅުވިއެވެ.
އެމްޑީޕީގެ ފަރާތުން ދިވެހިރައްޔިތުންނަށް ހުށައަޅާ ސިޔާސަތުތަކުގެ ސަބަބުން ރައްޔިތުންގެ ޙައްޤުތައް ރައްކާތެރި ކުރެވޭނެ ކަމަށާއި ފައިސާވެރި ވެވޭނެ ކަމުގައި ނަޝީދު ވިދާޅުވި އެވެ.
އަދި އެމްޑީޕީއާ އެހެން އެއްވެސް ސިޔާސީ ޕާޓީއަކުން ގާތް ނުވެވޭނެ ކަމުގައި ރައީސް ނަޝީދު ވިދާޅުވި އެވެ.
"އަޅުގަނޑުމެން ތަޅާލާނީ 6-4 އަކަށް. އެއްލާ ކޮންމެ ބޯޅައެއް ފެނު ޖެހެނީ ޕިޗު މެދުގައި. އެއަކު ސްޕިނެއް ނެތް. ސްވިންގެއް ނެތް. އަޅުގަނޑުމެންގެ ވިކެޓެއް ވައްޓައެއް ނުލެވޭނެ." ނަޝީދު ވިދާޅުވި އެވެ.