އުންމީދީ ހުރިހާ ހުވަފެނެއް ފެންނަނީ ފިޔާތޮށި ކުލައިން ކަމަށް ރައީސް އަބްދުﷲ ޔާމީން އަބްދުލްގައްޔޫމު ވިދާޅުވެއްޖެއެވެ.
ދ.ކުޑަހުވަދޫގެ ރައްޔިތުންނާއި ބައްދަލުކުރައްވައި ވާހަކަ ދައްކަވަމުން ރައީސް ޔާމީން ވިދާޅުވި ގޮތުގައި، މިއަދު ފިރިހެނަކު ފެނުނަސް އަދި ކަނބަލަކު ފެނުނަސް ހުރީ ފިޔާތޮށި ކުލައިން ކަމަށެވެ.
ކުކުޅު ބިހެއް ނުވަތަ ދޮންކެޔޮވަކެއް ފެނުނަސް ހުރީ ފިޔާތޮށި ކުލަ ކަމަށް ވިދާޅުވެ ރައީސް ޔާމީން ވަނީ އެހެން ކުލައަކަށް ޖާގަ ދޭންވީ ކީއްވެގެންތޯ ސުވާލު އުފައްދަވާފައެވެ.
"ފިރިހެނަކު ފެނުނަސް ފިޔާތޮށި ކުލައިން. ކަނބަލަކު ފެނުނަސް ފިޔާތޮށި ކުލައިން. ކުކުޅު ބިހެއް ފެނުނަސް ފިޔާތޮށި ކުލައިން. ދޮންކެޔޮވަކެއް ފެނުނަސް ފިޔާތޮށި ކުލައިން." ރައީސް ޔާމީން ވިދާޅުވިއެވެ.
ރައީސް ޔާމީން އިތުރަށް ވިދާޅުވި ގޮތުގައި ކެންޑިޑޭޓް ނަމްބަރު އެކަކަށް ވޯޓު ދީފި ނަމަ ހުރިހާ ކަމަކުން ވެސް އެއް ވަނަ ލިބޭނެއެވެ.
އަދި މީގެ އިތުރުން އިދިކޮޅު ކޯލިޝަނުގެ ކެންޑިޑޭޓް ވެވަޑައިގެންފައިވާ ބައެއް ވައުދުތަކަށް ވެސް ރައީސް ޔާމީން ވަނީ އެ ޖަލްސާގައި ވަރަށް ބޮޑަށް ފާޑު ވިދާޅުވެފައެވެ.