ރައީސް އަބްދުﷲ ޔާމީންގެ ސަރުކާރުގެ އަނިޔާވެރިކަމާއި ކޮރަޕްޝަނާއި ފަސާދަ ރައްޔިތުން ބޭނުން ނުވާކަމަށް ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު އަނާރާ ނައީމް ވިދާޅުވެއްޖެއެވެ.
އަނާރާ މިހެން ވިދާޅުވީ ރޭ ޖުމްހޫރީ ޕާޓީގެ މައި ޖަގަހައިގައި އިދިކޮޅު ފަރާތްތަކުން ކުރިއަށް ގެންދިޔަ ޖަލްސާއެއްގައި ވާހަކަ ދައްކަވަމުންނެވެ.
އަނާރާ ވިދާޅުވި ގޮތުގައި ކޮރަޕްޝަނާ ލައިގެން ކުރާ ތަރައްގީއެއް ރައްޔިތުން ބޭނުންނުވާ ކަމަށެވެ. އަދި ރައްޔިތުން ބޭނުންވަނީ ކޮރަޕްޝަނާއި ނުލައި ގެންނަ ތަރައްގީ ކަމަށެވެ.
ދިވެހި ރައްޔިތުން މިއަދު ތަހަންމަލް ކުރަމުންދަނީ ވަރަށް ހިތްދަތި އިހުސާސްތަކެއް ކަން ފާހަގަ ކުރައްވައި އަނާރާ ވިދާޅުވީ، އެއިހުސާސްތައް އުފާވެރިކަމަށް ބަދަލުކުރުމުގެ ފުރުސަތު ރިޔާސީ އިންތިޚާބުގައި އެބައޮތް ކަމަށެވެ.
މީގެ އިތުރުން ރައީސް ޔާމީންގެ ސަރުކާރުން ގާނޫނުތަކަށް ބަދަލު ގެނައުން އަނާރާ ސިފަކުރެއްވީ ޚުދުމުހުތާރު ވެރިކަން ދެމެހެއްޓުމަށް ކުރާ ކަމެއްގެ ގޮތުގައެވެ. އަދި އެއީ ސަރުކާރުން ކުރި އެންމެ ނުރައްކާތެރި ކަންތަކުގެ ގޮތުގައި އަނާރާ ވަނީ ވިދާޅުވެފައެވެ.
އަނާރާ ވިދާޅުވި ގޮތުގައި، މިހާރުގެ ހާލަތަށް ބަލާއިރު ހުރިހާ ބާރެއް ވަނީ ރައީސް ޔާމީންގެ މުށުތެރެއަށް ލައްވާފައި ކަމަށެވެ. އެހެން ނަމަވެސް އެއީ ދިވެހިން ބޭނުންވާ ގޮތް ނޫން ކަމަށާއި ދިވެހިން ބޭނުންވަނީ ބާރުތައް ވަކިވެފައިވާ ނިޒާމެއް ކަމަށެވެ.