މެލޭޝިޔާގައި 1981 އިން 1986 އަށް މަހާތީރު މުހައްމަދު ބޮޑުވަޒީރުކަން ކުރެއްވި އިރު އެމަނިކުފާނުގެ ނައިބުގެ މަގާމުގައި ހުންނެވި ތުން މޫސާ ހިތާމް އާ ޢަދާލަތު ޕާޓީގެ ފަރާތުން ބައްދަލުކޮށްފިއެވެ.
ތުން މޫސާ އާއި އެކު ޢަދާލަތު ޕާޓީން ބޭއްވި މި ބައްދަލުވުން ކުރިއަށް ގެންދިޔައީ މެލޭޝިޔާގައި ހުންނަ ތުން މޫސާގެ އޮފީހުގައެވެ.
މި ބައްދަލުވުމުގައި އަދާލަތުގެ ފަރާތުން ބައިވެރިވެވަޑައިގެންނެވި ވަފުދުގެ އިސް ބޭފުޅަކަށް ހުންނެވީ ދިވެހިރާއްޖޭއިން މެލޭޝިޔާއަށް ކަނޑައަޅުއްވާފައި ހުންނަވާ ސަފީރުކަން ވެސް ކުރައްވާފައިވާ އަލްފާޟިލް މުޙައްމަދު ޒަކީ (ނަޒާކީ ޒަކީ) އެވެ.
އަދާލަތުން މައުލޫމާތު ދިން ގޮތުގައި މި ބައްދަލުވުމުގައި މައިގަނޑުގޮތެއްގައި މަޝްވަރާކޮށްފައި ވަނީ ދިވެހިރާއްޖޭގެ ސިޔާސީ މަސްރަޙާ ގުޅޭގޮތުންނެވެ. އެގޮތުން ރިޔާސީ އިންތިޚާބާއި ކުރިމަތިލާއިރު އިދިކޮޅު 4 ލީޑަރުންނަށް ކުރިމަތިކޮށްފައިވާ ސިޔާސީ ފިއްތުންތަކާއި ބެހޭގޮތުން ތުން މޫސާ އާއި ވަނީ މައުލޫމާތު ހިއްސާކޮށްފައެވެ.
އަދާލަތު ޕާޓީން ތުން މޫސާ އާއި ބައްދަލުކުރި އިރު އެބޭފުޅާ އަކީ، 2005 ވަނަ އަހަރުން 2008 ގެ ނިޔަލަށް އދ އިން ދިވެހިރާއްޖެ އަށް ކަނޑައަޅުއްވާފައި ހުންނެވި ޚާއްސަ މަންދޫބު ވެސް މެއެވެ. އަދި މީގެ އިތުރުން ތުން މޫސާ އަކީ ކޮމަންވެލްތު ޕާލަމެންޓްރީ އެސޯސިއޭޝަންގެ ޗެއަރމަން ކަން ކުރައްވާ އަދި ކޮމަންވެލްތުގެ ފަރާތުން މެންބަރު ޤައުމުތަކުގެ އިންތިޚާބުތައް އޮބްޒާވްކުރެއްވުމާއި ސިޔާސީ ހަމަނުޖެހުންތަކަށް ޙައްލު ހޯއްދެވުންފަދަ މުހިންމު މަސައްކަތްތަކެއް ކުރައްވާފައިވާ ބޭފުޅެކެވެ.