މަޝްހޫރު ދީނީ ޢިލްމުވެރިޔާ ޝައިޚް އިލްޔާސް ހުސައިން، ފުލުހުންގެ އިދާރާ އަށް ހާޒިރުވާން އަންގައިފި އެވެ.
ޝެއިޚް އިލްޔާސް ފުލުހަށް ހާޒިރު ކުރުމަށް ނިންމާފައިވާކަން ހާމަކުރެއްވީ ފުލުހުންގެ ތަރުޖަމާނު އަހުމަދު ޝިފާނެވެ.
ހޮނިހިރު ދުވަހު ރޭ އައްޑޫ ސިޓީގައި ބޭއްވި ޖަލްސާއެއްގައި ވާހަކަދައްކަވަމުން އިލްޔާސް ވަނީ އަފްރާޝީމްގެ މަރާ ގުޅުން ހުރި، ނުވަ ގަތުލެއް މިހާތަނަށް ރާއްޖޭގައި ހިނގާފައިވާ ކަމަށް ތުހުމަތު ކުރެވޭ ކަމަށް ވިދާޅުވެފައެވެ. އިލްޔާސްގެ މި ވާހަކަތަކަށް ރައްދު ދިނުމުގެ ގޮތުން ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ޝިފާން ވިދާޅުވީ، އެފަދަ މައުލޫމާތެއް ފުލުހުންގެ ތަހުގީގަށް މިހާތަނަށް ލިބިފައި ނުވާ ކަމަށެވެ.
އެހެންވެ އެ މައްސަލާގައި އިލްޔާސްއާ ސުވާލު ކުރުމަށް އޭނާ ފުލުހަށް ހާޒިރުވުމަށް އަންގާފައިވާނެ ކަމަށް ޝިފާން ވިދާޅުވިއެވެ.
އިލްޔާސް ފުލުހަށް ހާޒިރުކުރަން ނިންމާފައި މިވަނީ އެބޭފުޅާ ހައްޔަރުކުރަން ޖެހޭ ކަމަށް ވިލިމާލޭ ދާއިރާގެ މެންބަރު ނިހާން ވިދާޅުވިތާ 3 ދުވަހުގެ ތެރޭގައެވެ.