ފްރާންސް ލީގުގައި، މިދިޔަ ހޮނިހިރު ދުވަހު ނީމްސް އާ ދެކޮޅަށް ކުޅެ 4-2 އިން ޕީއެސްޖީ މޮޅުވި މެޗުގައި އެޓީމުގެ ކިލިއަން އެމްބާޕޭ އަށް ދެއްކި ރަތްކާޑާއި ގުޅިގެން އޭނާ ތިން މެޗަށް ސަސްޕެންޑް ކޮށްފި އެވެ. މިއީ އޭނާގެ ފުޓްބޯޅަ ކެރިއަރުގައި ދެއްކި ފުރަތަމަ ރަތްކާޑެވެ.
ފްރެންޗް ލީގްގެ ޑިސިޕްލިނަރީ ކޮމިޓީން އެމްބާޕޭ އާ ދެކޮޅަށް ފިޔަވަޅު އެޅީ، އޭނާ އަށް ނީމްސްގެ ޓެޖީ ސަވަނިއާ ކުރި ނުރައްކާތެރި ފައުލަކާއި ގުޅިގެން އެކަމާއި ރުޅިއައިސްގެންގޮސް ސަވަނިއާ ކޮއްޕާލައި ބިން މައްޗަށް ވައްޓާލުމުންނެވެ. އޭގެ ކުރިންވެސް މެޗުގެ ފުރަތަމަ ހާފުގައި އެމްބާޕޭ އަށް ރީނދޫ ކާޑެއް ދައްކާފައިވާއިރު ރެފްރީ ވަނީ ވަގުތުން ރަތްކާޑު ދައްކައި ދެކުޅުންތެރިން ވެސް ދަނޑުން ފޮނުވާލައިފައެވެ. ޑިސިޕްލިނަރީ ކޮމިޓީން ވަނީ މިމައްސަލަަ ބެލުމަށްފަހު ސަވަނިއާ ވެސް ފަސް މެޗަށް ސަސްޕެންޑް ކޮށްފަ އެވެ.
އެމްބާޕޭ ތިން މެޗަށް ސަސްޕެންޑް ކުރުމުން ފްރެންޗް ލީގުގައި ޕީއެސްޖީ އަމިއްލަ ދަނޑުގައި ސެއިންޓް އެޓިއެން އާއި ރެއިމްސް އާ ދެކޮޅަށް ކުޅޭ މެޗުގެ އިތުރުން ރަށުން ބޭރުގައި ރޭނެސް އާ ބައްދަލުކުރާ މެޗުވެސް އޭނާ އަށް ގެއްލޭނެއެވެ. ނަމަވެސް، މިމަހު 19 ވަނަ ދުވަހު ޔޫއެފާ ޗެމްޕިއަންސް ލީގުގައި ރަށުން ބޭރުގައި ލިވަޕޫލާއި ދެކޮޅަށް ޕީއެސްޖީ ކުޅޭ މެޗުގައި އޭނާ އަށް ބައިވެރިވެވޭނެއެވެ.
ލީގުގައި މިހާތަނަށް ކުޅުނު ތިން މެޗުގައި އެމްބާޕޭ ހަތަރު ގޯލު ކާމިޔާބުކޮށްފައިވާއިރު، ޕީއެސްޖީ އޮތީ ލީގުގައި ކުޅުނު ހަތަރު މެޗުން ވެސް މޮޅުވެ ލިބުނު 12 ޕޮއިންޓާ އެކު ތާވަލްގެ އެއްވަނައިގައެވެ.
ވޯލްޑްކަޕްގެ އެންމެ މޮޅު ޒުވާން ކުޅުންތެރިޔާގެ މަޤާމް ހޯދި، އުމުރުން 19 އަހަރުގެ އެމްބާޕޭ އަށް ކުރިއަށް އޮތީ ޔޫއެފާ ނޭޝަންސް ލީގުގައި ޖަރުމަނާއި ދެކޮޅަށް ފްރާންސް ކުޅޭ މެޗެވެ. މިމެޗު ކުޅުމަށް ހަމަޖެހިފައިވަނީ މިއުނިކުގައި މާލޭގަޑިން މިރޭ 23:45 ގައެވެ.