ޖަރުމަނާއި ފްރާންސް އެއްވަރުވިއިރު ވޭލްސް އަށް މޮޅެއް

ޔޫރަޕްގެ ފުޓްބޯޅައިގެ މައި އިދާރާ ޔޫއެފާ އިން ދާދިފަހުން ތައާރަފްކުރި ޔޫއެފާ ނޭޝަންސް ލީގުގައި ރޭ ކުޅުނު މެޗުގައި ޖަރުމަނާއި ވޯލްޑްކަޕްގެ އެންމެ ފަހުގެ ޗެމްޕިއަން ފްރާންސް ބައްދަލުކުރި މެޗު ދެޓީމަށް ލަނޑެއްނުޖެހި އެއްވަރުވިއިރު ރަޔާން ގިގްސްގެ ކޯޗު ކަމުގައި ވޭލްސް ކުޅުނު ފުރަތަމަ މެޗުގައި ރިޕަބްލިކް އޮފް އަޔާލެންޑް އަތުން މޮޅުވެއްޖެއެވެ.

މިފަހަރުގެ މުބާރާތުގެ ޓީމުތައް ބަހާލައިފައިވާގޮތުން، ލީގު އޭގެ އެއްވަނަ ގުރޫޕުގައި ހިމެނެނީ ދުނިޔޭގެ ޗެމްޕިއަން ފްރާންސްގެ އިތުރުން ޖަރުމަނާއި ނެދަލޭންޑްސް އެވެ.

ގްރޫޕް 1 ގައި ޖަރުމަނާއި ދެކޮޅަށް ފްރާންސް ނިކުތްއިރު އެޓީމަށް ދިމާވި އެންމެ ބޮޑު މައްސަލައަކީ އަނިޔާގެ ސަބަބުން ކެޕްޓަން އަދި ގޯލްކީޕަރު ހޫގޯ ލޮރިސް އާއި ބަދަލު ކީޕަރު ސްޓީވް މަންޑަންޑާ އަށް ނުކުޅެވުމެވެ. މިދެކުޅުންތެރިންގެ ބަދަލުގައި އެޓީމުގެ ގޯލް ބެލެހެއްޓީ ފްރާންސް އަދި ޕީއެސްޖީގެ ތިންވަނަ ގޯލްކީޕަރު އަލްފޮންސޯ އަރެއޯލާ އެވެ. މިއީ ފްރާންސްގެ ޖާޒީގައި އޭނާ ކުޅުނު ފުރަތަމަ މެޗުކަން ފާހަގަކޮށްލެވެއެވެ.

ޖަރުމަނުގެ މިއުނިކްގެ އެލިއާންޒް އެރީނާގައި ވާރޭތެރޭގައި ޖަރުމަނާއި ދެކޮޅަށް ފްރާންސް ކުޅުނު މެޗުގެ ފުރަތަމަ ހާފުގައި ދެޓީމުގެ ފަރާތުން ދާދި ހަމަހަމަކުޅުމެއް ފެނިގެންގޮސްފައިވާއިރު ގިނަ ވަގުތު ބޯޅަ ގެންގުޅުނީ ޖަރުމަނެވެ.

އެހެންނަމަވެސް، ދެޓީމުގެ ފަރާތުން ގޯލަށް އަމާޒުކޮށް މާގިނަ ހަމަލާތަކެއް ފޮނުވާލެވިފައެއްނުވެއެވެ. އެގޮތުން މިހާފުގައި ޖަރުމަނުގެ ޓިމޯ ވާނާ އާއި މެޓްސް ހުމެލްސް އަށް ލަނޑުޖަހާނެ ރަނގަޅު ފުރުޞަތުތަކެއް ލިބިގެންދިޔައިރު ފްރާންސްގެ އޮލިވިއޭ ޖިރޫ އަށް ވަނީ ވަރަށް ރަނގަޅު ދެފުރުޞަތުލިބި ބޭކާރުވެފައެވެ. މެޗުގެ ފުރަތަމަ ހާފު ނިމުނީ ދެޓީމަށް ލަނޑެއްނުޖެހި އެއްވަރުވެގެންނެވެ.

ދެވަނަ ހާފު ފެށިގެން، ދެޓީމުން ވެސް ކުޅުން ރަނގަޅު ކުރިއެވެ. އެގޮތުން މިހާފުގައި ދެޓީމަށްވެސް ލަނޑުޖަހާނެ ރަނގަޅު ފުރުޞަތުތަކެއް ލިބިފައިވެއެވެ. އެހެންނަމަވެސް، ގޯލެއް ކާމިޔާބުކުރެވޭގޮތްވަނީ ނުވެފައެވެ.

ޖަރުމަނުގެ ތޯމަސް މުލާ އާއި މާކޯ ރޮއިސް އަދި މަތިއަސް ގިންޓާގެ އިތުރުން ހުމެލްސް ފޮނުވާލި ހަމަލާތަކުގެ ހުރަހަކަށްވީ މުޅި މެޗުގައި މޮޅު ކުޅުމެއް ދެއްކި ފްރާންސްގެ ކީޕަރު އަރެއޯލާ އެވެ. ފްރާންސްގެ އެންޓޮއިން ގްރީޒްމަން އަށް ލަނޑުޖެހުމަށް ލިބުނު ދެފުރުޞަތުގައި އޭނާ ފޮނުވާލި ބޯޅަތައް ޖަރުމަނުގެ ގޯލްކީޕަރު މެނުއަލް ނޯޔާ ވަނާ ފަސޭހަކަމާއިއެކު ދިފާއުކޮށްފައެވެ.

