ސާފް ސުޒުކީ ކަޕްގެ ގްރޫޕް ބީ ގައި މިރޭ ކުޅުނު މެޗުން ސްރީ ލަންކާ ބަލިކޮށް އެންމެ ފަހުގެ ޗެމްޕިއަން އިންޑިޔާއިން މޮޅަކުން ފަށައިފިއެވެ. މިމެޗު 2-0 އިން ކާމިޔާބުކޮށް އިންޑިޔާއިން ވަނީ ސެމީ އަށް ދިއުމުގެ ފުރުޞަތު ބޮޑުކޮށްފައެވެ.
ގްރޫޕް ބީގައި ސްރީލަންކާ އާއި އިންޑިއާގެ އިތުރުން ހިމެނެނީ ދިވެހިރާއްޖެ އެވެ. އިންޑިއާ އަށް މި މެޗުން ލިބުނު ތިން ޕޮއިންޓާއިއެކު، އެޓީމަށް ދެން ބާކީ އޮތް މެޗުން ރާއްޖެ އާ ދެކޮޅަށް ކުޅެ ޕޮއިންޓެއް ހޯދައިފިނަމަ އެޓީމަށް ސެމީގެ ޖާގަ ކަށަވަރުވެގެންދާނެއެވެ. އޭގެކުރީން، މިގްރޫޕުގައި ދެން ކުޅޭ މެޗުގައި ރާއްޖެ އަތުން ލަންކާ ބަލިވެއްޖެނަމަވެސް އިންޑިޔާ ސެމީ އަށް ދަތުރުކުރާނެއެވެ.
ސާފް ޗެމްޕިއަންޝިޕްގެ އެންމެ ކާމިޔާބު ޓީމު އިންޑިޔާއިން މިފަހަރުގެ މުބާރާތަށް ގެނެސްފައިވަނީ އެޤައުމުގެ 23 އަހަރުން ދަށުގެ ޤައުމީ ޓީމެވެ. މީގެކުރީން، 2009 ވަނަ އަހަރުގެ މުބާރާތުގައިވެސް އިންޑިޔާގެ 23 އަހަރުން ދަށުގެ ޤައުމީ ޓީމު ވަނީ ކުޅެފައެވެ. އެފަހަރު ފައިނަލްގައި ޕެނަލްޓީ ޖަހައިގެން ދިވެހިރާއްޖެ ބަލިކޮށް އިންޑިޔާއިން ޗެމްޕިއަންކަން ހޯދައިފައިވެއެވެ.
ބަންގްލަދޭޝްގެ ބަންގުބަންދު ސްޓޭޑިއަމްގައި ލަންކާ އާ ދެކޮޅަށް ކުޅުނު މެޗުގެ ފުރަތަމަ ހާފުގެ 35 ވަނަ މިނެޓުގައި އިންޑިޔާ އަށް ލީޑް ނަގައިދިނީ ޕޫނޭ ސިޓީގެ ވިންގާ އާޝިގް ކުރުނިއަން އެވެ. މެޗުގެ ފުރަތަމަ ހާފު ނިމުނީ 1-0 ގެ ނަތީޖާއަކުން އިންޑިޔާ ކުރީގައިއޮވެގެންނެވެ.
ދެވަނަ ހާފުގެ ކުޅުން ފެށިތާ ކުޑައިރުކޮޅެއްގެތެރޭގައި އިންޑިޔާގެ ދިއްލީ ޑައިނަމޯސްގެ ވިންގާ ލަލިއަންޒުއާލާ ޗަންގްޓޭ ވަނީ ނަތީޖާ 2-0 އަށް ބަދަލުކޮށްލާފައެވެ. އޭގެފަހުން، އިންޑިޔާގެ ލީޑް ފުޅާކުރުމަށް ލިބުނު ފުރުޞަތުތަކުގައި އެޓީމުގެ ކުޅުންތެރިން ފޮނުވާލި ގިނަ ހަމަލާތަކުގެ ހުރަހަކަށްވީ ރާއްޖޭގެ ކްލަބް އީގަލްސް އަށް ކުޅެމުން އަންނަ ލަންކާގެ ގޯލްކީޕަރު ސުޖަން ޕެރޭރާއެވެ.
ސާފް ސުޒުކީ ކަޕް ގައި މާދަމާ ދެމެޗު ކުޅުމަށް ހަމަޖެހިފައިވާއިރު، މާލޭގަޑިން 15:00 ގައި ކުޅޭ މެޗުގައި ބޫޓާން އާއި ނޭޕާލް ބައްދަލުކުރާއިރު 18:00 ގައި ކުޅޭ މެޗުގައި ޕާކިސްތާން ނިކުންނާނީ މުބާރާތް ބާއްވާ ޤައުމު ބަންގްލަދޭޝް އާ ދެކޮޅަށެވެ.
މިމުބާރާތުގައި ރާއްޖެ ކުޅޭ ފުރަތަމަ މެޗުގައި އަންނަ ހުކުރުދުވަހު މާލޭގަޑިން 18:00ގައި ނިކުންނާނީ ލަންކާ އާ ދެކޮޅަށެވެ.