ހިޔާލު ތަފާތުވުން އުފެދިފައިވާ ޕީޕީއެމާއި އެމްޑީއޭ ކޯލިޝަންގެ މުސްތަގުބަލާ މެދު ގޮތެއް ނިންމުމަށް މިއަދު ހަވީރު އެމްޑީއޭގެ ގައުމީ މަޖިލީހުގެ ބައްދަލުވުމެއް ބާއްވާނެއެވެ.
ޕީޕީއެމާއި އެމްޑީއޭއާ ދެމެދު ހިޔާލުތަފާތުވުން އުފެދިފައި ވާއިރު އެމްޑީއޭއިން ކުރިން ނިންމާފައި އޮތީ އެ ޕާޓީގެ ގައުމީ މަޖިލީހުގެ ބައްދަލުވުމެއް އޯގަސްޓް 25 ވަނަ ދުވަހުގެ ރޭ ބޭއްވުމަށެވެ.
މައުލޫމާތު ލިބިފައިވާ ގޮތުގައި އެމްޑީއޭގެ ގައުމީ މަޖިލީހުގެ ބައްދަލުވުމުގެ އެޖެންޑާގައި ހިމަނާފައިވަނީ އެޕާޓީގެ ކުރިމަގާ ގުޅޭ ކަންތައްތައް ނިންމުމުގެ ވާހަކަ އެވެ.
އިތުބާރު ހުރި ގޮތަކަށް "އައްޑޫލައިވް" އަށް އެނގިފައިވާ ގޮތުގައި އެމްޑީއޭގެ ލީޑާޝިޕްގައި ވަނީ ޕީޕީއެމް ކޯލިޝަނުން ވަކިވުމަށް ނިންމާފައެވެ.
އެމްޑީއޭގެ ލީޑަރު ސިޔާމް އަކީ، ރައީސް ޔާމީން އާއި މެޑަމް ފާތުން އަށް އެންމެ ބޮޑަށް ތައުރީފްކޮށް ވާހަކަ ދައްކަވާ އެއް ބޭފުޅާއެވެ. އެހެން ނަމަވެސް މިފަހަކަށް އައިސް ޕީޕީއެމްގެ ކެމްޕެއިން ހަރަކާތްތަކުން އެއްވެސް ވަރަކަށް ސިޔާމް ނުފެނެއެވެ.
އެއާއި އެކު 2013 ވަނަ އަހަރުގެ ރިޔާސީ އިންތިހާބުން ފެށިގެން ޕީޕީއެމް އާއި އެކު އެމްޑީއޭ އިން ހަދާފައިވާ ކޯލިޝަން އެއްބަސްވުން ރޫޅާލަން އުޅޭ ކަމުގެ އަޑުތައް ވެސް ވަނީ ގަދަވެފައެވެ.