މިމުބާރާތުގައި ރޭ ކުޅުނު އެންމެ ފާހަގަކޮށްލެވޭ މެޗުގައި، ލީގު ބީގެ ގުރޫޕު ހަތަރެއްގައި ރަޔާން ގިގްސްގެ އިރުޝާދުގެ ދަށުން ވޭލްސް ކުޅުނު ފުރަތަމަ މެޗުގައި އެޓީމު ވަނީ ވަރަށް ފަސޭހަކަމާއިއެކު 4-1 އިން ރިޕަބްލިކް އޮފް އަޔާލެންޑް ބަލިކޮށްފައެވެ.

މިމެޗުގެ ފުރަތަމަ ހާފުގައި ވޭލްސް އިން ވަނީ ތިންލަނޑުގެ ލީޑެއް ނަގާފައެވެ. މެޗު ފެށިގެން 6 ވަނަ މިނެޓުގައި ޓޮމް ލޯރަންސް އެޓީމުގެ ފުރަތަމަ ގޯލް ކާމިޔާބުކުރިއިރު 18 ވަނަ މިނެޓުގައި ގަރެތު ބޭލް ވަނީ ނަތީޖާ 2-0 އަށް ބަދަލުކޮށްލާފައެވެ. މިހާފު ނިމެން 8 މިނެޓަށްވެފައިވަނިކޮށް އާރޮން ރަމްސީ ވަނީ އިތުރު ލަނޑެއްޖަހައިދީ ލީޑް ފުޅާކޮށްދީފައެވެ.

ދެވަނަ ހާފު ފެށިގެން 10 ވަނަ މިނެޓުގައި ވޭލްސްގެ ފަހު ލަނޑުޖަހައިދިނީ ކޮނާ ރޮބަޓްސް އެވެ. މިމެޗުގައި އަޔާލެންޑުން ޖެހި ހަމައެކަނި ލަނޑު 66 ވަނަ މިނެޓުގައި ކާމިޔާބުކޮށްދިނީ ޝޯން ވިލިއަމްސް އެވެ.

މިމުބާރާތުގައި ރޭ ކުޅުނު އެހެން މެޗުތަކުގައި، ޗެކް ރިޕަބްލިކް އަތުން ރަށުން ބޭރުގައި 2-1 އިން ޔޫކްރެއިން މޮޅުވިއިރު ސްލޮވީނިއާ އަތުން ބަލްގޭރިއާ މޮޅުވީވެސް ހަމަ މިނަތީޖާއިންނެވެ. ލީޗްޓެންސްޓެއިން އާ ދެކޮޅަށް ކުޅެ އާމީނިއާ މޮޅުވީވެސް 2-1 އިންނެވެ. ނޯވޭ އަތުން 2-0 އިން ސައިޕްރަސް ބަލިވިއިރު ކަޒަކިސްތާނު އަތުން ޖޯޖިއާ މޮޅުވީވެސް ހަމަ މިނަތީޖާއިންނެވެ. އެންޑޯރާ އާ ލެޓްވިއާ ކުޅުނު މެޗު ނިމުނީ ދެޓީމަށް ލަނޑެއް ނުޖެހި އެއްވަރުވެގެންނެވެ.

މި މުބާރާތުގައި ޔޫއެފާގެ މެމްބަރު 55 ގައުމު ވަނީ ރޭންކިން އަށް ބެލުމަށްފަހު 4 ލީގަކަށް ބަހާލެވިފައެވެ. ލީގު-އޭ އަދި ލީގު-ބީ، ކޮންމެ ލީގެއްގައި 12 ޓީމު ހިމެނޭއިރު، ލީގު-ސީ ގައި 15 ޓީމު އަދި ލީގު-ޑީ ގައި 16 ޓީމު ހިމެނެއެވެ. ކޮންމެ ލީގެއްވެސް ކުޅެވިގެން ދާނީ 4 ގުރޫޕަކަށް ބަހާލައިގެންނެވެ. ލީގު އޭގެ ހަތަރު ގްރޫޕުގެ ތެރެއިން އެއްވަނަ ހޯދާ ހަތަރު ޓީމު މިމުބާރާތުގެ ނޮކްއައުޓް ސްޓޭޖަށް ދަތުރުކުރާނެއެވެ. ނޮކްއައުޓް ސްޓޭޖުގައި ހިމެނެނީ ސެމީ ފައިނަލާއި ފައިނަލުގެ އިތުރުން ތިންވަނަ ހޮވާ މެޗެވެ. މިމެޗުތައް ކުޅެވޭނީ އަންނަ އަހަރުގެ ޖޫން މަހުގެ 5، 6 އަދި 9 ގައެވެ.

މީގެއިތުރުން، ހުރީހާ ލީގެއްގެ ކުޅުން ނިމޭއިރު ކޮންމެ ގްރޫޕެއްގެ އެންމެ ފުލަށް ދާ ޓީމު ދެން ޖެހިގެން ދަށަށް އޮންނަ ލީގަށް ރެލިގޭޓްވާނެއެވެ. ހަމަ މިގޮތަށް، ލީގު ބީ އިން ފެށިގެން ޑީ ގައި ހިމެނޭ ގުރޫޕްތަކުން އެންމެ ކުރި ހޯދާ ޓީމުތައް އެންމެ މައްޗަށް އޮންނަ ލީގަށް ޕްރޮމޯޓްވާނެއެވެ.

މިމުބާރާތުގައި މިރޭ ކުޅެވޭ މެޗުތަކަށް ބަލާއިރު، އިޓަލީ އާ ދެކޮޅަށް ޕޮލެންޑް ނިކުންނައިރު ތުރުކީ އާއި ރަޝިޔާ ބައްދަލުކުރާ މެޗުވެސް ހަމަ އެގަޑީގައި ކުޅެވޭނެއެވެ. މިދެމެޗުވެސް ފަށާނީ މިރޭ މާލޭގަޑިން 23:45 ގައެވެ.