ސާފް ސުޒުކީ ކަޕްގެ ގްރޫޕް އޭ ގައި އިއްޔެ ކުޅުނު ފުރަތަމަ މެޗުގައި ބޫޓާން އަތުން 3-0 އިން މޮޅުވެ ޕާކިސްތާން ސެމީގެ ޖާގަ އެއް ކަށަވަރުކުރިއިރު ފަހު މެޗުގައި ނޭޕާލް އަތުން 2-0 އިން ބަލިވެ ބަންގްލަދޭޝް މިމުބާރާތުން ކަޓައިފިއެވެ.
ގްރޫޕް އޭގެ މެޗުތައް ނިންމާލިއިރު އެއްވަނައިގައި އޮތީ ކުޅުނު ތިން މެޗުގެ ތެރެއިން ދެމެޗުން މޮޅުވެ 6 ޕޮއިންޓާއިއެކު ނޭޕާލެވެ. ޕާކިސްތާނަށް ފައިދާ ތިން ގޯލް ލިބިފައިވާއިރު ނޭޕާލަށް ފަސް ގޯލް ލިބިފައިވެއެވެ. ހަމަ މިއަދަދަށް ޕޮއިންޓް ލިބިފައިވާ ބަންގްލަދޭޝްގެ ފައިދާ އެންމެ ގޯލެއް އޮތުމުން އެޓީމު ގްރޫޕް ސްޓޭޖު ނިންމާލީ ތިންވަނައިގައެވެ. މިގްރޫޕުގައި އެންމެ ފުލުގައި އުޅޭ ބޫޓާނަށް ޕޮއިންޓެއް ލިބިފައިނުވާއިރު ގޯލެއްވެސް ކާމިޔާބުކުރެވިފައެއްނުވެއެވެ.
ޕާކިސްތާން މިއަދުގެ މެޗަށް ނުކުތީ އަނިޔާގެ ސަބަބުން ކުރީ މެޗުގައި ނުކުޅޭ ޑެންމާކު ދެ ވަނަ ޑިވިޝަނުގެ ކްލަބު ބީއެސްވީގެ ފޯވާޑް ހަސަން ބަޝީރު ފުރަތަމަ އެގާރައިގައި ހިމަނައިގެންނެވެ. އަނެއްކޮޅުން ބޫޓާން އެންމެފަހުން ކުޅުނު މެޗުގައި ދެއްކި ރަތްކާޑުގެ ސަބަބުން ޑިފެންޑަރު ނިމާ ވަންގްޑީ ވަނީ މި މެޗަށް ސަސްޕެންޑްވެފައެވެ.
ޕާކިސްތާނުން ލީޑްނެގީ މެޗުގެ 20 ވަނަ މިނެޓުގައި މުހައްމަދު ރިޔާޒެވެ. އޭގެ މިނެޓެއްފަހުން ބޫޓާނަށް އެއްވަރުކުރުމަށް ލިބުނު ފުރުޞަތުގައި ޗެންޗޯ ގެޔެސްޓަން ފޮނުވާލި ބޯޅަ ގޯލަށް ވައްދާނުލެވުނެވެ.
ޕާކިސްތާނުގެ ދެވަނަ ލަނޑުޖަހައިދިނީ 29 ވަނަ މިނެޓުގައި މުހައްމަދު އަލީ ތަނަވަސްކުރި ފުރުޞަތަކުން ހަސަން އެވެ. އޭގެފަހުން، ފުރަތަމަ ހާފު ނިމެން ފަސްމިނެޓަށްވެފައިވަނިކޮށް ޕާކިސްތާނުގެ ލީޑު ފުޅާކުރުމަށް ރިޔާޒަށް ލިބުނު ބޯޅަ އޭނާ ފޮނުވާލުމުން ގޯލްގެ ހުރަސްދަނޑީގައިޖެހިފައިވެއެވެ. ފުރަތަމަ ހާފު ނިމުނީ 2-0 އިން ޕާކިސްތާން ކުރީގައިއޮވެގެންނެވެ.
ދެވަނަ ހާފުގައި ދެޓީމަށްވެސް ލަނޑުޖަހާނެ ފުރުޞަތުތަކެއް ލިބުނު ނަމަވެސް އިތުރު ގޯލެއް ކާމިޔާބުނުކުރެވި މެޗު ނިމެންދަނިކޮށް ޕާކިސްތާނުގެ ފަހު ލަނޑު މެޗުގެ އިތުރު ވަގުތުގައި ޖަހައިދިނީ އަހުމަދު ފަހީމް އެވެ.
މިގްރޫޕުގެ ފަހު މެޗުގައި ނޭޕާލް އަތުން 2-0 އިން ބަލިވެ މުބާރާތް ބާއްވާ ޤައުމު ބަންގްލަދޭޝް ވަނީ ސެމީ އަށް ނުގޮސް ކަޓައިފައެވެ. މިއީ ވޭތުވެދިޔަ 21 އަހަރު ތެރޭގައި މުބާރާތް ބާއްވާ ޤައުމު މިމުބާރާތުގެ ގްރޫޕް ސްޓޭޖުން ކަޓައިގެންދިޔަ ފުރަތަމަ ފަހަރެވެ.
ބަންގުބަންދު ސްޓޭޑިއަމްގައި އަމިއްލަ ސަޕޯޓަރުންގެ ކުރިމަތީގައި ކުޅުނު މިމެޗުގެ ފުރަތަމަ ހާފުގައި ފެނިގެންދިޔަ ހަމައެކަނި ގޯލް މެޗުގެ 33 ވަނަ މިނެޓުގައި ޖަހައިދިނީ ނޭޕާލްގެ ބިމާލް ގާތީ މަގަރް އެވެ. ޕެނަލްޓީއޭރިޔާ ބޭރު އަރިމަތިން ލިބުނު ހިލޭޖެހުމަކުން އޭނާ ފޮނުވާލި ބޯޅަ ގޮސް ގޯލްގެ ތެރެއަށް ވަނީ ބަންގްލަދޭޝްގެ ގޯލްކީޕަރު ޝާހިދުލް އާލަމް ހިފަން އުޅުމުގެ ތެރޭގައި އަތުގައި ޖެހިފައެވެ. މިހާފު ނިމުނީ 1-0 އިން ނޭޕާލް ކުރީގައިއޮވެގެންނެވެ.
މިމެޗުގައި ނޭޕާލުން ޖެހި ދެވަނަ ލަނޑު މެޗުގެ ފުރިހަމަ ވަގުތު ހަމަވާން މިނެޓަކަށްވެފައިވަނިކޮށް ކާމިޔާބުކޮށްދިނީ ނަވާޔުގް ޝްރެސްތާ އެވެ. ޕެނަލްޓީއޭރިޔާތެރޭގައި ވަރަށް ހަމަޖެހިލައިގެން ހުރެ އޭނާ ފޮނުވާލި ބޯޅަ ގޯލްގެ ތެރެއަށް ވަނީ ދަނޑީގައިޖެހިފައެވެ.