2013 ވަނަ އަހަރުގެ ރިޔާސީ އިންތިޚާބުގެ ދުވަސްވަރު މިހާރުގެ ރައީސް އަބްދުﷲ ޔާމީން ކެމްޕެއިން ކުރައްވަމުން ގެންދެވިއިރު އައްޑޫގައި ފަތުރުވެރިކަން ކުރިއަރުވާނެ ކަމުގެ ވައުދުވެވަޑައިގެންނެވިއެވެ. ވެރިކަމަށް ވަޑައިގަތުމަށް ފަހު ވެސް ފާއިތުވި މުއްދަތުގައި އެތައް ފަހަރަކު އެ ވާހަކަ ތަކުރާރު ކުރައްވައިފިއެވެ.
ތަފާތު ނަންނަމުގައި ރައީސް ޔާމީންގެ ސަރުކާރުގައި އައްޑޫގެ ފަތުރުވެރިކަމާއި ގުޅުން ހުރި މަޝްރޫޢުތައް ވެސް އިއުލާންކޮށްފިއެވެ.
2015 ވަނަ އަހަރުގެ ތެރޭގައި ސިޔާސީ ގޮތުން ސަރުކާރު "ނޭވާހޮޅިއަށް އެޅިފައި" އޮތްވައި ސ.އިސްމެހެލާ ހެރައިގައި ރިސޯޓެއް ތަރައްްގީ ކުރުމުގެ މަޝްރޫޢެއް އިއުލާންކުރިއެވެ. އެ މަޝްރޫއު އިއުލާންކުރިތާ އެތައް ދުވަހެއް ފަހުން ބަޔަކާއި ހަވާލުކޮށް އަންނަނީ މަސައްކަތް ކުރަމުންނެވެ. އެހެން ނަމަވެސް އެމަޝްރޫޢާއި ބެހޭ އެއްވެސް މައުލޫމާތެއް ސަރުކާރުގެ އެއްވެސް އިދާރާއަކުން ހާމައެއް ނުކުރެއެވެ.
ޚުދު ރައީސް ޔާމީން ވެސް އެވާހަކައެއް ނުދައްކަވައެވެ. އެހެން ނަމަވެސް ދޭތެރެއަކުން ކެމްޕެއިން އަށް އައްޑޫއަށް އަންނަ ޕީޕީއެމްގެ މަންދޫބުން އަމިއްލައަށް "މިއަހަރުގެ އޮކްޓޯބަރު މަހަށް އިސްމެހެލާ ހެރަ ހުޅުވޭނެ" ކަމަށް ބުނެފައި އެބަހުއްޓެވެ.
2017 ވަނަ އަހަރު ބޭއްވި ލޯކަލް ކައުންސިލް އިންތިޚާބާއި ދިމާކޮށް އައްޑޫގައި ރައީސް ޔާމީންގެ ސަރުކާރުން އިއުލާންކުރި، ގެސްޓް ހައުސް މަޝްރޫއަށް ވީ ނުވީ އެއް އެނގޭ އެއްވެސް މީހަކު ނެތެވެ. ރަސްމިއްޔާތު ކިތަންމެ "ބިޔަކޮށް" ބޭއްވި ނަމަވެސް އެމަޝްރޫޢުގެ އެއްވެސް މަސައްކަތެއް މިއަދާއި ހަމައަށް ވެސް ނުފެށެއެވެ. އަދި ފެށޭނެ ދުވަހެއް ވެސް ނޭނގެއެވެ.
ގެސްޓް ހައުސްގެ ބިޔަ މަޝްރޫޢާއި ބެހޭގޮތުން ސަރުކާރުގެ ވުޒާރާ އަކުން އަދި އެމްއައިޓީޑީސީ އަކުން ވެސް އެއްޗެއް ނުބުނެއެވެ.
ސ.ގަމުގައި ހުންނަ ދޫގަސް 2 ފަހަރެއްގެ މަތިން އެމްޕީއެލް އާއި ހަވާލުކޮށް އެތަން ހިންގަން ފަށާނެ ކަން ސަރުކާރުން ވަނީ ހާމަކޮށްފައެވެ. އެހެން ނަމަވެސް ދޫގަސް ވެސް މިހާރު ބޭނުން ކުރަމުން ދަނީ ޕީޕީއެމްގެ ކެމްޕެއިން އަށް އައްޑޫއަށް އަންނަ ސިޔާސީ މީހުން ބައްދަލުވުންތައް ބޭއްވުމަށެވެ.
ރައީސް ޔާމީންގެ 5 އަހަރުގެ ދައުރު ނިމެން ކުޑަ ދުވަސްކޮޅަކަށް ވެފައިވާއިރު، ރައީސް ޔާމީންގެ ސަރުކާރުން އިއުލާންކުރި ފަތުރުވެރިކަމުގެ މަޝްރޫޢަކުން އެންމެ އެނދެއް ވެސް ގާއިމެއް ނުކުރެވެއެވެ. އެއީ ސެޕްޓެމްބަރު މަހުގެ 23 ވަނަ ދުވަހު ބާއްވާ ރިޔާސީ އިންތިޚާބުގައި އެމަނިކުފާނަށް ކުރިމަތިވާނެ ބޮޑު ގޮންޖެހުމެކެވެ.