ޔޫއެފާ ޗެމްޕިއަންސް ލީގުގެ ގުރޫޕް ސްޓޭޖުގެ ގުރުއަތުލުން ޔުއެފާއިން ފްރާންސްގެ މޮނާކޯގައި ބާއްވައިފިއެވެ.
މިމުބާރާތުގެ ގުރުނެގުމުގެ ރަސްމިއްޔާތު ރޭގެ ވަގުތެއްގައި ބޭއްވިގެންދިޔައިރު، ވަރުގަދަ ޓީމުތަކެއް ވަނީ ބައްދަލުކުރަން ޖެހިފައެވެ. އެގޮތުން، މިފަހަރުގެ 'ގްރޫޕް އޮފް ޑެތު' ކަމަށް ގިނަ ބަޔަކު އެއްބަސްވާ ގްރޫޕް ސީގައި ހިމެނިފައިވަނީ އެންމެ ފަހުގެ ރަނަރަޕް ލިވަޕޫލްގެ އިތުރުން ފްރާންސްގެ ޗެމްޕިއަން ޕީއެސްޖީ އާއި އިޓަލީގެ ނަޕޯލީ އަދި ސާބިޔާ އަށް ނިސްބަތްވާ ރެޑް ސްޓާ ބެލްގްރޭޑް އެވެ. މީގެއިތުރުން، އެންމެ ފަހުގެ ޗެމްޕިއަން ރެއާލް މެޑްރިޑް މިފަހަރު ލައްވާލީ އޭއެސް ރޯމާ އާއި ސީއެސްކޭއޭ މޮސްކޯ އަދި ވިކްޓޯރިއާ ޕްލެޒެން އާއެކު ގްރޫޕް ޖީގައެވެ.
ޕޯޗުގަލްގެ ތަރި ކްރިސްޓިއާނޯ ރޮނާލްޑޯގެ މިހާރުގެ ކްލަބު އިޓަލީގެ ޗެމްޕިއަން ޔުވެންޓަސް އާއި އޭނާގެ އެންމެ ކުރީގެ ކުލަބު މެންޗެސްޓަރ ޔުނައިޓެޑް ހިމެނިފައިވަނީ ގްރޫޕް އެޗްގައެވެ. މިގުރޫޕުގައި ދެން ހިމެނެނީ ސްޕެއިނުގެ ވެލެންސިއާ އާއި ސްވިޒަލޭންޑްގެ ޔަންގް ބޯއީސް އެވެ.
ސްޕެއިނުގެ ޗެމްޕިއަން ބާސެލޯނާ ހިމެނިފައިވަނީ އިނގިރޭސި ކްލަބު ޓޮޓެންހަމް ހޮޓްސްޕާ އާއި އިންޓަ މިލާން އަދި ޕީއެސްވީ އެއިންދޮވަން އާއެކު ގްރޫޕް ބީ ގައެވެ.
މިފަހަރުގެ ގުރުނެގުމުގެ ރަސްމިއްޔާތުގައި ޓީމުތައް ބެހިގެންދިޔަގޮތުން ދެން އެންމެ ފާހަގަކޮށްލެވެނީ ގްރޫޕް އީ އެވެ. މިގްރޫޕުގައި ހިމެނޭ ހަތަރު ޓީމުގެ ތެރެއިން ތިން ޓީމަކީ މީގެކުރީން ޗެމްޕިއަންސް ލީގުގެ ތަށި ކާމިޔާބުކޮށްފައިވާ ތިން ޓީމެވެ. އެގޮތުން، މިތިން ޓީމު އެއްކޮށް ޖުމްލަ 11 ފަހަރު މިމުބާރާތުގެ ތަށި ކާމިޔާބުކޮށްފައިވެއެވެ. އެއީ، ފަސް ފަހަރު ޗެމްޕިއަންކަން ހޯދައިފައިވާ ބަޔާން މިއުނިކާއި ހަތަރު ފަހަރު ކާމިޔާބުކޮށްފައިވާ އަޔެކްސް އެމްސްޓެޑާމްގެ އިތުރުން ދެ ފަހަރު ތަށި ހޯދައިފައިވާ ބެންފީކާ އެވެ. މިގްރޫޕުގައި ދެން ހިމެނެނީ ގްރީސްގެ އޭއީކޭ އެތެންސް އެވެ.
ޔޫރޮޕާ ލީގުގެ އެންމެ ފަހުގެ ޗެމްޕިއަން އެތުލެޓިކޯ މެޑްރިޑާއި ޖަރުމަނުގެ ބޮރޫޝިއާ ޑޯޓްމުންޑްގެ އިތުރުުން ފްރާންސްގެ މޮނާކޯ އަދި ބެލްޖިއަމްގެ ކުލަބް ބުރޫޖް ގްރޫޕް އޭގައި ހިމެނިފައިވާއިރު އިނގިރޭސި ވިލާތުގެ ޗެމްޕިއަން މެންޗެސްޓަރ ސިޓީ، ޖަރުމަނުގެ ދެވަނަ ހޯދައިގެން ކޮލިފައިވީ ހޮފެންހައިމް އާއި ފްރާންސްގެ އޮލިމްޕިކް ލިޔޯން އަދި ޝަކްތަރު ޑޮނެސްކް ހިމެނިފައިވަނީ ގްރޫޕް އެފް ގައެވެ.
މިފަހަރު އެންމެ އާދައިގެ ގުރޫޕެއްގެ ގޮތުގައި ފާހަގަވެފައިވަނީ ގްރޫޕް ޑީ އެވެ. މިގްރޫޕުގައި ހިމެނެނީ ޖަރުމަނުގެ ޝާލްކާ އާއި ޕޯޗުގަލްގެ ޗެމްޕިއަން ޕޯޓޯ އަދި ތުރުކީގެ އެންމެ ފަހުގެ ޗެމްޕިއަން ގަލަތަސާރޭގެ އިތުރުން ރަސިޔާގެ ކްލަބު ލޮކޮމޯޓިވް މޮސްކޯ އެވެ.
ގްރޫޕް ސްޓޭޖުގެ ފުރަތަމަ މެޗުތަށް އަންނަ ސެޕްޓެންބަރު މަހުގެ 18 އަދި 19 ގައި ކުޅުމަށް ހަމަޖެހިފައިވާއިރު މިމުބާރާތުގެ ފައިނަލް މެޗު އޮންނާނީ 2019 ވަނަ އަހަރުގެ ޖޫން މަހުގެ 1 ވަނަ ދުވަހު މެޑްރިޑްގެ އެސްޓާޑިއޯ މެޓްރޮޕޮލިޓާނޯގައެވެ. މިއީ ސްޕެއިނުގެ ކްލަބު އެތުލެޓިކޯ މެޑްރިޑްގެ ދަނޑެވެ.