އެމެރިކާގެ މޭޖާ ލީގު ސޮކާ (އެމްއެލްއެސް) ގައި ކުޅުމަށް އިނގިރޭސިވިލާތުގެ ކުރީގެ ފުޓްބޯޅަ ކުޅުންތެރިޔާ ޑޭވިޑް ބެކަމް އުފެއްދި ޓީމުގެ ނަމާއި ލޯގޯ ހާމަކޮށްފިއެވެ.
އެމެރިކާގެ މިއާމީ އަށް ނިސްބަތްކޮށް ބެކަމް ނެރޭ ޓީމުގެ ނަމަކަށް ކްލަބް އިންޓަނެސިއޮނާލް ޑެ ފުޓްބޯލް މިއާމީ ނުވަތަ އިންޓަ މިއާމީ ސީއެފް ކަނޑައަޅާފައިވާއިރު އެޓީމުގެ ލޯގޯ ގައި ހިމަނާފައިވަނީ ފިޔާތޮށި، ހުދު އަދި ކަޅު ކުލައެވެ.
އެމެރިކާގެ މޭޖާ ލީގު ސޮކާގައި އެޓީމު ވާދަކުރުމަށް ހަމަޖެހިފައިވަނީ 2020 ވަނަ އަހަރުގެ ސީޒަނުގައެވެ.
ޓީމުގެ ނަމާއި ލޯގޯ ހާމަކުރުމަށް ބޭއްވި ހަފްލާގައި ވާހަކަ ދައްކަމުން ބެކަމް ބުނީ މިއީ އެކްލަބަށާއި އޭނާ އަށް ފަހަރުވެރި ދުވަހެއްކަމަށެވެ. މީގެއިތުރުން، އެކްލަބުގެ ރަސްމީ ޓްވިޓަރ އެކައުންޓުން ކުރި ޕޯސްޓެއްގައި ވަނީ މިއަދަކީ މީގެ ހަތަރު އަހަރު ކުރީން ދެކެމުން އައި، ފުޓްބޯޅަ ކުލަބެއް އުފެއްދުމުގެ ހުވަފެން ހަޤީޤަތަކަށް ވީ ދުވަސް ކަމުގައެވެ.
މޭޖާ ލީގު ސޮކާގައި ވާދަކުރުމަށް ބެކަމް ކްލަބެއް އުފައްދާފައިވާއިރު އޭނާ ވަނީ ފުޓްބޯޅަ ކުޅުނު ދުވަސްވަރު އެމެރިކާ ލީގުގެ މަޝްހޫރު ކްލަބެއް ކަމަށްވާ ލޮސް އެންޖެލަސް ގެލެކްސީ އަށް ކުޅެފައެވެ. މީގެއިތުރުން ބެކަމް ވަނީ މެންޗެސްޓަރ ޔުނައިޓެޑާއި ރެއާލް މެޑްރިޑާއި އޭސީ މިލާންގެ އިތުރުން ޕީއެސްޖީ އަށް ވެސް ކުޅެފައެވެ.