ނޯޓް: މި އާޓިކަލަކީ ހުޅުމީދޫ ދާއިރާގެ ކައުންސިލަރު އަދި އައްޑޫ ޑެޕިއުޓީ މޭޔަރު ހަސަން ޝާހިދު އޭނާގެ އަމިއްލަ ބްލޮގް "ވެލްކަމް ޓް ޝާހިދު ލައިވް" ގައި އެޕްރީލް 22، 2013 ވަނަ ދުވަހު ޝާއިއުކޮށްފައިވާ ލިއުމެކެވެ.
ކިޔުންތެރިންނަށް މުހިއްމު ވެދާނެ ކަމަށް ބަލާފައި މި އާޓިކަލް "އައްޑޫ ލައިވް" ގައި ޝާއިއު ކުރަން ނިންމީ އެވެ.
—————————————————————————————————
ދެހާސް އެގާރަ ވަނަ އަހަރު އައްޑޫ ސިޓީގައި ބޭއްވުނު ސާކް ސަމިޓާ ގުޅިގެން ހިންގުނު ތަރައްޤީގެ މަޝްރޫޢުތަކުގެ ތެރެއިން، ހިތަދޫ ބޮޑުމަގު ރަނގަޅު ފެންވަރަކަށް ތާރު އަޅައިގެން ހެދުމަށް ސަރުކާރުން ނިންމެވުމާ ގުޅިގެން ހިތަދޫ ބޮޑު މަގުގެ މަގު ބައްތި ބަދަލު ކުރުމަށްޓަކައި، ކައުންސިލްގައި މަޝްވަރާ ކުރެވި ހުރިހާ ކައުންސިލަރުންނަށް އެއްބަސްވެވުނީ، އައްޑޫގެ ހުރިހާ އަވަށްތަކުގެ ބޮޑު މަގުތަކާއި، ބަނދަރުތަކުގެ ބައްތި ބަދަލު ކުރުމަށެވެ.
އެގޮތުން ބޮޑު މަގުތަކުގެ ބައްތި ބަދަލު ކުރުމަށް ސިންގަލް ހެޑް ބައްތި ދަނޑި އާއި އޭގެ ބޮކި އަދި ބަނދަރުތަކަށް ޑަބަލް ހެޑް ބައްތި ދަނޑި އާއި އޭގެ ބޮކި ކައުންސިލަށް ހޯދުނެވެ. ހަމަ އެއާ އެކު ބައްތި ހަރު ކުރުމަށް ބޭނުންވާ ބުޑުތައް ވެސް ކައުންސިލުން ތައްޔާރު ކުރި އެވެ.
މިހާތަނަށް ބައްތި ބަދަލު ކުރުމުގެ މަސައްކަތް ނުކުރެވި އޮތީ މިކަމަށް ހޭދަވާނެ ފައިސާ 2012 ވަނަ އަހަރުގެ ބަޖެޓަށް ވެސް ލިބިފައި ނުވުމާ އެކު މިމަސައްކަތްކޮށް ދިނުމަށް ސަދަން ޔުޓިލިޓީސް ކުންފުނީގައި އެދުމުން އެ ކުންފުނިން ހުށަހަޅާ އަގުތައް ބޮޑުކަމުންނެވެ.
މި މަސައްކަތް ނުކުރެވި ދިގުލައިގެން ދިއުމާއި ގުޅިގެން 2013 ވަނަ އަހަރުގެ ބަޖެޓް ކައުންސިލުން ތައްޔާރު ކުރީ، މި މަސައްކަތައް ވަރަށް ބޮޑަށް އިސްކަންދީ ގެންނެވެ. އެގޮތުން އައްޑޫ ސިޓީގެ ހުރިހާ އަވަށްތަކުގެ ބޮޑު މަގުތަކާއި، ބަނދަރު ބައްތި ބަދަލު ކުރުމަށް ހިނގާނެ ޚަރަދު ކައުންސިލްގެ އާމްދަނީން ހަމަޖެއްސުމަށް ނިންމެވި އެވެ.
ކައުންސިލްގެ އާމްދަނީން ޚަރަދުކޮށްގެން މަގު ބައްތި ބަދަލު ކުރުމަށް ނިންމުމާ ގުޅިގެން، ސާކް ސަމިޓަށް ހިތަދޫ ބޮޑު މަގުގެ ބައްތި ބަދަލު ކުރުމަށް އެސްޔޫއެލް އިން ހުށަހެޅި ބިލްތަކުގެ ފައިސާ އަދާކޮށް، ދެން ހުރި އަވަށްތަކުގެ މަގު ބައްތި ބަދަލު ކުރުމުގެ މަސައްކަތް ވަނީ ފަށައި ގަނެވިފަ އެވެ.
ހަމައެއާ އެކު މި މަސައްކަތް ކުރިއަށްގެން ދިއުމުގައި ކައުންސިލުން އެންމެ ބޮޑު ސަމާލު ކަމެއް ދީފައި ވަނީ، މިކަން ކުރުމުގައި އެ އަވަށެއްގެ ރައްޔިތުންގެ ޚިޔާލާއި މަޝްވަރާ ހޯދައިގެން ކުރިއަށް ގެންދިއުމަށެވެ.
އެގޮތުން މަރަދޫ ބޮޑު މަގުގައި ބައްތި ޖަހާފައި ވަނީ މަގުގެ އެއް ފަރާތުގައެވެ. ފޭދޫގެ ބޮޑު މަގުގައި ބައްތި ޖަހަން އެ އަވަށުގެ ރައްޔިތުން މަޝްވަރާދީފައި ވަނީ މަގުގެ ދެ ފަރާތުގައި ބައްތި ޖަހާ ގޮތަށެވެ.
އެހެންކަމުން ހުޅުމީދޫ ބޮޑު މަގުގެ ބައްތި ބަދަލުކުރާ އިރު މިކަމުގައި ރައްޔިތުންގެ މަޝްވަރާއަކީ ކޮބައިތޯ ބެލުމަށްޓަކައި ހުޅުމީދޫ އަވަށުގެ އިޖްތިމާއީ ކަންކަމުގައި ވަރަށް އިސްކޮށް ހަރަކާތްތެރިވާ ބޭފުޅުންކޮޅަކާ ބައްދަލުކޮށް މަޝްވަރާ ހޯދީމެވެ.
ނަމަވެސް މި މަޝްވަރާ އިން ހުޅުދު އާއި މީދޫގެ ބޭފުޅުންގެ ޚިޔާލު ވަރަށް ބޮޑަށް ތަފާތުކަން ފާހަގަ ކުރެވުނެވެ. މީދޫގެ ބޭފުޅުން މަޝްވަރާ ދެއްވީ މަގުގެ މެދުގައި ބައްތި ޖެހުމަށެވެ. ހުޅުދޫގެ ބޭފުޅުން މަޝްވަރާ ދެއްވީ މަގުގެ ދެ ފަރާތުގައި ބައްތި ޖެހުމަށެވެ.
ހުޅުމީދޫގެ ބޮޑު މަގުގެ ފުޅާ މިނަކީ 42 ފޫޓެވެ.