އާޖެންޓީނާގެ ކެޕްޓަން ލިއޮނަލް މެސީ ނެތި ކުޅުނު ފުރަތަމަ މެޗުން ގުއަޓަމާލާ އަތުން 3-0 އިން އެޓީމު މޮޅުވިއިރު ބެލްޖިއަމް ވަނީ ސްކޮޓްލެންޑް އަތުން ފަސޭހަކަމާއިއެކު މޮޅުވެފައެވެ.
އާޖެންޓީނާގެ ވަގުތީ ކޯޗު ލިއޮނަލް ސްކަލޯނީގެ އިރުޝާދުގެދަށުން އެޓީމު ކުޅުނު ފުރަތަމަ މެޗަށް ނެގި ސްކޮޑުގައި އެޓީމުގެ މުހިއްމު ކުޅުންތެރިން ކަމަށްވާ މެސީގެ އިތުރުން ގޮންޒާލޯ ހިގައިން އާއި އެންހެލް ޑި މަރިއާ އަދި ސާޖިއޯ އަގުއޭރޯ ނުހިމެނެ އެވެ.
އެމެރިކާގެ ލޮސް އެންޖެލެސްގައި ކުޅުނު މިމެޗުގައި އާޖެންޓީނާގެ ތިން ލަނޑުވެސް ފެނިގެންގޮސްފައިވަނީ ފުރަތަމަ ހާފުގައެވެ. އެގޮތުން، މެޗުގެ 27 ވަނަ މިނެޓުގައި ލިބުނު ޕެނަލްޓީއަކުން ގޮންޒާލޯ މާޓިނޭޒް އެޓީމަށް ލީޑް ނަގައިދިންއިރު އޭގެ 8 މިނެޓުފަހުން، ޖިއޮވާނީ ލޮ ސެލްސޯ ވަނީ އިތުރު ލަނޑެއްޖަހައި ލީޑް ފުޅާކޮށްދީފައެވެ.
އާޖެންޓީނާގެ ފަހު ލަނޑު، ފުރަތަމަ ހާފު ނިމެން މިނެޓަކަށް ވެފައިވަނިކޮށް އެޒެކުއިލް ޕަލާސިއޯސް ތަނަވަސްކުރި ފުރުޞަތަކުން ކާމިޔާބުކޮށްދިނީ ފިއޮރެންޓީނާގެ ފޯވާޑް ޖިއޮވާނީ ސިމިއޯނީ އެވެ. މިއީ އާޖެންޓީނާގެ ކުރީގެ މިޑްފީލްޑަރު އަދި އެތުލެޓިކޯ މެޑްރިޑުގެ ކޯޗު ޑިއެގޯ ސިމިއޯނީގެ ދަރިފުޅު ޖިއޮވާނީ އާޖެންޓީނާގެ ޤައުމީ ޓީމަށް ކުޅެދިން ފުރަތަމަ މެޗެވެ.
އެންމެ ފަހުގެ ވޯލްޑްކަޕްގެ ތިންވަނަ މަޤާމް ހޯދި ބެލްޖިއަމް ވަނީ ރަށުން ބޭރުގައި ކުޅެ ފަސޭހަކަމާއިއެކު ސްކޮޓްލެންޑް އަތުން 4-0 އިން މޮޅުވެފައެވެ.
ސްކޮޓްލެންޑްގެ ހޭމްޕްޑެން ޕާކްގައި ކުޅުނު މިމެޗުގެ ފުރަތަމަ ހާފުގައި ބެލްޖިއަމްގެ ފަރާތުން އެންމެ ގޯލެއް ފެނިގެންދިޔައިރު 28 ވަނަ މިނެޓުގައި މިލަނޑު ޖަހައިދިނީ މެންޗެސްޓަރ ޔުނައިޓެޑްގެ ފޯވާޑް ރޮމެލޫ ލުކާކޫ އެވެ. މިއީ ތޯގަން ހަޒާޑް ދިން ބޯޅައަކުން އޭނާ ކާމިޔާބުކުރި ގޯލެކެވެ.
ދެވަނަ ހާފު ފެށިތާ މިނެޓެއްގެތެރޭގައި ޔަނިކް ފެރެއިރާ ކަރަސްކޯ ތަނަވަސްކުރި ފުރުޞަތަކުން އެޑެން ހަޒާޑް ވަނީ ބެލްޖިއަމަށް ދެލަނޑުގެ ލީޑެއް ނަގައިދީފައެވެ. މެޗުގެ 52 ވަނަ މިނެޓުގައި ހަޒާޑް ދިން ބޯޅައަކުން ބެލްޖިއަމްގެ ތިންވަނަ ލަނޑުޖަހައިދިނީ މިހާފުގައި ކުޅެން ނިކުތް މިޗީ ބަޓްޝުއާޔީ އެވެ.
