ރެއާލް މެޑްރިޑުން ޔުވެންޓަސް އަށް ބަދަލުވި ކްރިސްޓިއާނޯ ރޮނާލްޑޯގެ ބަދަލުގައި އޮލިމްޕިކް ލިޔޯން އަށް ކުޅެމުން އަންނަ ރެއާލްގެ ކުރީގެ ކުޅުންތެރިޔާ މަރިއާނޯ ޑިއާޒް ގެނެސްފިއެވެ.
ރެއާލް އަށް މަރިއާނޯ ބަދަލުވެފައިމިވަނީ ފަސް އަހަރު ދުވަހުގެ އެއްބަސްވުމެއްގެދަށުން 23 މިލިއަން ޔޫރޯގެ ފީ އަކަށް ކަމަށް އެންމެ ފަހުގެ މީޑިއާ ރިޕޯޓްތަކުގައިވެއެވެ.
ރެއާލްގެ ސީ ޓީމުގައި 2012 ވަނަ އަހަރުން ފެށިގެން 2016 ވަނަ އަހަރާއި ހަމައަށް ކުޅުމަށްފަހު، ޖެހިގެން އައި ސީޒަނުގައި ސީނިއާ ޓީމުން ޖާގަ ހޯދައި އެއް އަހަރު ހޭދަކުރުމަށްފަހު މަރިއާނޯ 2017 ވަނަ އަހަރުގެ ޖުލައި މަހު ލިޔޯން އަށް ގެންދިޔައީ 8 މިލިއަން ޔޫރޯ އަށެވެ. އެކަމަކު، ރެއާލުން ބޭނުންވެއްޖެ ހާލަތެއްގައި ރަނގަޅު އަގެއްގައި އޭނާ އަނބުރާ ގަތުމުގެ ފުރުސަތު ރެއާލަށް އޮތުމުން ރެއާލުން އޭނާ އަނބުރާ ގެނެސްފައިމިވަނީ އެ މާއްދާގެ ދަށުންނެވެ.
އުމުރުން 25 އަހަރުގެ މަރިއާނޯ ވަނީ ލިޔޯންގައި ހޭދަކުރީ މަދު ދުވަސްކޮޅުގައި މޮޅު ކުޅުމެއް ދައްކައި 48 މެޗުގައި 21 ގޯލް ޖަހައިދީފައެވެ. ފްރެންޗް ލީގުގައި މަރިއާނޯ ދެއްކި ރަނގަޅު ކުޅުމުގެ ސަބަބުން ޔޫރަޕްގެ ގިނަ ކްލަބްތަކުން ގެންދިއުމަށް ޝައުގުވެރިކަން ފާޅުކޮށްފައިވެއެވެ.
އެގޮތުން، މިފަހަރުގެ ޓްރާންސްފާ ބާޒާރުގައި ސްޕެނިޝް ލީގުގެ ކްލަބު ސެވިއްޔާ އިން އޭނާ ގެންދިއުމަށް މަސައްކަތްކޮށް އެއްބަސްވުމަކަށް އައުމުގެ މަގުމަތީގައި ވަނިކޮށް ރޮނާލްޑޯ ނެތްތަން ފޫބެއްދުމަށް ރެއާލުން އޭނާ ގެންގޮސްފައިމިވަނީ ލިޔޯން އަށް ވިއްކާލިއިރު އެއްބަސްވުމުގައި ބަޔާންކޮށްފައިވާ އަނބުރާ ގަތުމުގެ ފުރުޞަތު ލިބިދޭ މާއްދާގެ ދަށުންނެވެ.
ސްޕެއިނަށް އުފަން މަރިއާނޯ ވަނީ ޑޮމިނިކަން ރިޕަބްލިކްގެ ޤައުމީ ޓީމަށް އެއް މެޗު ކުޅެ 1 ގޯލް ކާމިޔާބުކޮށްފައެވެ. އެހެން ނަމަވެސް، ފަހުން އޭނާ ވަނީ ޤައުމީ ޓީމަށް ކުޅުން ހުއްޓާލައިފައެވެ. އެއީ ރެއާލަށް އިތުރުވަގުތު ދިނުމުގެ ގޮތުން ކަމަށް އޭނާ ވަނީ ބުނެފައެވެ.
ރެއާލްގެ ކުޅުންތެރިއެއްގެ ގޮތުގައި މަރިއާނޯ ދައްކާލުމަށް ހަމަޖެހިފައިވަނީ ހުކުރު ދުވަހު ކަމަށް މީޑިއާ ރިޕޯޓްތަކުގައިވެއެވެ. މިހަފްލާ ބޭއްވުމަށް ހަމަޖެހިފައިވަނީ ސެންޓިއާގޯ ބާނެބެއުގައެވެ.