ސ. ހިތަދު އަށް ސަޕްލައި ފެން ދޫކުރަން އިއްޔެ ފަށާފައިވާ އިރު، ފެން ގުޅައި ދިނުމަށް އަދި އެެއްވެސް ފީއެއް ނަގަމުން ނުދާ ކަމަށް ސަދަން ޔުޓިލިޓީޒް ލިމިޓެޑް (އެސްޔޫއެލް) އިން ބުނެފި އެވެ.
އެހެން ނަމަވެސް އަލަށް ހިދުމަތަށް އެދޭ މީހުންނަށް ކަނެކްޝަން ލައި ދެނީ 1،800ރ. ގެ ފީއެއް ނަގައިގެން ކަމަށް ބައެއް ފަރާތްތަކުން ދަނީ ވާހަކަ ދައްކަމުންނެވެ.
މިކަމާ ބެހޭ ގޮތުން އެސްޔޫއެލް ހިންގެވުމާ ހަވާލުވެ ހުންނެވި އަބްހަރީ އަބްދުﷲ ޒުހައިރު މިއަދު ވިދާޅުވީ ކަނެކްޝަން ގުޅައި ދިނުމަށް އަދި އެއްވެސް ފީއެއް ނަގަން ނުފަށާ ކަމަށެވެ. އަދި ފީއެއް ނަގާ ކަމަށް ބުނެ ދައްކާ ވާހަކަތަކަކީ އޮޅުވާލަން ބަޔަކު ފަތުރާ ވާހަކަތަކެއް ކަމަށް އޭނާ ވިދާޅުވި އެވެ.
"ކަނެކްޝަނަށް އެދޭ ގެތަކަށް ހަމަ ހިލޭ ކަނެކްޝަން ވައްދައި ދެމުން އަންނަނީ. އެއްވެސް ފީއެެެެއް ނަގާކަށް އަދި ނުފަށާ،" ޒުހެއިރު ވިދާޅުވި އެވެ. "އަޅުގަނޑަށް ވެސް ބައެެއް މީހުން މިކަމާ އެބަ ގުޅާ. އެކަމަކު އެއީ ހަގީގަތެއް ނޫން."
އެސްޔޫއެލް އިން ބުނީ ފީ ދައްކައިގެން ކަނެކްޝަން ވައްދައި ދޭން ފަށާނީ އެކަަމަށް އާންމުކޮށް އިއުލާން ވެސް ކުރުމަށް ފަހު ކަމަށެވެ. އެގޮތުން 1،800ރ. ގެ ފީއެއް ނަގަން ނިންމާފައިވާ ކަމަށް އެ ކުންފުނިން ބުންޏެވެ.
"އެކަމަކު އަދި ނިންމާފައެއް ނެތް ކޮން އިރަކުން ފަށައިގެންތޯ ފީ ދައްކައިގެން ކަނެކްޝަން ގުޅައި ދޭނީ،" އޭނާ ވިދާޅުވި އެވެ. "އަޅުގަނޑުމެން އެކަން ފަހުން އިއުލާން ކުރާނަން."
އައްޑޫގައި ގާއިމުކޮށްފައިވާ ސަޕްލައި ފެނުގެ ހިދުމަތް މިވަގުތު ލިބެނީ އެ ރަށު ގާތްގަކަށް ވިއްސަކަށް ގޭބިސީއަށެވެ. އެހެން ނަމަވެސް ކަނެކްޝަނަށް އެދިގެން ގުޅަން ޖެހޭ 380 އަށް ވުރެ ގޭބިސީތައް އެބަ ހުރި ކަމަށް އެސްޔޫއެލް އިން ބުންޏެވެ.
ރައީސް ޑރ. މުހައްމަދު ވަހީދު އިއްޔެ އައްޑު އަށް ވަޑައިގެން ވިދާޅުވީ ހިތަދޫގެ 2،500 އެއްހާ ގޭބިސީތަކަށް ފަސް މަސް ދުވަހުގެ ތެރޭގައި ސަޕްލައި ފެން ފޯރުކޮށް ދީ ނިންމާލެވޭނެ ކަމަށެވެ. އަދި އައްޑޫގެ ބާކީ ހުރި ރަށްރަށަށް ވެސް މިއަހަރު ހިދުމަތް ދޭން ފެށޭނެ ކަަމަށް ވިދާޅުވި އެވެ.
މިހާރު ދޫކުރަން ފަށާފައި ވަނީ ބޯން ރައްކާތެރި ފެން ނޫން ކަމަށް ބުނެ އައްޑޫ ސިޓީ ކައުންސިލުން ވަނީ އެސްޔޫއެލް އަށާއި ސަރުކާރަށް ވަރަށް ބޮޑަށް ފާޑި ކިޔައިފަ އެވެ.
އެކަމަކު އެއީ ރަނގަޅު ވާހަކައެެއް ނޫން ކަމަށް އެސްޔޫއެލް އިން ބުންޏެވެ. އެ ކުންފުނިން ބުނީ ހިތަދޫގައި ގާއިމުކޮށްފައިވާ ޑިސަލިނޭޝަން ޕްލާންޓުން އުފައްދާ ފެނަކީ އެމްޑަބްލިއުއެސްސީގެ މިންގަނޑަށް ފެތޭ ފެން ކަމަށެވެ.