އޭގެފަހުން، މެޗުގެ 60 ވަނަ މިނެޓުގައި ބެލްޖިއަމްގެ ފަހު ލަނޑު ޖަހައިދިނީ ވެސް ބަޓްޝުއާޔީއެވެ. މިއީ ޔޫރީ ޓީލެމެންސް ތަނަވަސްކުރި ފުރުޞަތަކުން އޭނާ ކާމިޔާބުކުރި ގޯލެކެވެ.
ވޯލްޑްކަޕަށްފަހު ބްރެޒިލް ކުޅުނު ފުރަތަމަ މެޗުގައި ދާދިފަހުން އެޤައުމުގެ ދާއިމީ ކެޕްޓަންކަމުގެ މަޤާމަށް ހަމަޖެއްސި ނޭމާ އާއި ރޮބާޓޯ ފިރްމީނޯ ކާމިޔާބުކުރި ގޯލުތަކުން އެމެރިކާގެ މައްޗަށް 2-0 އިން އެޓީމު ކުރިހޯދައިފިއެވެ.
އެމެރިކާގެ ނިއު ޖާޒީގެ މެޓްލައިފް ސްޓޭޑިއަމްގައި ކުޅުނު މި މެޗަށް ބްރެޒިލް ކޯޗު ޓީޓޭ ނެރުނީ ވަރަށް ވަރުގަދަ ޓީމެކެވެ. އެގޮތުން އެޓީމުގެ ފުރަތަމަ އެގާރައިގައި އާއްމުކޮށް ކުޅޭ ކުޅުންތެރިން ކަމަށްވާ ގޯލްކީޕަރު އެލިސަން ބެކާ އާއި ތަޖުރިބާކާރު ޑިފެންޑަރު ތިއާގޯ ސިލްވާ އާއި ފިލިއްޕޭ ކުޓީނިއޯ އަދި ކަސެމީރޯ ވަނީ ހިމަނާފައެވެ. މީގެއިތުރުން، ލިވަޕޫލްގެ ދެކުޅުންތެރިންކަމަށްވާ ފަބީނިއޯ އާއި ފިރްމީނޯ އަދި ޔުވެންޓަސްގެ ވިންގާ ޑަގްލަސް ކޮސްޓާ ވެސް ބްރެޒިލްގެ ފުރަތަމަ އެގާރައިގައި ހިމެނިފައެވެ.
މި މެޗުގެ 11 ވަނަ މިނެޓުގައި ބްރެޒިލަށް ލީޑު ނަގައިދިނީ ޑަގްލަސް ކޮސްޓާ ދިން ބޯޅައަކުން ފިރްމީނިއޯ އެވެ. އޭގަފަހުން ފުރަތަމަ ހާފު ނިމެން ދެމިނެޓަށްވެފައިވަނިކޮށް އެޓީމުގެ ދެވަނަ ގޯލް ޖަހައިދިނީ ލިބުނު ޕެނަލްޓީއަކުން ނޭމާ އެވެ.
ރޭ ކުޅުނު އެކުވެރިކަމުގެ އެހެން މެޗުތަކުގެ ނަތީޖާއަށް ބަލާއިރު، ވެނެޒުއެލާ އަތުން ކޮލަމްބިއާ 2-1 އިން މޮޅުވިއިރު، މެކްސިކޯ އަތުން އުރުގުއޭ މޮޅުވީ 1-4 އިންނެވެ. މިމެޗުގައި ބާސެލޯނާގެ ފޯވާޑް ލުއިސް ސުއަރޭޒް ދެލަނޑު ޖެހިއިރު އަނެއް ދެލަނޑު ކާމިޔާބުކޮށްދިނީ ހޯސޭ ގިމެނޭޒް އާއި މެކްސިމިލިއާނޯ ޕެރެއިރާއެވެ. މެކްސިކޯގެ ހަމައެކަނި ލަނޑުޖަހައިދިނީ އިނގިރޭސި ކްލަބް ވުލްވަހެމްޕްޓަން ވޮންޑަރާސްގެ ފޯވާޑް ރައުލް ޖިމިނޭޒް އެވެ.